JOSUA 18
18
Era vakatura cake na vale ni veitavaki mai Sailo, 1. Sa vakauqeta na mataqali e vitu ko Josua me ra qara na nodra i votavota, 2-10. Ai votavota nei Penijamini, 11-28.
1A ra sa soqoni vata nai soqosoqo taucoko ni Isireli mai Sailo, ka vakatura cake kina na vale ni veitavaki. A sa vakamalumalumutaki vei ira na vanua.
2A sa vo e vitu na mataqali vei ira na Isireli, sa sega ni rawata na nodra i votavota. 3A sa kaya ko Josua kivei ira na Isireli, a cava na kena dede kemuni sa berabera kina ni la'ki taukena na vanua, sa solia vei kemuni ko Jiova na nodra Kalou na nomuni qase? 4Ni lesia e lewe tolu na tamata mai na nomuni mataqali yadua: au na qai talai ira, a ra na cavu tu, ka veilakoyaki e na vanua, ka vola nai yalayala ni nodra i votavota; a ra na lesu mai vei au. 5A ra na wasea me vitu na tikina: era na tiko na Juta e na nodra yasana mai na ceva, ka na tiko na mataqali i Josefa e na nodra yasana mai na tokalau. 6Ia dou na vola na vanua me vitu na kena tikina, ka kauta mai nai vola vei au ki ke, me'u ia na vakawiri madigi vei kemuni eke e na mata i Jiova na noda Kalou. 7Ia ko ira na Livai, sa sega na nodra tikina vata kei kemuni; ni sa nodra i votavota na cakacaka vakabete vei Jiova: ia ko ira na Kata, kei na Rupeni, ka dua na kena wase ni mataqali i Manasa, era sa rawata na nodra i votavota mai tai kadua ni Joritani, mai na tu-i-cake, o koya sa solia vei ira ko Mosese nai talatala i Jiova.
8A ra sa cavu tu ko ia na tamata, ka lako tani: ia ko Josua, sa vakaroti ira ka lako me ra vola na vanua ka kaya, Dou veilakoyaki e na vanua, ka vola, ka lesu tale mai vei au, me'u qai vakawiri madigi vei kemudou eke e na mata i Jiova, e Sailo. 9A ra sa lako ko ira na tamata, ka lakova na vanua, ka vola me vaka na veikoro, ka wasea me vitu na tikina, e na dua nai vola, a ra sa lesu vei Josua ki nai tikotiko mai Sailo. 10A sa vakawirimadigi vei ira ko Josua mai Sailo, e na mata i Jiova: ka wasea maikina na vanua ko Josua kivei ira na Isireli, me vaka na kedrai wasewase.
11A sa qarava nai votavota ni nodra mataqali na Penijamini me vaka na nodra veivuvale: a sa tu na kenai yalayala ni nodra i votavota e na kedra maliwa na Juta kei na luve i Josefa.
12Ia na nodra i yalayala e na yasana ki na tokalau sa tekivu mai na Joritani; a sa lako cake nai yalayala ki na yasa i Jeriko sa donuya na tokalau, a sa lako cake e na veiulu-ni-vanua vaka ki ra; ia sa kenai mudumudu na lekutu mai Peciaveni. 13A sa lako yani maikea nai yalayala vaka ki Lusa, ki na yasa i Lusa, (ko ya ko Peceli,) sa donuya na ceva; a sa lako sobu nai yalayala ki Ataroci-atari, voleka ki na ulu-ni-vanua sa toka e na yasa ki na ceva ki Peci-oroni era.
14A sa volai maikea nai yalayala, ka lako volita na yasa ni wasawasa ki na ceva, mai na ulu-ni-vanua e na mata i Peci-oroni ki na ceva; ia sa kenai mudumudu ko Kiriaci-peali, (oqo ko Kiriaci-jiarimi,) e dua na nodra koro na Juta: oqo na kenai yalayala ki ra.
15Ia na yasana ki na ceva sa tekivu mai nai yalayala kei Kiriaci-jiarimi, a sa lako yani nai yalayala vaka ki ra, ka yaco ki na wai vure mai Nefitoa: 16a sa lako sobu nai yalayala ki na ucu ni ulu-ni-vanua sa donuya na buca ni luve i Inomi, oqori mai na buca ni luve i Refeimi, vaka ki na tokalau, sa lako sobu ki na buca nei Inomi, ki na yasa ni kai Jepusa ki na ceva, ka lako sobu ki Enirokeli, 17a sa volai mai na tokalau, ka lako yani ki Eni-semesi, ka lako yani ki Kililoci, ko ya sa donuya nai cabecabe ki Atumimi, ka lako sobu ki na Vatu i Poani, na luve i Rupeni, 18a sa lako yani vaka ki na yasa sa donui Arapa, ki na mata ni tokalau, ka lako sobu ki Arapa: 19a sa lako yani nai yalayala ki na yasa i Peci-okila vaka ki na tokalau: ia nai mudumudu ni yalayala na toba ni Wasa Tuituina vaka ki na tokalau mai nai otioti ni Joritani ki na ceva: oqo nai yalayala ki na ceva.
20Ia na Joritani sa kenai yalayala e na yasa ki na tu-i-cake. Oqo na kenai yalayala sa volita na nodra i votavota, na Penijamini, me vaka na nodra veivuvale.
21Ia na veikoro ni nodra mataqali na Penijamini, me vaka na nodra veivuvale, ko Jeriko, kei Peci-okila, kei na buca mai Kisisi, 22kei Peci-arapa, kei Simareimi, kei Peceli, 23kei Avimi, kei Para, kei Ofira, 24kei Kifari-Amoni, kei Ofini, kei Kepa; e tinikarua na koro kei na kedra veikoro lalai; 25ko Kipioni, kei Rama, kei Pieroci, 26kei Misipe, kei Kifira, kei Mosa, 27kei Rikemi, kei Iripeli, kei Tarela, 28kei Sela, ko Elefi, kei Jepusa (ko ya ko Jerusalemi), ko Kepaci, ko Kiriaci; e tinikava na koro kei na kedra veikoro lalai. Oqo na nodra i votavota na Penijamini, me vaka na nodra veivuvale.
Currently Selected:
JOSUA 18: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
