JONA 3
3
Ni sa talai tale ko Jona, sa la'ki vunauci ira na kai Ninive, 1-4. Ni ra veivutuni na kai Ninive, sa veivutuni talega na Kalou, 5-10.
1A sa baci yaco tale vakarua vei Jona na vosa i Jiova, ka vaka, 2Mo cavu tu, mo lako ki Ninive, na koro levu ko ya, ka vunautaka kina na vunau ka'u a kaya vei iko. 3A sa cavu tu ko Jona, ka lako yani ki Ninive, me vaka na vosa i Jiova. Ia ko Ninive na koro levu sara eda na bogi tolu ni da lako tu me vakavolivolita. 4A sa curu ki na koro ko Jona ka lako voli kina e na dua na siga, ka sa vunau tiko, ka kaya, Sa na bogi vasagavulu mada, ena qai rusa ko Ninive.
5Era sa qai vakabauta na Kalou ko ira na kai Ninive, ka kacivaka me ra lolo, a ra sa vakaisulu e nai sulu taga ko ira na turaga kei ira talega na lewe ni vanua. 6Ni sa rogo vei tui Ninive na vosa oqori, ka sa tu cake ko koya mai na nonai tikotiko vakaturaga, ka luvata tani na nonai sulu vakatui, ka sa vakaisulutaki e nai sulu taga, ka la'ki tiko e na dravusa. 7A sa kacivaki ka tukuni sara e Ninive, ni sa vakarota ko koya na tui kei ira na kena turaga, ka vaka, Me kakua ni dua na tamata se na manumanu, na pulumokau se na sipi, me kania e dua na ka: me ra kakua ni kana, se gunu wai: 8ia me ra vakaisulu e nai sulu taga na tamata kei na manumanu, ka tagi sara vua na Kalou: ka me ra dui lesu talega ko ira yadua mai na nonai tovo ca, ka mai nai valavala kaukauwa talega sa ra dauia e na ligadra yadua. 9O cei e kila de sa na saumaki beka na Kalou ka veivutuni, ka lesu mai na nona cudru waqawaqa, me da kakua ni rusa? 10A sa raica na nodra i valavala na Kalou, ka ni ra sa vuki mai na nodra i tovo ca; ka sa qai veivutuni na Kalou e na vuku ni ca sa kaya me cakava vei ira; ka sa sega ni cakava ko koya.
Currently Selected:
JONA 3: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
