JOELI 3
3
A veicudruvi ena yaco mai vua na Kalou vei ira na meca ni nona tamata, 1-8. Ena kilai kina na Kalou ni sa ia na veicudruvi, 9-17. Ena vinaka sara na nodra tiko na nona tamata, ka ca sara ko Ijipita kei Itomi, 18-21.
1Ni na yaco, raica, e na veisiga ko ya, kei na gauna ko ya, ni'u sa kauti ira oti mai na Juta kei ira na kai Jerusalemi era sa vakabobulataki, 2ka'u na qai vakasoqoni ira vata na lewe ni veimatanitu kecega, ka kauti ira sobu ki na buca i Jiosafati, ka totaki ira maikea na noqu tamata kei na noqu i votavota na Isireli, o ira sa ra dui veiseyaki ki na veivanua, ka ra sa vota talega na noqu vanua: 3Era sa vakawiri madigi e na vuku ni noqu tamata; ka ra solia na gonetagane mei voli ni yalewa dautagane, kei na goneyalewa era solia mei voli ni waini, me ra gunuva. 4Ia ka cava tale mo dou cakava vei au, koi kemudou mai Taia, kei Saitoni, kei na yasayasa vaka-Filisitia kecega? dou na solia beka vei au e dua na kenai sau? ia ke dou sa saumi au rawa, ke na vakatotolo ka vakasauri na noqu vakasuka na kemudoui sau ki na ulumudou. 5Ka ni dou sa kauta na noqu siliva kei na noqu koula, kei na noqu ka vinaka sa domoni dou sa yauta ki na nomudou bure kalou: 6ko ira talega na gone ni Juta kei na gone ni Jerusalemi dou sa volitaka vei ira na kai Javana, mo dou vakasevi ira vakayawa tani mai na nodra i yalayala. 7Raica, au na vakayavalati ira me ra takali tani mai na yasana dou sa volitaki ira kina, ka vakasuka na kemudoui sau ki na ulumudou: 8Au na volitaki ira talega na luvemudou tagane, kei na luvemudou yalewa, kivei ira na Juta, ka ra na volitaki ira ki na kai Sipa, ki na matanitu vakayawa: ni sa kaya oqo ko Jiova.
9Dou kacivaka na ka oqo e na veimatanitu; Dou vakarautaka nai valu; vakauqeti ira na qaqa; me ra toro mai, me ra lako cake mai ko ira na tamata i valu kecega: 10dou tukitukia na bati ni nomudou i siviyara mei seleiwau, kei na nomudou i sele ni samaki me moto: me kaya ko koya sa malumalumu, Au sa kaukauwa. 11Dou soqoni vata sara, ka lako kece mai, na lewe ni veimatanitu, dou vakasoqoni vata mai na veiyasana: Kemuni Jiova mo ni kauti ira sobu ki kea, na nomuni qaqa. 12Me ra vakayadrati na lewe ni veimatanitu, me ra lako cake mai ki na buca i Jiosafati: ni ka'u na tiko maikina me'u lewai ira na veimatanitu era tiko vakavolivolita.
13Dou vakacuruma nai sele-takelo, ni sa matua vinaka na sila: dou mai lako sobu; ni sa sinai nai keli-waini, sa vuabale nai keli; ni sa levu na nodra ca. 14Na kedra lewe vuqa, na kedra lewe vuqa e na buca ni veicudruvi! ni sa voleka mai na siga i Jiova e na buca ni veicudruvi. 15Ena vakabutobutotaki na mata-ni-siga kei na vula, ia na kalokalo ena sega tiko ni serau mai.
16Ia ko Jiova ena kurukuru mai Saioni, ka na tabalaka na domona mai Jerusalemi; ena yavavala talega na lomalagi kei vuravura: ia ko Jiova ena nodra i drodro na nona tamata, kei na nodra koro kaukauwa na Isireli. 17Dou na qai kila kina ni sai au ko Jiova na nomudou Kalou ka tiko mai Saioni, na noqu ulu-ni-vanua tabu: ena qai tabu ko Jerusalemi, ka na sega tale na kai tani me lako voli kina.
18Ia e na siga ko ya, ena vakatauca na waini vou na veiulu-ni-vanua, a veiulu-ni-koro talega ena vakadavea na wai-ni-sucu, ena drodro talega na wai e na dreke ni wai kece ni Juta, ia e dua na mata-ni-wai ena tovure mai na vale i Jiova, ka vakasuasuataka na buca ko Sitimi.
19Ko Ijipita, ena lala sara mai; ko Itomi talega, ena veikau lala sara; ni ra sai valavala vakaukauwa vei ira na Juta, ka ni ra sa vakadavea na dra tawa cala e na nodra vanua. 20Ia ko Juta, ena tawa tikoga ka sega ni mudu, kei Jerusalemi, mai nai tabatamata e dua ka yacova na veitabatamata emuri. 21Ia ka'u na cavuta me tawa cala na kedra dra ka'u a sega ni cavuta me tawa cala: ni sa tiko ga mai Saioni ko Jiova.
Currently Selected:
JOELI 3: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
