EMOSI 1
1
Sa vakatakila ko Emosi na nodra ca kei na nodra cudruvi na kai Siria, 1-5, kei na kai Filisitia, 6-8, kei na kai Taia, 9,10, kei na kai Itomi, 11,12, kei ira na kawa i Amoni, 13-15.
1A vosa i Emosi, e dua vei ira nai vakatawa ni sipi mai Tikoa, na ka sa raica ka sa baleti ira na Isireli, e na gauna i Usaia na tui Juta, kei na gauna i Jeropoami na luve i Joasi na tui Isireli, ni sa vo e rua na yabaki ka qai tavuki na vanua.
2A sa kaya ko koya, Ena kurukuru mai Saioni ko Jiova, ia mai Jerusalemi, ena tabalaka na domona; ena tagi kina na nodra i tikotiko nai vakatawa, ka na malai na dela i Kameli.
3Sa kaya vakaoqo ko Jiova; Ni sa qai vakatolu na talaidredre i Tamasiko, io, ni sa vakava, ka'u na sega kina ni vakadaroya na kena cudruvi ka ni ra sa samuti Kiliati e nai samu-yara kaukamea: 4ia ka'u na biuta na bukawaqa ki na vale i Eseeli, ena vakama na veivale vakaturaga mai Peni-etati. 5Au na musuka talega na bai mai Tamasiko, ka muduki koya tani sa tiko mai na buca ko Eveni, kei koya sa taura nai titoko vakaturaga mai na mataqali i Iteni: ka ra na kau vakabobula na kai Siria ki Kiri, sa kaya ko Jiova.
6Sa kaya vakaoqo ko Jiova; Ni sa qai vakatolu na talaidredre i Kesa, io, ni sa vakava, ka'u na sega kina ni vakadaroya na kena cudruvi; ka ni ra sa kauti ira kece vakabobula, me ra soli ira yani ki Itomi: 7ia ka'u na biuta na bukawaqa ki na bai mai Kesa, ena vakama na kena veivale vakaturaga: 8au na muduki koya tani sa tiko mai Asitoti, kei koya sa taura nai titoko vakaturaga mai Asikiloni, au na qai dodoka na ligaqu ki Ekironi: ka ra na rusa ko ira na kena vo ni kai Filisitia, sa kaya na Turaga ko Jiova.
9Sa kaya vakaoqo ko Jiova; Ni sa qai vakatolu na talaidredre i Taia, io, ni sa vakava, ka'u na sega kina ni vakadaroya na kena cudruvi; ka ni ra sa soli ira kece me ra bobula ki Itomi, ka sa sega ni nanuma na veiyalayalati vakaveitacini: 10ia ka'u na biuta na bukawaqa ki na bai mai Taia, sa na vakama na kena veivale vakaturaga.
11Sa kaya vakaoqo ko Jiova; Ni sa qai vakatolu na talaidredre i Itomi, io, ni sa vakava, ka'u na sega kina ni vakadaroya na kena cudruvi; ni sa vakasavi koya na tacina e nai seleiwau, ka sa bese ni yalololoma, ka sa dauveibasuraki tiko e na nona cudru, ia na nona yaloca sa tu ga ka tawa mudu: 12ia ka'u na biuta na bukawaqa ki Temani, ka na vakama na veivale vakaturaga mai Posira.
13Sa kaya vakaoqo ko Jiova; Ni sa qai vakatolu na nodra talaidredre na kawa i Amoni, io, ni sa vakava, ka'u na sega kina ni vakadaroya na nodra cudruvi; ka ni ra sa dresulaki ira na yalewa ni Kiliati era bukete tiko, me ra toroya yani nai yalayala ni nodra vanua: 14ia ka'u na vakawaqaca na buka e na bai mai Rapa, ka na vakama na kena veivale vakaturaga, ka ia vata kei na kaila e na siga ni valu, kei na cava e na siga ni covulaca: 15ena vakabobulataki talega na nodra tui, o koya vata kei na nona tamata turaga, sa kaya ko Jiova.
Currently Selected:
EMOSI 1: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
