NA DAUVEILEWAI 6
6
Sa lewai ira na Isireli ko ira na kai Mitiani, e na vuku ni nodra i valavala ca, 1-6. Sa vunauci ira e dua na parofita, 7-10. Sa rairai vei Kitioni e dua na agilose, ka kaya vua me vakabulai ira na Isireli, 11-24. Sa vakacacana nai cabocabo-ni-soro i Peali, ka cabora nai soro vei Jiova, ko Kitioni, 25-27; era sa cudru vua na nona lewe ni koro, a sa vosa vinaka vei ira ko tamana, 28-32. Sa la'ki soqona vata na nonai valu ko Kitioni, 33-35; a sa vakatovolei Jiova e na vutika ni sipi kei na tegu, 36-40.
1A ra sa kitaka na ka ca e na mata i Jiova ko ira na Isireli; a sa soli ira ko Jiova ki na ligadra na kai Mitiani ka yabaki vitu. 2A sa kaukauwa na ligadra na kai Mitiani vei ira na Isireli: ia e na vukudra na kai Mitiani, era sa cakava ko ira na Isireli na veikikilo kei na veiqara kei na veikoro ni valu, mai na veiulu-ni-vanua. 3Ia kevaka era sa kaburaki sila ko ira na Isireli, sa qai ia ko ira na kai Mitiani, kei ira na Amalekaiti, kei ira mai na tu-i-cake, ka lako cake vakaivalu vei ira; 4ka ra tiko vakaivalu vei ira, ka vakacacana na vuata ni vanua, ka yacovi Kesa, ka sega ni vakavoca na kakana me ra bula kina ko ira na Isireli, ka sega na sipi, se na pulumokau, se na asa. 5Ni ra sa lako cake ka kauta na nodra manumanu, kei na nodra veivale laca; a ra sa lako mai ka ra vaka na vodre na kedrai wiliwili; ia sa sega ni wili rawa ko ira kei na nodra kameli; ka ra sa lako mai ki na vanua me vakacacana sara. 6A ra sa vakadravudravuataki vakalevu sara ko ira na Isireli e na vukudra na kai Mitiani; a ra sa tagi vei Jiova ko ira na Isireli.
7Ia ni ra sa tagi vei Jiova ko ira na Isireli e na vukudra na kai Mitiani, 8sa qai tala e dua na parofita ko Jiova vei ira na Isireli, o koya ka kaya vei ira, Sa kaya vakaoqo ko Jiova na Kalou ni Isireli, Au a kauti kemudou cake mai Ijipita, ka kauti kemudou mai na vale ni veivakabobulataki; 9ia ka'u a vakabulai kemudou mai na ligadra na kai Ijipita, kei na ligadra kecega era vakararawataki kemudou, ia ka'u a vakasevi ira tani mai na matamudou, ka solia vei kemudou na nodra vanua: 10ia ka'u a kaya vei kemudou, Koi au ko Jiova na nomudou Kalou; kakua ni rerevaki ira na nodra kalou na Amoraiti, a nodra vanua dou sa tiko kina: ia dou sa sega ni vakarorogo ki na noqu vosa.
11A sa lako mai ko koya na Agilose i Jiova, ka tiko sobu e ruku ni oki mai Ofira, a nei Joasi na luve i Epieseri: a sa samu sila tiko ko Kitioni na luvena mai na tikina sa daucaka kina na waini, me vunia maivei ira na kai Mitiani. 12A sa rairai vua ko koya na Agilose i Jiova, ka kaya vua, Sa tiko vata kei iko ko Jiova, ko iko na tamata i valu qaqa. 13A sa kaya vua ko Kitioni, Isa lei, noqu turaga, kevaka sa tiko vata kei keimami ko Jiova, a cava sa yacovi keimami kina na ka kecega oqo? ka sa evei beka na nona cakacaka vakurabui kecega era a tukuna vei keimami ko ira na neimami qase, ni ra kaya, Sa sega li ni kauti keda cake mai Ijipita ko Jiova? ia ka sa qai biuti keimami ko Jiova, ka soli keimami yani ki na ligadra na kai Mitiani. 14A sa gole vua ko Jiova, ka kaya, Mo lako e na nomu kaukauwa oqo, ia ko na vakabulai ira na Isireli mai na ligadra na kai Mitiani: au sa sega li ni talai iko? 15A sa kaya vua ko koya, Isa lei, kemuni na Turaga, au na vakabulai ira vakaevei na Isireli? ni raica, sa dravudravua na noqu lewe udolu e na kedra maliwa na Manasa, ia koi au, au sa lailai sara e na mataqali i tamaqu. 16A sa kaya vua ko Jiova, Au na tiko vakaidina kei iko, ia ko na mokuti ira na kai Mitiani me vaka era le dua bauga na tamata. 17A sa kaya vua ko koya, Kevaka au sa kune loloma e matamuni, mo ni cakava mada e dua nai vakadinadina ni sai kemuni ga ka vosa vei au: 18mo ni kakua ni lako tani eke, ka me'u tale mada mai vei kemuni, ka kauta mai na noqu i madrali, ka vakacabora e matamuni. A sa kaya ko koya, Au na tiko ga, ka mo tale mada mai.
19A sa lako ko Kitioni, ka vakarautaka e dua na luve ni me, kei na keki sa sega ni vakaleveni sa caka e na dua na efa madrai droka: sa virikotora na lewe ni manumanu e na sova, ka sova na kena su ki na kuro, a sa kauta mai ki na ruku ni oki, ka vakacabora vua. 20A sa kaya vua na agilose ni Kalou, Kauta na lewe ni manumanu, kei na keki sa sega ni vakaleveni, ka virikotora e na dela ni vatu oqo, ka sova na kena su. A sa kitaka vakakina ko koya. 21Ia na Agilose i Jiova sa qai tara e na mua ni titoko sa tu e ligana na lewe ni manumanu kei na keki sa sega ni vakaleveni; ka sa tubu cake na bukawaqa mai na vatu, ka kania na lewe ni manumanu kei na keki sa sega ni vakaleveni. Sa qai lako tani maivua ko koya na Agilose i Jiova.
22Sa qai kila ko Kitioni ni sai koya na Agilose i Jiova, ka sa kaya ko Kitioni, Ulei, na Turaga ko Jiova! ni'u sa qai raica e mataqu dina na Agilose i Jiova. 23A sa kaya vua ko Jiova, Mo vakacegu ga; kakua ni rere: ko na sega ni mate.
24Sa qai cakava maikea e dua nai cabocabo-ni-soro vei Jiova ko Kitioni, a sa vakatoka ko Jiova-salomi: ka sa tu ga mai Ofira, ka nodra na luve i Epieseri, ka yacova na siga edaidai.
25A sa kaya vua ko Jiova e na bogi ko ya, Mo kauta na pulumokau tagane ka nei tamamu, io na kenai karua ni pulumokau sa yabaki vitu, ka talaraka sobu nai cabocabo-ni-soro i Peali, ko ya sa nei tamamu, ka taya sobu na kalou yalewa ni veikau sa tu kina: 26ka mo cakava e dua nai cabocabo-ni-soro vei Jiova na nomu Kalou, e cake e na koro kaukauwa oqo, ka me caka vakavinaka, ka kauta na kenai karua ni pulumokau, ka vakacabora mei soro kama, e na buka ni kalou yalewa ni veikau o koya ko na taya sobu. 27A sa kauta ko Kitioni e lewe tini na nona tamata, ka cakava me vaka ka kaya vua ko Jiova: ia ni sa rerevaki ira na lewe-ni-vale i tamana, kei ira na lewe ni koro ko koya, sa sega kina ni kitaka e na siga, sa kitaka ga e na bogi.
28Ia ni ra sa sou e na mataka na lewe ni koro, raica, sa talaraki sobu nai cabocabo-ni-soro i Peali, a sa ta sobu na kalou yalewa ni veikau o koya ka tu kina, ka sa vakacabori na kenai karua ni pulumokau e na dela ni cabocabo-ni-soro sa qai caka. 29A ra sa veikanaka vakai ira, O cei sa cakava na ka oqo? A ra sa veitarotarogi ka qaqa, ka ra kaya, O Kitioni na luve i Joasi sa kitaka na ka oqo. 30A ra sa kaya vei Joasi ko ira na lewe ni koro, Kauta mai na luvemu, me mate mada: ni sa talaraka sobu nai cabocabo-ni-soro i Peali, ka ni sa taya sobu talega na kalou yalewa ni veikau o koya ka tu kina. 31A sa kaya ko Joasi vei ira kecega era sa tu voleka vua, Dou na totaki Peali? dou na vakabulai koya li? o koya sa totaki koya, me sa vakamatei ni sa mataka tiko: ke sa kalou ko koya, me vala e na vukuna ga, ni sa dua sa talaraka sobu na nonai cabocabo-ni-soro. 32A sa vakatokai ko koya e na siga ko ya ko Jerupeali, ni sa kainaki, Me veivala kaya ko Peali, ni sa talaraka sobu ko koya na nonai cabocabo-ni-soro.
33A ra sa soqoni vata ko ira kecega na kai Mitiani, kei ira na Amalekaiti, kei ira mai na tu-i-cake, ka ra lako yani, ka la'ki tiko e na buca mai Jesirieli. 34A sa curumi Kitioni na Yalo i Jiova a sa uvu davui ko koya; ka ra sa vakasoqoni vata ko ira na luve i Epieseri me ra muri koya. 35A sa tala ko koya eso na tamata kivei ira kecega na Manasa; ka ra sa kacivi talega ko ira me ra muri koya: a sa tala eso na tamata vei ira na Aseri, kei ira na Sepuloni, kei ira na Nafitalai; a ra sa lako mai me ra veitata kaya.
36A sa kaya vua na Kalou ko Kitioni, Kevaka ko ni na vakabulai ira na Isireli e na ligaqu, me vaka ko ni a kaya, 37raica, au na virikotora e na rara ni buturaki sila na vutika ni sipi sa koti; kevaka sa suasua na vutika ni sipi duaduaga e na tegu, ka sa mamaca na qele kecega, au na qai kila ko ni na vakabulai ira na Isireli e na ligaqu, me vaka ko ni a kaya. 38A sa yaco me vakakina: ka ni sa sou e na mataka ko koya, sa qumia vata na vutika ni sipi, ka lobaka na tegu mai na vutika ni sipi, a sa sinai kina e dua na sedre e na wai. 39A sa kaya vua na Kalou ko Kitioni, Me kakua ni katakata na nomuni cudru vei au, ka me'u vosa tale vakaduaga: me'u vakatovotovo tale mada vakaduaga e na vutika ni sipi; me mamaca mada na vutika ni sipi duaduaga, ka me no e na qele taucoko na tegu. 40A sa cakava vakakina na Kalou e na bogi ko ya: ni sa mamaca na vutika ni sipi duaduaga, a sa no e na qele taucoko na tegu.
Currently Selected:
NA DAUVEILEWAI 6: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
