AISEA 35
35
Ena ka bulabula sara na matanitu ni Mesaia, 1,2. Era sa vakaukauwataki na yalolailai e na vuku ni ka vinaka sa yalataki vei ira era vakabauti koya nai Vakabula, 3-10.
1Ena reki e na vuku ni ka oqo na lekutu kei na vanua dravuisiga; ia na vanua liwa lala ena marau, ka se me vaka na rose, 2Ena se ka beta, ena reki talega, ka na marau ka ia na sere: ena soli kina nai ukuuku vaka-Lepanoni, ka na lagilagi vakataki Kameli ka vakataki Seroni: era na raica nai ukuuku i Jiova, kei na kena vinaka sara ni noda Kalou. 3Dou vakaukauwataka na ligadra era malumalumu, ka vakataudeitaka na durudra sa tuninini. 4Dou kaya vei ira era yalolailai, Dou kaukauwa, dou kakua ni rere: raica na nomudou Kalou; ena yaco mai na veisausaumi, na veisausaumi sa ia na Kalou; ena lako mai ko koya ka vakabulai kemudou. 5Ena qai rai na matadra na mataboko, ka rogo na daligadra na didivara. 6Ena qai ladelade na lokiloki me vaka na me kila, ka sere na yamedra na galu: ni na vure cake mai na wai e na lekutu kei na uciwai e na vanua dravuisiga. 7Ia na nuku kata ena yaco me drano, kei na qele mamaca mei vurevure ni wai: na nodra tikina na wolifa, era daukoto kina, ena vanua veigasau ka veikuta. 8Ia ena dua kina na sala cecere, kei na salatu: ka sa na vakatokai Na sala tabu; ena sega ni lakova e dua sa sega ni savasava; ena lako vata ko Koya kei ira era sa muria na sala, ia ko ira na tamata sesewa era na sega ni lako sese kina. 9Ena sega kina e dua na laioni, se dua na manumanu daukata me cabeta, se me kune kina: ko ira ga era sa vakabulai era na lako tu kina. 10Ia ko ira sa vakabula ko Jiova era na lesu mai, ka tadu mai ki Saioni ka sere lako ia ena sa nodra tiko na reki tawa mudu: era na taukena na reki kei na marau, ia na rarawa kei na tagi ena dro tani yani.
Currently Selected:
AISEA 35: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
