AISEA 34
34
A ka ca sa lewai me yacova na veimatanitu sa veimecaki kei nai soqosoqo lewe ni lotu, era na vakarusai sara, 1-15. Ena yaco dina na ka sa tukuni, 16,17.
1Dou toro mai, na lewe ni veimatanitu, mo dou rogoca; ia dou vakarorogo, na veimataqali: me rogoca ko vuravura, kei na ka sa sinai kina; na veivanua, kei na ka kece sa tubu maikina. 2Ni sa cudru sara ko Jiova vei ira kecega na veimatanitu, a sa lesavi ira na nodra mataivalu kecega: sa lesi ira me ra rusa sara, sa soli ira me ra vakamatei. 3Ena biu ki tautuba na nodra moku mate, ena kuvu cake na bona ni yagodra; ia na veiulu-ni-vanua ena waicala e na kedra dra. 4Ena waicala yani na kalokalo kecega ni lomalagi, ka na vivigi vata na lomalagi me vaka nai vola balavu sa vivigi tu: ena lutu mai na kalokalo kecega, me vaka sa mira mai na drau ni vaini, ka vaka sa qeqera mai na vua ni lolo. 5Ni sa lomoci mai lomalagi na noqu i seleiwau; raica, ena tauci Itomi, kei ira na mataqali ka'u sa lesia me rusa. 6Sa mamau nai seleiwau i Jiova e na dra; sa boro e na uro, e na dra ni lami kei na dra ni me, e na uro ni ivi ni sipi tagane: ni sa dua nai madrali vei Jiova mai Posira, kei na veivakamatei levu mai na vanua ko Itomi. 7Ia na iunikoni ena bale vata kei ira, kei na pulumokau sa sele kei na pulumokau tagane; ena to na nodra vanua e na dra, ka uro mai na nodra kuvu-ni-soso e na uro. 8Ni sa kena siga ni nona veicudruvi ko Jiova, na yabaki ni veisausaumi e na vuku i Saioni. 9Ia na kena uciwai ko Itomi ena vuki me makadre, kei na kena kuvu-ni-soso me sulifure, ia ena yaco me makadre sa waqa tu na kena qele. 10Ena sega ni bokoci e na siga se na bogi; ena kuvu cake na kena kubou ka sega ni mudu: ena lekutu tu e na veitabatamata kecega; ena sega ni lako voli kina e dua e na dua na gauna. 11Ena qai kenai taukei na pelikani kei na belo; ena tiko kina na lulu kei na reveni: ena dreta e delana ko koya na dali i vakarau ni veivakarusai, kei na vatu i vakarau ni veivakalalataki. 12A kena turaga era na kacivi mai ki na matanitu, ka na sega kina e dua; a ra sa yali kecega na nona gone vakaturaga. 13Ena tubu e na kena vale vakaturaga na wa-vakavotona; na salato kei na soni e na kena veikoro ni valu: ena nodra i tikotiko na wolifa, kei na nodra rara na ositereji. 14Ena sota kina na manumanu ni lekutu kei na koli kila; ena tagica na kenai sa na me kila; ena tiko talega maikea na lulu, ka na kunea na nonai vakavakacegu. 15Ena cakava maikea na nonai oviovi na lulu levu, ka vakalutulutu, ka saulaka, ka ovica; ena soqoni talega maikea na vulituri yadua kei na kenai sa.
16Dou qara e nai vola i Jiova, ka wilika: ena sega ni yali e dua vei ira oqo; ena sega e dua me yali na kenai sa: ni sa vakarota na gusuqu, ia na Yalona sa vakasoqoni ira mai. 17A sa ia na vakawiri madigi vei ira ko koya, a sa vota vei ira na ligana e na dali i vakarau: era na taukena ka tawa mudu, era na tiko kina mai nai tabatamata ka yacova nai tabatamata.
Currently Selected:
AISEA 34: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
