AISEA 17
17
Na vosa ni parofisai bibi sa tau ki Siria kei ira na Isireli, 1-6. Ena veivutuni eso, ka cudruvi eso, 7-11. Ena ca sara ko ira na nodra meca na Isireli, 12-14.
1Na vosa ni parofisai bibi kei Tamasiko. Raica, ko Tamasiko, sa vakaoti sara me kakua ni koro, ka sa yaco me yavu wale ni koro sa rusa. 2Sa biu na veikoro ni Aroeri: ena nodra na qele ni sipi, era na koto kina, ka sega e vakarerea. 3Ena oti talega na koro ni valu i Ifireimi, kei na matanitu ni Tamasiko, kei na kedra vo na kai Siria: ena tautauvata na nodra lagilagi kei na nodra lagilagi na Isireli, sa kaya ko Jiova ni lewe vuqa. 4Ia ena yaco e na siga ko ya, ena qai lailai mai nai ukuuku i Jekope, ka na yago ca mai na nona yagolevu. 5Ena vaka e dua sa kumuna na sila ni yabaki, ka sa kumuna na sola ni sila e na ligana; ia, ena vaka e dua sa kumuna na sola ni sila ena buca i Refeimi. 6Ia ena vo ga kina e vica na vuana, me vaka ni sa kurei na vua ni olive, e rua se tolu e na vuso ni tabana ki cake sara, e va se lima e na tabana sa dauvua, sa kaya ko Jiova na Kalou ni Isireli.
7E na siga ko ya ena gole na tamata vei Koya ka Buli koya, ka rai na matana vei Koya na Yalosavasava ni Isireli. 8Ia ena sega ni goleva ko koya nai cabocabo-ni-soro, na cakacaka ni ligana, se rai ki na ka sa cakava nai qaqalo ni ligana, se na matakau i Aseteroci, se na matakau ni mata-ni-siga. 9E na siga ko ya ena tautauvata na nona veikoro kaukauwa kei na kau sa vo mai na veikau lailai, kei na taba ni kau ki cake sara, o koya era sa biuta e na vukudra na Isireli: ia ena lala na vanua. 10Ni ko sa guilecavi koya na Kalou ni nomu bula, ka sa sega ni nanumi koya na Uluvatu ko sa kaukauwa kina, o koya ko sa tea kina na kau domoni, ka sa tea nai sulisuli e kau mai na vanua tani: 11e na siga ko sa tea kina ko na viribaita, e na mataka ko na cakava na nomu i teitei me seraki: ia na vuata e na siga sa tauci kina ena dua nai binibini wale kei na rarawa ni mate.
12Ulei! na domo ni veimatanitu e vuqa! era rorogo me vaka na vadugu ni wasawasa; kei na nodra cici vakaivalu na veimataqali! era sa ue me vaka na vadugu ni wai kaukauwa! 13Era sa ue na veimatanitu me vaka na vadugu ni wai levu: ia ena vunauci ira ko Koya, ka ra na dro tani vakayawa, a ra na vakasavi me vaka na qa ni sila e na veiulu-ni-vanua e na mata ni cagi, ka vaka na ka e vakatatoqitoqi e na mata ni covulaca. 14Raica, e na yakavi era sa domobula mai; ia ni sa sega ni kida na mataka, sa yali sara ko koya. Oqo na kedrai votavota era sa vakacacani keda, kei na ka sa lesi me nodra era butakoci keda.
Currently Selected:
AISEA 17: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
