AISEA 16
16
Ai vakaro vei ira na Moapi me vakamalumalumutaki ira vua na tui Juta, 1-5. Era sa viavialevu ga, 6; ka sa lewa na Kalou me ra cudruvi ga, 7-14.
1Dou vakauta na lami vua na tui ni vanua, io mai Sela e lekutu ki na ulu-ni-vanua ni goneyalewa ni Saioni. 2Me vaka na manumanu sese sa vakasevi mai na kena sova, era na vakakina na goneyalewa ni Moapi mai nai vutovuto ni wai ni Erimoni.
3Dou ia na bose lewa vakadodonu; cakava na nomudou i vakaruru e na siga levu me tautauvata kei na bogi; vunitaki ira sa se mai; kakua ni tukuni ira na tiko se. 4Me tiko kei iko, Moapi, ko ira na noqu era sa se mai, mo nodra i vakaruru mai na matana na dauvakacaca; ni sa takali na daukovekove, sa mudu na dauvakacaca, sa vakarusai tani e na vanua ko ira ka dauvakasaurara. 5Ena qai vakataudeitaki e na loloma nai tikotiko ni tui: ena tiko dei kina ko koya e na vale i Tevita, me ia na lewa, ka segata na lewa dodonu, ka vakusarawataka na kena caka dodonu.
6Eda sa rogoca oti na viavialevu i Moapi; ko koya sa viavialevu sara: io na nona yalolevu, kei na nona dokadokai koya, kei na nona daucudru: ia na nona bolebole ena sega ni dina.
7O koya oqo ena tagicaki Moapi kina ko Moapi, era na tagi kecega: dou na tagi dula ni sa rusa ko Kiri-ereseci; ni sa yaviti sara: 8ni sa qai malai na veiwere ni Esiponi kei na vaini ni Sipima: ko ira na turaga ni veimatanitu era sa vakabalea sobu na tabana talei, sa la'ki yala ki Jaseri, ka lako sese ki lekutu; sa tete yani na tabana, ka lakova na wasawasa.
9O koya oqo ka'u na tagicaka na vaini ni Sipima, me vaka ka'u a tagicaki Jaseri: au na vakasuasuataki kemudrau, Esiponi, kei Elale, e na wai ni mataqu: ni sa rogo na kaila ni valu mai na nomu vuata kei na nomu yabaki. 10A sa vakayalitaki mai na veiwere vakalewe na reki kei na marau; ena sega na sere se na kaila e na were-ni-vaini; ia na waini e nai keli-ni-waini ena sega ni sikaraki; ka'u sa muduka laivi na kena kailavaki. 11O koya oqo ena rorogo kina na ketequ me vaka na api e na vuku i Moapi, kei na lomaqu e na vuku i Kiri-ereseci. 12Ia ena yaco, ni sa rairai mai ni sa oca ko Moapi e na yasana cecere, ena qai curuma na nona bure-kalou me soro; ia ena sega ga ni yaga.
13Oqo na vosa sa cavuta eliu ko Jiova e na vuku i Moapi. 14Ia sa qai vosa ko Jiova, ka kaya, Ena sega ni oti e tolu na yabaki, me vaka na yabaki ni tamata voli, ena beci mada na lagilagi i Moapi, kei ira kecega na lewe vuqa ko ya; ia na kedra vo era na lewe lailai sara ka malumalumu ga.
Currently Selected:
AISEA 16: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
