OSEA 9
9
Era na vakararawataki ka vakabobulataki na Isireli e na vuku ni nodra i valavala ca kei na nodra dauqarava na kalou lasu, 1-17.
1Dou kakua ni marau, na Isireli, e na reki levu, me vakataki ira na veimataqali: ni dou sa la'ki dautagane ka sa laiva na nomudou Kalou, dou a vinakata na kemui sau e na rara ni sila kecega. 2A rara kei nai keli-ni-waini ena sega ni vakani ira, ia na waini vou ena sega ni yaga vei ira. 3Era na sega ni tiko e na vanua nei Jiova; era na lesu ga ki Ijipita ko ira na Ifireimi, mai Asiria talega era na kania na ka dukadukali. 4Era na sega ni livia nai sevu waini vei Jiova, ka ra na sega ni vinaka vua: a nodra i soro ena tautauvata vei ira kei na kedra madrai era ia na so mate; ko ira kece sa kana kina era na vakadukadukalitaki: ia na nodra madrai sa na kedra ga, ena sega ni kau ki na vale i Jiova.
5A cava mo dou qai cakava e na siga ni so tabu, kei na siga ni so levu i Jiova? 6Ni ra sa lako tani mai na veivakacacani: ko Ijipita, ena kumuni ira: ko Memifise, ena buluti ira: a nodra i yau siliva ka domoni, ena taukena na salato: ena tiko e na nodra vale laca na soni.
7Sa yaco mai na siga ni veicudruvi, sa yaco mai na siga ni veisausaumi; era na kila ko ira na Isireli: sa sesewa na parofita, sa kudru na tamata sa curumi, e na vuku ni levu ni nomudou caka cala, kei na veicati levu. 8O ira na Ifireimi erai vakatawa era sa tovata kaya na noqu Kalou: ia ko koya na parofita sa nonai cori na daubiri dai e na nonai valavala kecega, na vu ni veicati e na vale ni nona kalou. 9Sa ra la'ki vakavelavelataki ira vakalevu e na ca, me vaka e na gauna i Kipea: ena nanuma ko koya na nodra caka cala, ena sauma na nodra i valavala ca.
10Ni ka'u a kunei ira na Isireli era vaka na vua-ni-vaini mai veikau: ka'u a raici ira na tamamudou me vaka nai sevu ni lolo, ni sa vuavuai: sa ra yaco ki Peali-piori, ka tawasei ira ki na ka e veivakamaduataki; ka ra yaco me ra vakasisila me vaka na ka ko ya era domona. 11Ena vuka tani na nodra i ukuuku na Ifireimi me vaka na manumanu, ena sega na sucu, se na bukete, se na kunekune. 12Ni ra susuga na luvedra, ka'u na vakayali ira, me kakua na tamata e vo; io, ena ca talega ko ira, ni'u sa lako tani vei ira! 13Ko Ifireimi, me vaka ni'u a raici Taia, sa tei e na yasana vinaka; ia ko Ifireimi, era na vakasucuma na luvedra me nona na dauveivakamatei.
14Mo solia vei ira, Jiova! a cava beka mo ni solia? solia vei ira na kete dauvakalutu gone kei na sucu daudi. 15Sa vu ga na nodra ca kece mai Kilikali; ni ka'u a cati ira maikea: e na vuku ni ca ni nodra i valavala ka'u na vakasavi ira tani kina mai na noqu vale, ka'u na sega ni lomani ira tale: sa ra dauvuki tani o ira kece na nodra turaga. 16Sa yaviti ko ira na Ifireimi, sa malai na wakadra, sa na sega ni vua tale: io, ke ra vakasucuma na gone, ke'u na vakamatea na ka domoni ni ketedra. 17Ena biuti ira tani na noqu Kalou, ni ra sa sega ni vakarorogo vua: ka ra na dui veiseyaki ki na veivanua.
Currently Selected:
OSEA 9: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
