IPERIU 13
13
Sa vakavulici ira ko koya e na ka eso, a sa tinia na nonai vola, 1-25.
1Me tiko ga na veilomani vakaveitacini. 2Kakua ni guilecava na vakani ira na vulagi: ni sa so era a vakania na agilose eso ka lecava ga. 3Mo dou nanumi ira era sa vesu tu; me vaka dou sa vesu vata, kei ira talega era sa vakaloloma, me vaka dou sa vakayago talega. 4Sa kilikili kei ira na tamata kece na vakawati, kei nai mocemoce e sega ni veibutakoci: ia ko ira na daudara kei ira na dauyalewa ena lewai ira na Kalou. 5Mo dou kakua ni daukocova nai lavo: ia dou lomavinaka e na ka sa tu vei kemudou: ni sa kaya ko koya, Au na sega sara ni biuti iko, se vakalaivi iko. 6E na vuku ni ka oqo eda sa doudou kina me kaya, A noqu i vukevuke ko Jiova, ia ka'u na sega ni rere A cava na ka ena kitaka vei au na tamata? 7Dou nanumi ira era a liutaki kemudou, era a tukuna vei kemudou na vosa ni Kalou; vakadamurimuria na nodra vakabauta, ka nanuma nai otioti ni nodra i valavala. 8Sai koyakoya tikoga ko Jisu Karisito, e na siga sa oti, kei na siga edaidai, kei na veisiga emuri. 9Dou kakua ni veikauyaki e nai vakavuvuli e vuqa sa lako vakatani. Ni sa yaga me vakataudeitaki na yalo e na loloma sa soli, ia me kakua ga e na kakana, sa sega ni yaga vei ira era sa oga kina. 10Sa dua na nodai cabocabo-ni-soro, sa sega ni dodonu me kana kina ko ira sa qarava na vale tabu.
11Ni sa vakamai e nai bili ni koro na yago ni manumanu oqori, sa kauta na kedra dra ki na loqi tabu ko koya na bete levu mei soro ni valavala ca. 12O koya ga oqo sa mate kina ko Jisu e taudaku ni matamata-ni-koro, me vakasavasavataki ira na tamata e na nona dra. 13E na vuku ni ka oqo me da lako kina kivei koya ki nai bili, ka vosota vata kaya na veivakalialiai. 14Ni sa sega na noda koro eke me da tiko vakadua kina, ia eda sa vakasaqara ga e dua ena muri mai. 15Ia ko koya oqo me da qai vakacabora tikoga nai madrali ni vakavinavinaka vua na Kalou e na vukuna, oqori na vua ni tebenigusuda, ni da tusanaka na yacana. 16Kakua talega ni guilecava na caka vinaka kei na dausoli ka: ni sa vinakata sara na Kalou nai madrali vakaoqo. 17Dou talairawarawa vei ira sa liutaki kemudou, ka mo dou vakamalumalumutaki kemudou: ni ra sa yadrava na yalomudou, me vakataki ira era na tukuni ira kina, me ra kitaka kina e na marau, ka sega e na vutugu: ni sa sega ni yaga vei kemudou me vakaoqori.
18Dou masulaki keitou: ni keitou sa dinata ni sa vinaka na neitou lewa-eloma, ka keitou sa vinakata mei valavala dodonu e na ka kecega. 19Ia ka'u sa vakamamasu me caka ga na ka oqo, me'u vakatotolotaki yani kina vei kemudou.
20Ia na Kalou ni veivakacegui, o koya ka kauta tale mai na mate na noda Turaga ko Jisu, na nodra i Vakatawa levu na sipi, e na vuku ni dra sa ia kina na veiyalayalati tawa mudu, 21me vakavinakataki kemudou mada ko koya e nai valavala vinaka kecega mo dou cakava na nona lewa, ka me cakava ko koya e na lomada na ka sa vinaka vua, e na vuku i Jisu Karisito; me ia vei koya na vakarokoroko ka sega ni mudu. Emeni.
22Ia ka'u sa masuti kemudou, na veiwekani, mo dou vosota na vosa ni veivakadreti: ni'u sa vola vei kemudou nai vola, e na vosa e vica walega.
23Dou kila, sa sereki tale na wekada ko Timoci; kevaka sa tadu kusarawa mai ko koya, keirau na raici kemudou vata kaya.
24Au sa loloma yani vei ira kece sa liutaki kemudou, kei ira kecega era sa lotu. Sa loloma yani vei kemudou ko ira mai Itali. 25Me tiko vei kemudou kecega na loloma. Emeni.
Currently Selected:
IPERIU 13: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific