APAKUKI 3
3
A masu i Apakuki, 1-16. Sa dauvakararavi ko koya vua na Kalou, 17-19.
1A masu i Apakuki na parofita: a sere me vaka na Sikionoce. 2I Jiova, au a rogoca na kemuni rogorogo; ka'u a rere: I Jiova, mo ni vakabulabulataka na nomuni cakacaka e na veimama ni gauna, E na veimama ni gauna mo ni vakatakila mai; Ni kemuni sa ia na cudru, mo ni nanuma na yalololoma. 3Sa lako mai Temani na Kalou, Io ko koya sa Yalosavasava, mai na ulu-ni-vanua ko Perana. Sela. Sa ubia na mata-ni-lomalagi na nona serau, Ia sa sinai ko vuravura e na vakavinavinaka vua. 4Ia na nona lagilagi sa vaka na rarama; Ka sa cila mai na ligana: Ia sa tabonaki ga maikea na nona kaukauwa. 5Sa liutaki koya na mate dauveiveitauvi, A sa muri koya na qilaiso sa waqa tu. 6Sa tu ko koya, ka vakarauti vuravura; Sa vakararai ko koya, ka sa dui vakasevi ira na veimatanitu; A sa duibiubiuti na veiulu-ni-vanua makawa, Ka sa cuva sobu na veiulu-ni-koro ka tu mailiu: Sa tawa mudu na nona cakacaka. 7Ka'u a raica na veivale laca i Kusani ni sa rarawa sara mai; Sa yavavala nai sulu ni vanua ko Mitiani. 8Ko ni sa yalo ca li, Jiova, ki na uciwai? Ko ni sa cudru li ki na uciwai? Ko ni sa lesava li na waitui, Ko ni a vodoka kina na nomuni ose, na nomuni qiqi-ni-dauveivakabulai? 9Sa ucuni sara na nomuni dakai titi, Me vaka na vosa ni bubului vei ira na veimataqali, io na nomuni vosa. Sela. O ni a kasea na vanua me uciwai. 10Sa raici kemuni na veiulu-ni-vanua, ka sa sautaninini; Sa vuabale mai na dobui; Sa tabalaka na domona na wasa titobu, Sa dodoka ki cake na ligana. 11Na mata-ni-siga kei na vula sa tu vakadua e na nodraui tikotiko, Ni sa cila na nomuni gasau era sa lako, Ni sa serau na nomuni moto makamakalivata. 12Ko ni a lako voli yani vakacudrucudru e vuravura; Ni kemuni sa lesa, ko ni a butuqaqia na veimatanitu. 13O ni a lako yani me vakabulai ira na nomuni tamata, Me vakabulai ira ko ni a lumuta; O ni a vuetaka sara na ulu ni mataqali sai valavala ca, Ka vakarairaitaka na vuna, io, ki na vu ni domona. Sela. 14O ni a laubasikataki ira e na nona moto dina na ulu ni nona veikoro qali, Sa ra cici vakacovulaca mai me vakasevi au: Sa nodra ka ni reki me ra kani ira lo era vakararawataki. 15O ni a lako ga e na loma ni wasawasa, koi kemuni kei na nomuni ose, E nai soqosoqo ni wai levu. 16Au a rogoca, ka rise na bati ni ketequ; Ni sa rogo mai, sa yavala kina na tebenigusuqu: Sa curu ki na suiqu na vuca, ka'u a sautaninini tu e yavaqu: Ia ka'u na vakacegu ga e na siga ni rarawa, Ni sa lako cake mai ko koya vei ira na lewe ni vanua ena mai kabai ira ko koya. 17Ia ke sa sega ni seraki na lolo, Ka sega ni vua mai na veivaini, Ke sa yali na vua ni olive, Ka sa sega talega ni tubura na kakana na veiwere; Ke muduki tani mai na bai ni qele ni sipi, Ka sega na pulumokau e na loma ni bai: 18Ka'u na rekitaki Jiova ga, Ka'u na marautaki koya na Kalou, na noqu i vakabula. 19Sa vu ni noqu kaukauwa ko Jiova na Turaga, Ena cakava na yavaqu me vaka na nodra na me kila, Ia ena kauti au tale ko koya me'u lako voli e na noqu veitikina cecere. Vua na domo-ni-sere e na Nikinoca.
Currently Selected:
APAKUKI 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific