APAKUKI 2
2
Ko Apakuki, ni sa waraka tiko na vosa ni Kalou, sa vakavulici me waraka na kena vakayacori e na yalo e vakabauta, 1-4. Ena cudruvi na kai Kalitia e na vuku ni nodra daukocova na veivanua, 5-8, kei na nodra domo-ni-koco, 9-11, kei na nodra i valavala kaukauwa, 12-14, kei na kena sega ni mudu nai valu, 15-17, kei na nodra dauqarava na kalou lasu, 18-20.
1E na noqu i tutu i vakatawa ka'u na tu ga, ia ka'u na tiko ga e na dela ni bai kaukauwa, ia ka'u na vakatawa tiko me'u raica na ka ena kaya mai vei au ko koya, kei na ka me'u kaya yani ni'u sa vunauci.
2A sa kaya vei au ko Jiova, Mo vola na raivotu, me macala e na papa ni volavola, me wili drodro sara ko koya sa wilika. 3Ni na dede mada na raivotu me qai yaco na gauna sa loku, ia ni sa yaco nai otioti ni gauna, ena qai vosa, ena sega ni lasu: kevaka ena berabera, mo waraka ga; ena yaco vakaidina ga, ena sega ni berabera sara.
4Raica, o koya sa viavialevu sa sega ni dodonu na yalona e lomana: ia ko koya sa yalododonu ena bula e na nona vakabauta. 5Ia na waini talega sa ka ni dauveivakaisini, na tamata viavialevu talega sa sega ni tiko mai vale, sa vakalevutaka ga na nona domo-ni-koco me vaka nai bulubulu, io, sa vakataki mate, sa sega ni mamau rawa; ka sa vakasoqona vata me nona na veimatanitu kecega, ka sa vakasoqona vata me nona kecega na veimataqali: 6o ira kece oqo me ra sega beka ni taurivaka e dua na kena vosa vakaibalebale, io, e dua na kenai bole ni veibeci? ka kaya, Ena ca ko koya sa vakalevutaka na ka sa sega ni nona! a cava na kena dede? ka bitaki koya e nai vakadinadina! 7Ena sega li ni vakasauri na nodra tu cake ko ira era na kati iko, ka yadra mai ko ira era na tauri iko vakaukauwa, ia ko na qai yaco me nodra i toki ni valu? 8Ia ko iko, ni ko sa vakacacana na veimatanitu e vuqa, ena vakacacani iko kina ko ira kece na vo ni veimataqali; e na vuku ni kedra dra na tamata, kei nai valavala vakasausa e caka e na vanua, kei na koro, kivei ira kece talega era tiko kina.
9Ena ca ko koya sa rawata vakaca nai yau me nodra na nona mataqali, me tauyavutaka ki cake na nona sova, me maroroi kina ko koya mai na kaukauwa ni ca! 10Ko sa bosea na ka ena madua kina na nomu mataqali, ni ko sa muduka tani na veimataqali e vuqa, ka sai valavala ca me ca kina na yalomu. 11Ni na kaci na vatu mai na lalaga ni vale, ia nai vakadei mai na loma ni kau ni vale ena rogo yani kina.
12Ena ca ko koya sa vakatauyavutaka na koro e na dra, ka vakataudeitaka na koro e na caka cala! 13Raica, sa sega li ni vu vei Jiova ni lewe vuqa ni ra sa oca na veimataqali me kena na bukawaqa, ka ni ra na veivakaocataki vakataki ira na veimatanitu e na vuku ni ka wale sara? 14Ni na roboti vuravura na kena kilai na lagilagi i Jiova, me vaka sa ubia na wasa titobu na wai.
15Ena ca ko koya sa vagunuva na kai nona, io, ko iko ka sovaraka na nomu cudru, ka sa vakamatenitaki ira talega, mo raica kina na nodra luvawale! 16O sa vakamamautaki e na madua ka segai e na lagilagi; mo gunu talega ko iko me votu mai na nomu sega ni cilivi; ena vagolei sara vei iko na bilo e na liga i matau i Jiova, ia na veivakamaduataki velavela ena tabonaka na nomu lagilagi. 17Ia nai valavala vakasausa ki Lepanoni ena ubi iko, me vaka na kedra veivakacacani na manumanu sa vakadomobulataki ira, e na vuku ni kedra dra na tamata, kei nai valavala vakasausa e caka ki na vanua, kei na koro, vei ira kece talega era tiko kina.
18A cava na kena yaga na matakau ceuceu sa ceuta na kena matai; na matakau e vakawaicalataki, kei nai vakavuvuli daulasu, me sa vakararavi li na kena matai e na nona cakacaka, ni sa cakava na matakau galu?
19Ena ca ko koya ka kaya ki na kau, Mo yadra mai! Ka kaya talega ki na vatu galu, Mo tu cake! Mei vakavuvuli li na ka ko ya? Raica, sa botani e na koula kei na siliva, ia sa sega sara ga e lomana nai cegu. 20Ia ko Jiova sa tiko e na nona vale tabu: me vakadirorogo e matana ko vuravura kecega.
Currently Selected:
APAKUKI 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific