ISIKELI 44
44
A matamata-ni-koro ki cake me sa nona ga na turaga, 1-3. Sa ra vunauci na bete e na vuku ni nodra vakadukadukalitaka na vale tabu, 4-8. Sa tabu vei ira era sa qarava na kalou lasu me ia na cakacaka vakabete, 9-14. Era lesi na kawa i Setoki me ra cakava, 15,16. Nai vakaro vei ira na bete, 17-31.
1Sa qai kauti au tale ko koya ki na matamata-ni-koro ni tikina tabu e taudaku sa qaradonu ki na tu-i-cake; ka sa sogo tu. 2Sa qai kaya vei au ko Jiova; A matamata-ni-koro oqo me sogo tu ga, me kakua ni dolavi, ia me kakua e dua na tamata me curu kina; ni sa curu kina ko Jiova, na Kalou ni Isireli, o koya oqo ena sogo tu kina. 3Sa nona na turaga; io na turaga, ena tiko kina ko koya me kana madrai e na mata i Jiova; ena curu mai ko koya e na sala ni curucuru ni matamata-ni-koro ko ya, e na sala talega ko ya ena curu yani kina ki tautuba.
4Sa qai kauti au ko koya e na sala ni matamata-ni-koro ki na tokalau ki na mata ni vale tabu: ia ka'u a vakaraica, ka raica, sa curuoso na vale i Jiova e na serau i Jiova: ka'u sa qai cuva vakatoboicu. 5A sa kaya vei au ko Jiova, Ko iko na luve ni tamata, mo vakasara na lomamu, mo raica e na matamu, ka rogoca e na daligamu na ka kecega ka'u sa kaya vei iko e na vuku ni lesilesi kecega i vale i Jiova, kei na kena vunau kecega; ka vakasara na lomamu vei ira era curu mai ki na vale, kei ira kece era lako tani mai na tikina tabu. 6Ia mo kaya vei ira na dautalaidredre, io ki na mataqali i Isireli, Sa kaya vakaoqo na Turaga ko Jiova; Me kena levu oqo na nomudou i valavala vakasisila kecega, oi kemudou na mataqali i Isireli, 7ni dou a kauti ira mai na kai tani, sa sega ni cilivi na yalodra, ka sega ni cilivi na yagodra, me mai tiko e na noqu tikina tabu, me vakacacana, io na noqu vale, ni dou a vakacabora tiko na noqu madrai, kei na uro kei na dra, ka ra sa vakacacataka na noqu veiyalayalati e na vuku ni nomudou i valavala vakasisila kecega. 8Ia dou a sega ni cakava dina na cakacaka ni noqu ka tabu: ia dou a lesia na tani me ra vakaitavi e na noqu tikina tabu me kemudoui sosomi.
9Sa kaya vakaoqo na Turaga ko Jiova; Me kakua e dua na kai tani e sega ni cilivi na yalona, ka sega ni cilivi na yagona, me curuma na noqu vale tabu, io e dua vei ira na kai tani sa tiko vata kei ira na Isireli. 10Ia ko ira na Livai sa ra lako vakayawa tani vei au, ni ra sa lako sese na Isireli, ka lako sese tani vei au me ra muria na nodra matakau; ena baleti ira dina ga na nodra caka cala. 11Ia era na tiko ga e na noqu tikina tabu me ia na veiqaravi, me vakatawa na matamata-ni-koro ni vale, ka qarava na vale: era na vakamatea nai soro kama kei na nodra i soro na tamata, ka ra na tu e matadra me ra qaravi ira. 12Ka ni ra sa qaravi ira e na mata ni nodra matakau, ka vakacalai ira na mataqali i Isireli: o koya oqo ka'u sa dulaka cake kina na ligaqu vei ira, sa kaya na Turaga ko Jiova, ka na baleti ira ga na nodra caka cala. 13Ka ra na sega ni toro mai vei au, me ia vei au nai tavi vakabete, se torova e dua na noqu ka tabu, e na tikina tabu sara: ia ena kani ira ga na nodra madua, kei na nodra i valavala vakasisila era a kitaka. 14Ia ka'u na lesi ira me ra ia na cakacaka ni vale, me ra ia na kena dauveiqaravi kecega, kei na ka kece sa daucaka kina.
15Ia ko ira na bete na Livai, era kawa i Setoki, sa ra na vakaitavi tikoga e na cakacaka ni noqu tikina tabu e na gauna era lako sese tani vei au ko ira na Isireli, ko ira ga era na toro mai vei au me ra qaravi au, ka ra na mai tu e mataqu me ra vakacabora vei au na uro kei na dra, sa kaya na Turaga ko Jiova: 16io, sai ira ga era na curuma na noqu tikina tabu, ka torova na noqu tepeli, me ra qaravi au kina, a ra na vakaitavi e na noqu cakacaka. 17Ia, ni ra sa curuma na matamata-ni-koro ki na lomanibai eloma, me ra vakaisulu e nai sulu lineni ga; me ra kakua ni vakaisulu e na vutika ni sipi, ni ra ia na cakacaka e na matamata-ni-koro ni lomanibai eloma, ki loma sara talega. 18Me ra vakaisala e nai sala lineni ga; ka me ra vakatarausese lekaleka e na lineni; me ra kakua ni vauca vei ira e dua na ka era na bunobunoa kina. 19Ia ni ra curu yani ki na lomanibai ki taudaku, vei ira na tamata, me ra qai luvata tani na nodra i sulu era ia kina na nodra i tavi, ka virinoca e na veitikina tabu, ka me ra qai vakaisulu e nai sulu tani; me ra kakua ni vakatabui ira na tamata e na nodra i sulu. 20Ia me ra kakua ni tasia na uludra, ka me kakua ni balavu na drau ni uludra; ia ni ra kotiva, me ra kotiva vakavinaka. 21Me kakua talega ni gunu waini e dua na bete, ni sa curu ki na lomanibai ki loma. 22Ia me ra kakua ni veiwatini kaya e dua na yada, se dua sa veibiu kei na watina: me sa vakawati ga kei na goneyalewa ga sa kawa ni mataqali i Isireli, se dua na yada ka watina e dua na bete sa mate. 23Ia me ra vakavulici ira na noqu tamata ni sa dua tani na ka tabu ka dua tani na ka sa sega ni tabu, ka dua tani na ka sa savasava ka dua tani na ka sa sega ni savasava, me macala vei ira. 24Ia e na ka sa veiletitaki me ra tu ga mai me veilewaitaki; me ra lewa kina vakadodonu me vaka na noqu lewa dodonu: ka me ra vakabauta talega na noqu vunau kei na noqu i lesilesi sa bale ki na noqu so levu kecega; ka me ra vakatabuya na noqu siga tabu. 25Ia me ra kakua ni torova e dua na tamata sa mate me vakadukadukalitaki ira kina: ia e na vuku ni tamadra, se na tinadra, se na luvedra tagane, se na luvedra yalewa, se na tacidra, se na ganedra sa sega ni vakawati, sa tara me ra vakadukadukalitaki ira ga kina. 26Ia ni sa vakasavasavataki oti ko koya, sa na vakatabui tiko bogi vitu. 27Ia e na siga sa curu tale kina ko koya ki na tikina tabu, ki na lomanibai ki loma, me ia na nonai tavi e na tikina tabu, me qai vakacabora ko koya na nonai soro ni valavala ca, sa kaya na Turaga ko Jiova.
28Ia sa na dua na nodra i votavota: koi au na nodra i votavota: dou kakua ni solia vei ira e dua nai votavota vanua e Isireli: koi au ga na nodra i votavota. 29Era na kania nai madrali laukana, kei nai soro ni valavala ca, kei nai soro ni caka cala; kei na ka kece sa vakacabori me nei Jiova e Isireli ena nodra ga. 30Ia me nodra talega na bete na vetana kece ni sevu kece kei na ka kecega, kei nai madrali kece ni vuata kece e na nomudou i madrali kecega: kei na veta ni nomudou madrai droka kece mo dou solia ga vua na bete, me vatonaka ko koya na nomu vale me vakalougatataki kina. 31Me ra kakua ni kania ko ira na bete e dua na ka sa mate walega, se dresulaki, se manumanu vuka, se manumanu ni vanua.
Currently Selected:
ISIKELI 44: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
