ISIKELI 43
43
Sa lesu tale mai ki na vale tabu na serau ni Kalou, 1-6. A vu ni nona sega ni tiko dei kina na Kalou na nodra i valavala ca na Isireli, 7-9. Sa vakaroti ira ko Isikeli me ra veivutuni, ka muria na vunau sa baleta na vale, 10-12. A kenai vakarau, 13-17, kei na ka sa lesi me caka e nai cabocabo-ni-soro, 18-27.
1Sa qai kauti au ko koya ki na matamata-ni-koro, io na matamata-ni-koro sa qaradonu ki na tu-i-cake: 2ka raica, na serau ni Kalou ni Isireli sa lako mai e na sala mai na tu-i-cake: ia na domona sa vaka na domo ni wai levu: ia sa cilavi vuravura na nona serau. 3A sa rairai tautauvata kei na raivotu ka'u a raica, io me tautauvata kei na raivotu ka'u a raica ni'u a lako mai me vakarusa na koro: ia na raivotu oqo sa tautauvata kei na raivotu ka'u a raica mai na uciwai ko Kipa; ia ka'u sa cuva vakatoboicu.
4Ia na serau i Jiova sa curuma na vale mai na sala ni matamata-ni-koro sa qaradonu ki na tu-i-cake. 5A sa tuberi au cake na yalo, ka kauti au ki loma ni bai eloma; ka raica, sa curuoso na serau i Jiova e na loma ni vale. 6Au a qai rogoci koya sa vosa vei au mai na loma ni vale; ia sa dua na tamata keirau sa tu vata kaya. 7A sa kaya vei au ko koya, Ko iko na luve ni tamata, oqo na tikina ni noqu i tikotiko, kei nai tutu ni qeteqete ni yavaqu, ka'u na tiko kina e na kedra maliwa na Isireli ka sega ni mudu, a ra na sega ni vakacacana tale na mataqali i Isireli na yacaqu tabu, ko ira, se na nodra tui, e na nodra dauyalewa, se na yagodra mate na nodra tui, e na nodra veiyasana cecere. 8Ni ra viritaka vata na nodra i lago kei na noqu i lago, kei na nodra duru ni sogo kei na noqu duru ni sogo, ia na lalaga ga ka tu e na keimami maliwa, ka ra sa vakacacana na yacaqu tabu e nai valavala vakasisila era sa kitaka: ka'u a vakarusai ira kina e na noqu cudru. 9Ia me ra biuta tani mada na nodra dauyalewa, kei na yago mate ni nodra tui, me yawa vei au, ka'u na qai tiko vata kei ira ka sega ni mudu. 10O iko na luve ni tamata, mo vakatakila na vale ki na mataqali i Isireli me ra maduataka na nodra caka cala: ia me ra vakarauta na kenai vakarau. 11Ia kevaka era sa maduataka na ka kece era sa cakava, mo qai vakatakila vei ira na kenai vakarau ni vale, kei na kenai valavala, kei na kenai curucuru ki tuba, kei na kenai curucuru ki loma, kei na kenai vakarau kecega, kei na kenai lesilesi kecega kei na kenai vakarau kecega, kei na kena vunau kecega; ka vola e matadra, me ra vakabauta taucoko na kenai vakarau, kei na kenai lesilesi kecega, ka cakava ga.
12Oqo na vunau ni vale e dela ni ulu-ni-vanua, Sa tabu sara na kenai yalayala kecega e na veitikina kecega. Raica, sai koya oqo na vunau sa baleta na vale.
13Ka sa vakaoqo na kenai vakarau ni cabocabo-ni-soro e na kiupiti. Ia na kena kiupiti e dua sa kiupiti e dua ka dua na tikina; ia na botona me rua na kiupiti na kena cecere, ka dua na kiupiti na kena raraba, kei nai yalayala ni bati ni botona me dua na afa kiupiti: ia me vakaoqo na boto ni cabocabo-ni-soro. 14Ia mai na botona e na qele ka yala ki na kena rara lailai me rua na kiupiti, ka afa kiupiti na kena raraba; ia mai na kena rara lailai ki na kena rara levu me va na kiupiti, ka dua na kiupiti na kena raraba. 15Ia na delana dina sa na va na kiupiti; ia me vu mai na tutuna ka yaco ki cake e va na tutuna sa balavu cake e nai cabocabo-ni-soro. 16Ia nai cabocabo-ni-soro me tinikarua na kiupiti na kena balavu, ka tinikarua na kiupiti na kena raraba, me takiveilevu na kena veiyasana vava. 17Ia na kena rara me tinikava na kiupiti na kena balavu, ka tinikava na kiupiti na kena raraba e na kena veiyasana vava; ia na belena e volita me dua na afa kiupiti; ia na rara e botona me dua na kiupiti e na veiyasana; ia na kenai kabakaba me qaradonu ga ki na tu-i-cake.
18A sa kaya vei au ko koya, Ko iko na luve ni tamata, sa kaya vakaoqo na Turaga ko Jiova; Me vakaoqo nai valavala ni cabocabo-ni-soro e na siga era na cakava, me ra vakacabora kina nai soro kama, ka kureitaka ki delana na dra. 19Ia sa kaya na Turaga ko Jiova mo solia vei ira na bete ko ira na Livai era kawa i Setoki, era dautorovi au, me ra ia na cakacaka vei au, e dua na luve ni pulumokau mei soro ni valavala ca. 20Ia mo kauta eso na kena dra, ka boroya kina na tutuna balavu cake vava, kei na muana vava ni rara, kei na kenai yalayala e na veiyasana: ia mo sa vakasavasavataka ka sorovaka. 21Mo kauta talega na pulumokau sa kenai soro ni valavala ca, ia ena vakama ko koya e na kena tikina dodonu ni vale mai taudaku ni vale tabu. 22Ia e nai karua ni siga mo vakacabora e dua na luve ni me e sega na kena ca mei soro ni valavala ca; ka ra na vakasavasavataka nai cabocabo-ni-soro, me vaka era sa vakasavasavataka e na pulumokau. 23Ia ni sa oti na nomu vakasavasavataka, mo qai cabora e dua na luve ni pulumokau sa sega na kena ca, kei na dua na sipi tagane mai na qele ni sipi, e dua sa sega na kena ca; 24mo mani vakacabora e na mata i Jiova, ia ko ira na bete me ra kureitaka eso na masima ki na yagodrau, ka qai vakacabora vei Jiova mei soro kama. 25Me bogi vitu mo cakava tiko e na veisiga e dua na me me kenai soro ni valavala ca: e dua na luve ni pulumokau, ka dua na sipi tagane mai na qele ni sipi, sa sega na kena ca, ka cakava vaka talega kina. 26Me bogi vitu me ra sorovaka tiko nai cabocabo-ni-soro, ka vakasavasavataka, ka vakatabui ira. 27Ia ni sa oti na veibogi ko ya, ka yaco nai kawalu ni siga, me ra qai vakacabora tiko na bete e nai cabocabo-ni-soro na nomudou i soro kama kei na nomudou i soro ni veivinakati; ia ka'u na vinakati kemudou, sa kaya na Turaga ko Jiova.
Currently Selected:
ISIKELI 43: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
