ISIKELI 39
39
Sa na cudruvaki ira na Isireli na Kalou vei Koki kei Mekoki, 1-20. Ena kilai kina na Kalou e na vuku ni nona lewa dodonu, 21-24. Ena lomani ira tale na Isireli na Kalou, 25-29.
1O koya oqo, ko iko na luve ni tamata, mo parofisaitaka na ca vei Koki, ka vaka, Sa kaya vakaoqo na Turaga ko Jiova; Raica, koi au na nomu meca, ko iko Koki, na nodra turaga levu na Meseki kei na Tupali; 2ia ka'u na vakalesui iko ki muri, ka vakalaiva yani na kenai kaono ga vei kemudou, ka vakavuna na nomu lako cake mai na yasayasa vakatokalau, ka kauti iko mai ki na veiulu-ni-vanua ni Isireli: 3ia ka'u na yavita tani na nomu dakai mai na ligamu i mawi, ia ka'u na vakalutuma tani na nomu gasau mai na ligamu i matau. 4Dou na bale e na veiulu-ni-vanua ni Isireli ko iko, kei na nomu i valu kecega, kei na veimataqali era tiko kei iko: ka'u na soli iko ki na manumanu dauveikata kecega sa vuka voli, kei na manumanu ni vanua, mo laukana. 5Ko na bale e dela ni vanua: koi au ka'u sa cavuta, sa kaya na Turaga ko Jiova.
6Ia ka'u na vakayacora na bukawaqa ki Mekoki, vei ira talega era sa tiko vakacegu wale e na veiyanuyanu: ka ra na kila ni sai au ko Jiova. 7Ia na yacaqu tabu ka'u na vakatakila e na kedra maliwa na noqu tamata na Isireli; au na sega talega ni laiva me vakacacani tale na yacaqu tabu: ka ra na kila na veimatanitu tani ni sai au ko Jiova na Yalosavasava sa tiko e Isireli. 8Raica, sa yaco mai, io sa caka, sa kaya na Turaga ko Jiova; sa kena siga oqo ka'u a vosa oti kina.
9A ra na lako yani ko ira sa tiko e na veikoro vaka-Isireli, ka ra na vakacaudreva ka vakama nai yaragi ni valu, nai sasabai kei nai vakaruru, na dakai titi kei na gasau, kei nai ula, kei na moto, ka ra na vakama e na bukawaqa ka yabaki vitu: 10ka ra na sega kina ni ca buka mai na were, se taya mai veikau; nai yaragi ni valu ga ena nomudou buka: ka ra na tokitaka na tamata ka tokitaki ira eliu, ka butakoca na tamata ka butakoci ira eliu, sa kaya na Turaga ko Jiova.
11Ia e na siga ko ya, ka'u na solia vei Koki e dua na nona tikina mai Isireli mei bulubulu, io na nodra buca na daulako tu e na bati ni waitui vaka ki na tu-i-cake: ka ra na sega ni lako rawa kina ko ira era lako voli yani: ia era na buluti Koki maikea kei na nonai soqosoqo levu: ka ra na vakatoka na buca ko ya ko Emoni-koki. 12Ia ko ira na mataqali i Isireli era na buluti ira tiko ka vula vitu, me ra vakasavasavataka na vanua. 13Ka ra na oga e na veibulu ko ira kece na lewe ni vanua; ia era na rogo kina e na siga ka'u na vakarokorokotaki kina, sa kaya na Turaga ko Jiova. 14Ia ni sa oti e vitu na vula era na qai lesia eso na tamata daucakacaka, me ra lako voli tikoga e na vanua me ra veivuke kei ira era lako voli yani me buluta na yagodra sa no e dela ni vanua, me vakasavasavataki kina na vanua. 15Ia ni ra lako voli tu ko ira oqo, ka raica e dua na sui ni tamata, me ra qai cakava kina e dua nai vakatakilakila, me ra buluta mada ko ira na dauveibulu e na buca i Emoni-koki. 16Ia ena yacana talega na koro ko Emona. Era na vakasavasavataka vakaoqo na vanua. 17Ia ko iko, na luve ni tamata, sa kaya vakaoqo na Turaga ko Jiova, Mo kaya ki na manumanu vuka kecega, kei na manumanu kecega ni vanua, Dou soqoni vata, ka lako mai; dou soqoni vata mai na veiyasana kecega ki na noqu i madrali ka'u sa vakacabora me kemudou, io nai madrali levu e na veiulu-ni-vanua ni Isireli, mo dou kana lewe ni tamata, ka gunu dra. 18Na lewe ni tamata qaqa dou na kania, kei na kedra dra na turaga kei vuravura dou na gunuva, na sipi tagane, kei na lami, kei na me, kei na pulumokau, era manumanu uro ni Pasani kecega. 19Ia dou na kana uro mo dou mamau kina, ka gunu dra mo dou mateni kina, e na noqu i madrali ka'u sa vakacabora me kemudou. 20Ia dou na vakamamautaki mai na noqu tepeli e na ose, kei na qiqi-ni-valu, kei na tamata qaqa, kei na tamata i valu kecega, sa kaya na Turaga ko Jiova.
21Ia sa na qai vue kina na noqu i totoka e na veimatanitu tani, ka ra na raica kece na veimatanitu tani na noqu lewa dodonu ka'u sa cakava, kei na noqu tarai ira e na liga ni noqu cudru. 22Era na qai kila ko ira na mataqali i Isireli ni sai au ko Jiova na nodra Kalou mai na siga ko ya ka ia tiko ki muri. 23A ra na kila ko ira na veimatanitu tani ni ra sa vakabobulataki ko ira na mataqali i Isireli e na vuku ni nodra caka cala: ka ni ra sa talaidredre vei au ka'u a tabonaka kina na mataqu vei ira, ka soli ira yani ki na liga ni nodra meca, ka ra sa bale kece kina e nai seleiwau. 24Me vaka na nodra sega ni yalosavasava kei na nodra talaidredre ka'u a cakacaka vakakina vei ira, ka tabonaka vei ira na mataqu.
25O koya oqo sa kaya kina na Turaga ko Jiova; Au na qai kauti ira tale mai oqo na Jekope era vakabobulataki, ka'u na yalololoma vei ira kece na mataqali i Isireli, ka'u na lomakatakata e na vuku ni yacaqu tabu; 26ni ra sa vakamaduataki oti, ka cudruvi e na vuku ni nodra talaidredre kecega era a cala kina vei au, ni ra a tiko vinaka e na nodra vanua, ka sega e dua me vakarerei ira. 27Ni'u na kauti ira tale maivei ira na veimataqali, ka vakasoqoni ira mai na veivanua ni nodra meca, ka vakarokorokotaki vei ira e na matadra na veimatanitu e vuqa; 28era na qai kila ni sai au ko Jiova na nodra Kalou, ka'u a vakauti ira tani vakabobula ki na veimatanitu tani: ia ka'u sa qai vakasoqoni ira mai ki na nodra vanua, ka sega ni vakalaiva tale yani e dua vei ira. 29Au na sega talega ni tabonaka tale na mataqu vei ira: ni'u sa sovaraka na Yaloqu ki na mataqali i Isireli, sa kaya na Turaga ko Jiova.
Currently Selected:
ISIKELI 39: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
