ISIKELI 38
38
A mataivalu i Koki, 1-6, kei na nona vere ca sa vakavotui mai, 7-13. Ena cudruvi koya na Kalou, 14-23.
1A sa yaco vei au na vosa i Jiova, ka vaka, 2Ko iko na luve ni tamata, mo vaqara na matamu ki Koki, na vanua nei Mekoki, na nodra turaga na Meseki kei Tupali, ka parofisaitaka na ca ena yaco vei ira, 3ka mo vaka, Sa kaya vakaoqo na Turaga ko Jiova; Raica, koi au na nomu meca, ko iko Koki, ka nodra turaga na Rosi kei na Meseki, kei na Tupali: 4ia ka'u na vakalesui iko ki muri, ka vakacoba na siwa ki na gusumu, ka kauti iko mai, kei na nomu i valu kecega, na ose kei na tamata e vodo ose, era dui vakaisulu kecega e nai sulu ni valu, e dua nai vavakoso levu, era taura kecega nai sasabai kei nai vakaruru kei nai seleiwau: 5ko ira vata kei Perisia, kei Iciopea, kei Lipea; era vakaisasabai ka vakaivakaruru-ni-ulu kecega: 6ko Komera, kei na nona mataivalu kecega; na mataqali i Tokama mai na mata ni tokalau, kei na nona mataivalu kecega: sa na le vuqa na veimataqali ena tiko kei iko.
7Mo vakarau, ia dou vakarautaki, ko iko, kei ira na nomu i soqosoqo kecega era sa soqoni vata vei iko, ia ko iko, mo nodra i vakatawa. 8Sa vuqa mada na bogi, ko na qai cudruvi: ni sa oti na veiyabaki, ko na qai lako mai ki na vanua sa kau mai nai seleiwau, ka vakasoqoni mai na veimataqali e vuqa, io ki na veiulu-ni-vanua i Isireli, ka daulala tu ga: ka sa qai kau tale mai na veimatanitu, ka ra na tiko vinaka vata ko ira kecega. 9Ko na cabe mai me vaka na cava, ko na lako cake mai me vaka na o, mo dou ubia na vanua, ko iko, kei na nomu mataivalu kecega, ia koi kemudou vata kei na veimataqali e vuqa.
10Sa kaya vakaoqo na Turaga ko Jiova; Io, e na gauna dina ko ya ena qai tubu e lomamu eso na ka, ko na vakananuma talega e dua na nanuma ca: 11ia ko na kaya, Au na lako cake yani ki na vanua sa tiko kina na veikoro e sega ni vakabai; au na lako vei ira sa ra tiko vakacegu, sa ra tiko vinaka, sa ra tiko wale kecega ka sega na nodra bai, sa sega talega na nodra i vakadei se nai sogo; 12me'u ia na veitokitaki kei na veivakayanaki; mo vagolea kina na ligamu ki na veiyasana lala sa tawa tale, io vei ira na lewe ni vanua sa ra vakasoqoni mai na veimatanitu, sa ra vakamanumanu ka vakaiyau, ka ra sa tiko e na loma ni vanua. 13Ko ira mai Sipa, kei Titana, kei ira na dauveivoli mai Tasisi, kei ira kece na kena luve ni laioni, era na kaya vei iko, Ko sa lako mai, mo ia na veitokitaki, ne? ko sa vakasoqoni ira li na nomu i soqosoqo mo ia na veivakayanaki? mo taura na siliva kei na koula, mo kauta tani na manumanu kei nai yau, me ia na veitokitaki levu, ne?
14O koya oqo mo ia kina na parofisai, ko iko na luve ni tamata, ka kaya vei Koki, Sa kaya vakaoqo na Turaga ko Jiova: E na siga ko ya ni ra qai tiko vinaka na noqu tamata na Isireli, ko na sega beka ni kila, ne? 15Ia ko na qai lako mai na nomu yasana mai na yasayasa vakatokalau, koi kemudou vata kei ira na lewe vuqa, era vodo ose kece, nai vavakoso levu, kei nai valu kaukauwa: 16ia ko na cabe vakaivalu cake mai ki vei ira na noqu tamata na Isireli, me vaka na o me ubia na vanua; ena yaco e na gauna maimuri, ka'u na qai kauti iko mai ki na noqu vanua, me ra kilai au na veimatanitu tani, ni'u sa vakarokorokotaki vei iko, Koki, e matadra.
17Sa kaya vakaoqo na Turaga ko Jiova; Sai iko li ka'u a vosa kina eliu e na gusudra na noqu tamata na parofita ni Isireli, sa ra parofisai e na gauna ko ya me vuqa mada na yabaki ka'u na qai kauti iko mai vei ira? 18Ia sa kaya na Turaga ko Jiova ena yaco e na gauna talega ko ya ni sa lako vakaivalu mai ko Koki ki na vanua ko Isireli, ni na qai rairai e mataqu na noqu cudru. 19Ia e na noqu vuvu, kei na noqu cudru waqawaqa, ka'u sa kaya, E dina, e na siga ko ya ena dua kina na yavavala levu e na vanua ko Isireli; 20ia ena yavavala e mataqu na ika ni waitui, kei manumanu vuka, kei na manumanu ni vanua, kei na ka kecega sa qasi voli e na qele, kei na tamata kecega sa tiko e dela i vuravura, ena talaraki sobu talega na veiulu-ni-vanua, ka lutu mai na uluvatu, ia na bai kecega ena bale ki na soso. 21Ia ka'u na kaciva mai na kenai seleiwau e na noqu veiulu-ni-vanua kecega, sa kaya na Turaga ko Jiova: era na dui vala na tamata yadua kei na kai nona. 22Ia ka'u na ia na veilewai kaya e na mate dauveiveitauvi kei na dra; na uca taubi talega, kei na uca-cevata lelevu, na bukawaqa, kei na sulifure, ka'u na vakatauca vua kei na nonai valu, kei na veimataqali e vuqa era tiko kaya.
23Ia ka'u na vakalevulevui au, ka vakarokorokotaki au, ni'u sa vakatakilai e matadra na veimatanitu e vuqa, ka ra na kila ni sai au ko Jiova.
Currently Selected:
ISIKELI 38: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
