NA DAUVUNAU 4
4
Sa ca na tamata e na vuku ni valavala kaukauwa, 1-3; kei na vuvu, 4-6; kei na kocokoco, 7,8; kei na tiko duaduaga, 9-12; kei na yalokaukauwa, 13-16.
1Ia ka'u a qai lesu tale, ka kunea na veivakasaurarataki kece sa caka e ruku ni mata-ni-siga: ka raica, sa vakawai na matadra era sa vakasaurarataki, ka sa sega e vakacegui ira; ia sa tu vei ira na dauveivakasaurarataki na kaukauwa; ia ka sa sega e vakacegui ira. 2O koya oqo ka'u a vakacaucautaki ira vakalevu kina na mate era sa mate yani, ka vakalailai na bula era bula tiko. 3Ia sa ca ruarua koi rau oqo ka vinaka ko koya sa sega ni sucu mai, ko koya ka sega ni raica na cakacaka ca sa ia e ruku ni mata-ni-siga.
4Au a nanuma tale na oca kecega, kei na cakacaka dodonu kecega; ni sai koya oqo sa vuvutaki kina e dua na tamata maivua na kai nona. Oqo talega na ka wale ka sa ka ni oca wale ki na yalo. 5A yalolialia sa roqoveinu na ligana, ka kania na lewena. 6Sa vinaka ni tawa tu e dua bau na liga ni sa tu vata kei na vakacegu, ka ca ni sa tawa tu na liga ruarua ka tu vata kei na oca kei na yalorarawa.
7Ia ka'u a qai lesu tale ka kunea na ka walega e ruku ni mata-ni-siga. 8Sa dua na tamata sa tiko duaduaga, ka sega na kenai karua; io, sa sega na luvena se na tacina: ka sa sega ni mudu na nona oga kecega; ka sa sega ga ni mamau na matana e nai yau; ka sa sega ni kaya, E na vuku beka i cei ka'u sa oca kina, ka vakatabuya na ka vinaka ki na yaloqu? Oqo talega na ka wale, io, sa dua na oca ca. 9Sa vinaka ni lewe rua ka ca ni le dua bauga; ni rau sa rawata nai voli vinaka ni nodrau cakacaka. 10Kevaka sa bale e dua, ena tubera cake na kenai sa: ia ena ca vua sa tiko duadua ni sa bale; ni sa sega e dua tale me tuberi koya cake. 11Oqo talega, kevaka sa koto vata e lewe rua, erau na katakata: ia ke le dua ga, ena katakata vakaevei ko koya? 12Ia kevaka e dua na tamata sa gumatua vua e dua tani, ke rau sa lewe rua erau na vorata rawa; ia na dali e turai-tolu ena sega ni cavuka rawarawa.
13Sa vinaka na cauravou sa dravudravua ka vuku, ka ca na tui sa qase ka yalolialia, ka sa bese ni vunauci tale: 14Ni sa curu mai na vale ni veivesu ko koya me buli me lewa; io sa sucu dravudravua ko koya e na nona matanitu. 15Au a vakananumi ira kece na bula era lako voli e ruku ni mata-ni-siga, kei koya nai karua ni gone turaga sa rau veitaravi: 16Sa sega ni wili rawa na tamata kece, io ko ira kece ra sa tiko eliu: ia ko ira era sa muri mai era na sega ni vinakati koya tiko. E dina na ka talega oqo sa ka wale ka sa ka ni oca ga ki na yalo.
Currently Selected:
NA DAUVUNAU 4: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
