NAI VAKARUA 34
34
Sa raici Kenani ko Mosese mai na ulu-ni-vanua, 1-4. Sa ciba maikina, 5-8. Sa mai kenai sosomi ko Josua, 9. A parofita levu ko Mosese, 10-12.
1A sa lako cake ko Mosese mai na vanua cecelevu mai Moapi ki na ulu-ni-vanua ko Nipo, ki na dela i Pisika, sa donui Jeriko. A sa vakaraitaka vua ko Jiova na vanua taucoko ko Kiliati, ka yacovi Tani, 2kei Nafitalai taucoko, kei na vanua nei Ifireimi, kei Manasa, kei na vanua taucoko nei Juta, ka yacova na waitui mai ra, 3kei na vanua ki na ceva, kei na cecelevu mai na buca mai Jeriko, na koro ni balabala, ka yacovi Soa. 4A sa kaya vua ko Jiova, Oqori na vanua ka'u a bubului kina vei Eparaama, kei Aisake, kei Jekope, ka kaya, Au na solia vei ira na nomu kawa: au sa vakaraitaka e matamu, ia ko na sega ga ni lako yani kina.
5A sa mate maikea ko Mosese nai talatala i Jiova e na vanua ko Moapi, me vaka na vosa i Jiova. 6A sa buluti koya ko koya e na buca e na vanua ko Moapi, sa donui Peci-piori: ia sa sega na tamata sa kila na nonai bulubulu ka yacova na siga oqo. 7Sa dua na drau ka ruasagavulu na yabaki i Mosese ni sa mate: sa sega ni buawa mai na matana, ka sa sega ni malumu sobu na nona kaukauwa. 8A ra sa tagicaki Mosese ko ira na Isireli mai na vanua cecelevu ni Moapi ka bogi tolusagavulu: sa qai oti na bogi era tagi kina ni ra yasovaki Mosese.
9Ia ko Josua na luve i Nuni sa sinai e na yalo vuku; ni sa tabaki koya oti e na ligana ko Mosese: a ra sa vakarorogo vua na Isireli, ka kitaka na ka sa vakarota vei Mosese ko Jiova.
10A sa sega ni tubu emuri e Isireli e dua na parofita me tautauvata kei Mosese, o koya sa veirai mata kaya ko Jiova, 11e nai vakatakilakila kecega kei na cakacaka mana, sa talai koya kina ko Jiova me cakava e na vanua ko Ijipita kivei Fero, vei ira kecega na nona tamata, kei na nona vanua taucoko, 12e na ligana kaukauwa, kei na vakadomobulataki levu sa cakacaka kina ko Mosese e matadra kecega na Isireli.
Currently Selected:
NAI VAKARUA 34: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
