NAI VAKARUA 33
33
Sa vosavakalougatataki ira na veimataqali ni Isireli ko Mosese, ni sa voleka na nona mate.
1Ia oqo na vosa ni veivakalougatataki sa vosavakalougatataki ira kina na Isireli ko Mosese, na tamata ni Kalou, ni sa voleka ni mate. 2A sa kaya: Sa lako mai Saineai ko Jiova, Ka tu cake mai Sia e na vukudra; Sa serau mai ko koya mai na ulu-ni-vanua ko Perana, A sa lako mai na kedra maliwa na le oba era sa savasava: Sa lako mai na ligana i matau e dua na bukawaqa, me vakavulici ira: 3Ia sa lomani ira na lewe ni veivanua ko koya: Era tiko e ligamuni na nona tamata yalosavasava kecega; A ra sa tiko sobu mai na yavamuni; Era na rawata yadua na nomuni vosa. 4Sa vakarota vei keda na vunau ko Mosese, Me ra taukena ko ira nai soqosoqo ni Jekope. 5Ia sa tui ko koya vei Jesuruni, Ni ra sa soqoni vata ko ira sa turaga vei ira na tamata, Ko ira vata na veiyavusa ni Isireli. 6Me bula ko Rupeni, ka sega ni mate, Ia me ra lewe lailai na nona tamata. 7Ia oqo e na vuku i Juta: a sa kaya ko koya, Rogoca, kemuni Jiova, na domo i Juta, Ka kauti koya vei ira na kai nona: Me rauti koya na ligana; Ia mo ni vukei koya me rawai ira na nona meca. 8A sa kaya ko koya e na vuku i Livai, Sa tiko na nomuni Cumimi kei na nomuni Urimi, kei koya na nomuni le dua yalosavasava, O koya ko ni a vakatovolea mai Masa, O koya ko ni a veivala kaya mai na wai ni Meripa, 9O koya ka kaya e na vuku i tamana kei tinana, Au sa sega ni raici koya; Sa sega talega ni kilai ira na tuakana se na tacina, Se kilai ira na luvena: Ni ra sa nanuma na nomuni vosa, Ka vakabauta na nomuni veiyalayalati kei ira. 10Era na vakavulica na nomuni lewa vei ira na Jekope, Kei na nomuni vunau kivei ira na Isireli: Era na viritura e matamuni na ka boi vinaka me vakamai, Kei nai soro e kama taucoko e dela ni nomuni cabocabo-ni-soro. 11Mo ni vakalougatataka, Jiova, na nonai yau, Ka donuya na cakacaka ni ligana: Mo ni yavita basika na tolodra era tu cake vakaivalu vei koya, Kei na nodra era cati koya, me ra kakua ni tu cake tale. 12E na vuku i Penijamini sa kaya ko koya, O ira sa lomana ko Jiova ena tiko vakacegu voleka vei koya; Ena vakarurugi koya e na siga kecega ka bogi ko koya, Ena tiko talega e na maliwa ni nona veibaba. 13Ia e na vuku i Josefa sa kaya ko koya, Ena vakalougatataka na nona vanua ko Jiova, E na ka talei mai lomalagi, e na tegu, Kei na yasana titobu sa koto e ra, 14Kei na ka talei sa vakayacora na mata-ni-siga, Kei na ka talei sa vakatubura na vula, 15Kei na ka vinaka sara mai na veiulu-ni-vanua makawa, Kei na ka talei mai na veivanua cecere tawa mudu, 16Kei na ka talei mai na vanua kei na ka sa sinai kina, Kei na yalololoma i Koya ka tiko e loma ni kau: Me tauca na ulu i Josefa, Kei na buradelana i koya sa tawase maivei ira na veitacini. 17Sa nona na kaukauwa ni ulumatua ni pulumokau, Ka sa vaka nai leu ni iunikoni na nonai leu: Ena biliraki ira kina na veimatanitu kecega ki nai yalayala ni vanua: Ia ko ira oqo na oba ni Ifireimi, Kei ira oqo na oba ni Manasa. 18Ia e na vuku i Sepuloni sa kaya ko koya, Mo ni reki, na Sepuloni, e na nomuni daulako yani; Kei na Isakari, e na nomuni veivale laca. 19Era na kacivi ira na tamata ki na ulu-ni-vanua; Era na vakacabora maikea nai soro donu: Ni ra na gunuva nai yau ni wasawasa, Kei nai yau sa vuni tu e na nuku. 20Ia e na vuku i Kata sa kaya ko koya, Sa kalougata ko koya sa vakalevutaki Kata: Sa tiko ko koya me vaka na laioni, A sa dresulaka na liga kei na qavokavoka. 21Sa vakarautaka nai lutua me kena, Ni sa maroroi nai votavota kei koya sa lewa; A sa lako mai kei ira na turaga ni tamata, Sa kitaka ko koya na cakacaka e dodonu vei Jiova, Kei na nona lewa vei ira na Isireli. 22Ia e na vuku i Tani sa kaya ko koya, Sa luve ni laioni ko Tani: Sa rika mai Pasani. 23Ia e na vuku i Nafitalai sa kaya ko koya, I Nafitalai ko sa vakamamautaki e na loloma Ka sinai e na veivakalougatataki i Jiova: Mo kenai taukei mai ra mai na ceva talega. 24Ia e na vuku i Aseri sa kaya ko koya, Me kalougata ko Aseri ni sa vakaluveni; Me vinakati ko koya vei ira na wekana, Ka me tonidromuca na yavana e na waiwai. 25Sa na aironi kei na parasa na nomuni samugakagaka; Ia ena rauta na nomuni siga na nomuni kaukauwa. 26I Jesuruni, sa sega e tautauvata kei na Kalou, Sa vodo lako e dela ni lomalagi me vukei kemuni, Kei na o e nonai ukuuku vakaturaga. 27Sai drodro na Kalou e tawa tubu ka tawa mudu. A sa vueti kemuni na ligana tawa mudu: Ia sa vakasava tani na meca mai na matamuni ko koya; Ka sa kaya, Mo ni vakarusa. 28Sa qai tiko duadua vakacegu na Isireli: Ena raica na vanua ni sila kei na waini na matadra na Jekope; Ena miri talega mai na nona lomalagi na tegu. 29O ni sa kalougata, na Isireli: O cei sa tautauvata kei kemuni, a matanitu sa vakabula ko Jiova, O koya nai sasabai me vukei kemuni, Kei nai seleiwau ko ni sa vakaiukuuku kina! Era na vakamalumalumu vei kemuni ko ira na nomuni meca; Ia ko ni na butuka na nodra veiyasana cecere.
Currently Selected:
NAI VAKARUA 33: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
