NAI VAKARUA 25
25
A lawa sa bale ki na tamata sa vakanakuitataki, 1-3; kei na buturaki sila, 4: kei na watina na veitacini, 5-10; kei na yalewa sa kitaka na ka e veivakamaduataki, 11,12; kei nai vakarau ni veivoli, 13-16. Me kawaboko ko ira na Amalekaiti, 17-19.
1Kevaka sa dua na ka era veiletitaka na tamata, a ra sa lako mai kivei ira na mataveilewai, me veilewaitaki; me ra qai vakadonui koya sa dodonu, ka vakacalai koya sa cala. 2Ia kevaka sa dodonu me vakanakuitataki na tamata ca, me qai lewa na mataveilewai me davo, ka me vakanakuitataki e matana, me vaka na nona cala, ka me wili na kena tau na kuita. 3E tara me tau vakavasagavulu na kena kuita, me kakua ni toro cake: de vaka na ka vakasisila e matamuni na wekamuni, ni sa toro cake, me vuqa na kena tau na kuita.
4Mo ni kakua ni vauca na gusu ni pulumokau, ni sa buturaki sila.
5Kevaka era tiko vata na veitacini, ka sa mate e dua vei ira, ka sa sega na luvena tagane, me kakua ni veiwatini kaya na tamata tani na nona yada; me watina ga na tuakai i koya sa mate, se na tacina, ia ko koya ena vakayacora vua nai tavi ni tuakana se tacina na mate: 6ia na ulumatua sa sucu vei rau, sa na kenai sosomi i koya sa mate vei ira na veitacini, me kakua kina ni bokoci na yacana vei ira na Isireli. 7Ia kevaka sa sega ni via veiwatini kei na yada nei tuakana se tacina na tamata ko ya, me qai lako ki na matamata-ni-koro na yada nei tuakana se tacina vei ira na qase, ka kaya, O koya erau a veitacini kei na watiqu, sa bese ni vakatubura e Isireli na yaca i koya erau a veitacini kaya: sa bese ko koya ni vakayacora nai tavi ni tacina na mate se na tuakana. 8Era na qai kacivi koya ko ira na qase ni nona koro, ka vosa vua: ia kevaka sa yalodei ko koya, ka kaya, Au sa sega ni vinakata me'u veiwatini kaya; 9me qai torovi koya na yada nei tuakana se tacina e na matadra na qase, ka luvata nai vava mai na yavana, ka kasivita na matana, ka kaya, Me caka vakaoqo vua na tagane sa bese ni tara na vale nei koya erau a veitacini kaya. 10Ia ena vakatokai na yacana e Isireli, A nona vale sa luva na nonai vava.
11Ni rau sa veivala e le rua na tagane, a sa toro mai na watina e dua me vakabula na watina mai na ligana sa yaviti koya, ka na dodoka na ligana ka taura na nona ka vakatagane: 12ko ni na qai muduka na ligana; me kakua ni lomani koya na matamuni.
13Me kakua ni tiko e nomuni taga e rua nai vakarau ni bibi erau duidui, na ka levu kei na ka lailai: 14Me kakua e nomuni vale e rua nai vakarau ni ka mamaca erau duidui, na ka levu kei na ka lailai: 15Me dina ka dodonu na nomuni vakarau ni bibi; me dina ka dodonu na nomuni vakarau ni ka mamaca: me balavu kina na nomuni bula e na vanua sa solia vei kemuni ko Jiova na nomuni Kalou. 16Ni ra ka vakasisila vei Jiova na nomuni Kalou ko ira kecega era kitaka na ka vakaoqo, ko ira kece era sega ni caka dodonu.
17Mo ni nanuma na ka sa kitaka vei kemuni ko ira na Amalekaiti e na sala, ni kemuni sa lako tani mai Ijipita; 18ni ra sa tavaki kemuni e na sala, ka mokuti ira na kai nomuni era lako emuri, ko ira kece na nomuni malumalumu era muri, ni kemuni a malumalumu ka ceguoca; a ra sa sega ni rerevaka na Kalou ko ira. 19Ia ni sa vakacegui kemuni ko Jiova na nomuni Kalou maivei ira kecega na nomuni meca era vakavolivoliti kemuni, e na vanua sa solia vei kemuni ko Jiova na nomuni Kalou mei votavota mo ni taukena, kemuni na qai vakawabokotaki ira na Amalekaiti me kakua na kedrai vakananumi e ruku i lomalagi; mo ni kakua ni guilecava.
Currently Selected:
NAI VAKARUA 25: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
