NAI VAKARUA 24
24
A lawa ni veibiu ni veiwatini, 1-4. Me kua ni lako e nai valu na tamata sa qai vakawati, 5. Ai vakarawarawa ni ka sa kerei, 6,10-13. Na tamata sa butakoca na tamata, 7. E na vuku ni vukavuka, 8,9. Me soli sara nai voli ni cakacaka ni tamata, 14,15. E na vuku ni lewa dodonu, 17,18. E na vuku ni loloma, 19-22.
1Ni sa vakawati kei na dua na yalewa na tagane, ka sa qai sega ni lomana, ni sa kunea vua e dua na ka sa sega ni savasava kina: me qai vola e dua nai vola ni veibiu, ka solia ki na ligana, ka vakatalai koya tani e nona vale. 2Ia ni sa lako tani e nona vale, sa tara vua me la'ki veiwatini kei na tamata tani. 3Ia kevaka sa cati koya na watina emuri, ka vola e dua nai vola ni veibiu, ka solia ki na ligana, ka vakatalai koya tani e nona vale; se sa mate na watina emuri, o koya ka taura me watina; 4sa tabu vua na watina eliu, o koya ka talai koya yani, me taura tale me watina, ni sa vakatawasavasavataki oti; ni sa ka vakasisila oqo e na mata i Jiova: ia mo ni kakua ni vakavuna me ca na vanua, sa solia vei kemuni ko Jiova na nomuni Kalou mo ni taukena.
5Ni sa qai vakawati vou e dua na tagane, me kakua ni lako yani ki nai valu ko koya, me kakua talega ni lesi ki na dua na cakacaka: me tiko lalaga ga mai nona vale ka yabaki dua, ka vakamarautaka na watina sa qai taura ko koya.
6Me kakua ni taurivaki na vatu ni qaqi sila sa toka e cake se toka era me kenai vakadinadina ni ka: ni sa taurivaki kina na kenai vakadinadina ni ka sa bula kina na tamata.
7Kevaka sa kune na tamata ni sa butakoca e dua vei ira na wekana na Isireli me nona bobula, se me volitaka; ena qai mate na tamata butako ko ya; ia ko ni na vakaotia kina na ca mai na kemuni maliwa.
8Mo ni qarauni kemuni e na vuku ni mate ca na vukavuka, mo ni nanuma vinaka ka mo kitaka na ka kecega era sa vakavulica vei kemuni ko ira na bete na Livai; ni nanuma mo ni cakava na ka ka'u a vakarota vei ira. 9Mo ni nanuma na ka sa cakava ko Jiova na nomuni Kalou vei Miriama e na sala ni kemuni a lako tani mai Ijipita.
10Ni kemuni sa solia me talevaki e dua na ka vua na kai nomuni, mo ni kakua ni curuma na nona vale mo kauta mai vua nai vakadinadina ni ka sa soli me talevaki. 11Mo ni tu ga e tautuba, ia na tamata ko ni sa solia vua na ka me talevaki, ena kauta vei kemuni ki tautuba nai vakadinadina ni ka sa soli me talevaki: 12Ia kevaka sa dravudravua na tamata ko ya, mo kakua ni vakabogi vei iko na nonai vakadinadina ni ka sa soli me talevaki: 13mo ni solia dina vua nai vakadinadina ni ka sa soli me talevaki, ni sa dromu na mata-ni-siga, me moce rawa ko koya e nonai tutuvi, ka me vosavakalougatataki kemuni kina: ia ena wili oqo me nomuni cakacaka dodonu e na mata i Jiova na nomuni Kalou.
14Mo ni kakua ni vakasaurarataka na tamata sa voli na nona cakacaka sa vakaloloma ka dravudravua, se sa dua vei ira na wekamuni, se dua vei ira na nomuni vulagi sa tiko e nomuni vanua e na nomuni lomanibai: 15mo ni solia nai voli ni nona cakacaka e na kena siga, me kakua ni dromu mada na matanisiga; ni sa dravudravua ko koya, a sa gadreva: de tagicaki kemuni ko koya vei Jiova, ia kemuni sa cala kina.
16Me ra kakua ni vakamatei na qase e na vukudra na gone, me ra kakua talega ni vakamatei na gone e na vukudra na qase: ena vakamatei na tamata yadua e na vuku ni nonai valavala ca.
17Mo ni kakua ni kauta vakatani na lewa vua na vulagi, se ko ira sa sega na tamadra; se kauta na nonai sulu na yada me kenai vakadinadina ni ka: 18ia mo ni nanuma ga ni kemuni a bobula mai Ijipita, a sa vakabulai kemuni maikina ko Jiova na nomuni Kalou: o koya ka'u sa vakaroti kemuni kina mo ni kitaka na ka oqo.
19Ni kemuni sa tamusuka na nomuni sila e na nomuni veiwere, ka sa guilecava e dua nai vau sila e na were, mo ni kakua ni lakova tale: me nona ga na vulagi, kei ira sa sega na tamadra, kei na yada: me vakalougatataki kemuni kina ko Jiova na nomuni Kalou e na cakacaka kecega ni ligamuni. 20Ni kemuni sa samuta na nomuni vu ni olive, mo ni kakua ni qara tale e na tabana: me nona ga na vulagi, kei ira sa sega na tamadra, kei na yada. 21Ni kemuni sa tauca na vua ni nomuni veivaivaini, mo ni kakua ni lako tale mo ni vakasaqaqara: me nona ga na vulagi, kei ira sa sega na tamadra, kei na yada. 22Ia ko ni na nanuma ni kemuni a bobula mai na vanua ko Ijipita: o koya ka'u sa vakaroti kemuni kina mo ni kitaka na ka oqo.
Currently Selected:
NAI VAKARUA 24: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
