NAI VAKARUA 14
14
Me ra kakua ni vakacacana na yagodra, 1,2. A ka sa tara kei na ka sa tabu ni kani, 3-27. E dua na ka ni loloma vei ira na dravudravua, 28,29.
1Oi kemuni sa luve i Jiova na nomuni Kalou: mo ni kakua ni tavai kemuni, se tasia na yadremuni, e na vukudra na mate. 2Ni kemuni sa matanitu savasava vei Jiova na nomuni Kalou, a sa digitaki kemuni ko Jiova maivei ira na matanitu kecega sa tiko e dela i vuravura, mo ni nona matanitu talei.
3Mo ni kakua ni kania e dua na ka sa vakasisila. 4Oqo na manumanu e yavai va mo ni kania: na pulumokau, na sipi kei na me, 5na ati, na kaseli, na ropuki, na me kila, na paisoni, na anitilope, kei na samoi. 6Kei na manumanu e yavai va kecega sa wase na kena ququ, ka sa sei sara me wase rua, ka sa mama vakarua na kena, mo ni kania oqo vei ira na manumanu e yavai va. 7Ia ko ira oqo vei ira sa mama vakarua na kena, kei ira sa wase na kena ququ, dou kakua ni kania; na kameli, kei na eri, kei na koni: ka ni ra sa mama vakarua na kedra, ka sa sega ni wase na kedra ququ; era sa tabu vei kemuni. 8Kei na vuaka, ni sa wase na kena ququ, ka sa sega ni mama vakarua na kena, sa tabu vei kemuni: mo ni kakua ni kania na lewedra, mo ni kakua talega ni tara na yagodra ni sa mate.
9Na ika oqo e tara mo ni kania: na ika kecega sa vakatutuna ka vakavarina mo ni kania. 10Ia na ika kecega sa sega ni vakatutuna ka sega ni vakavarina mo ni kakua ni kania; sa tabu vei kemuni.
11A manumanu vuka kecega sa savasava mo ni kania. 12Ia na manumanu oqo mo ni kakua ni kania: na mataqali ikeli e tolu, 13kei na veimataqali vulituri, 14kei na mataqali reveni kecega, 15kei na ositereji, kei na mataqali lulu kecega, kei na manulevu, 16io na lulu tabu, kei na lulu tani, 17kei na veimataqali suani, 18kei na veimataqali belo, kei na upupa, kei na beka.
19Ia na manumanu vuka kecega sa dauqasi sa tawa savasava vei kemuni: e tabu ni ra sa kani. 20Na manumanu vuka kecega sa savasava e tara mo ni kania.
21E tabu ni kemuni kania e dua na ka sa mate loa: mo ni solia vua na vulagi sa tiko e nomuni lomanibai, me kania ko koya; se mo ni volitaka vua na kai tani: ni kemuni sa matanitu savasava vei Jiova na nomuni Kalou. Mo ni kakua ni vakasaqa na luve ni me e na wai-ni-sucu i tinana.
22Mo ni solia vakaidina na kenai katini ni vua ni nomuni teitei kecega, sa vuataka na veiwere e na veiyabaki. 23Ia mo ni kania nai katini ni nomuni sila, na nomuni waini, kei na nomuni waiwai, kei na ulumatua ni nomuni pulumokau kei na nomuni sipi, e na mata i Jiova na nomuni Kalou, e na yasana sa digitaka ko koya me vakatikora kina na yacana; mo ni vakavulici kina mo rerevaki Jiova tikoga na nomuni Kalou.
24Ia kevaka sa balavu vei kemuni na sala, sa dredre kina mo ni kauta, ni sa yawa vei kemuni na yasana sa digitaka ko Jiova na nomuni Kalou me vakatikora kina na yacana, ni sa vakalougatataki kemuni ko Jiova na nomuni Kalou: 25mo ni qai volitaka me kenai sau nai lavo, ka vauca nai lavo e na ligamuni, ka lako ki na yasana sa digitaka ko Jiova na nomuni Kalou: 26mo ni qai solia nai lavo ko ya me rawa kina na ka kecega sa garova na yalomuni, se na pulumokau, se na sipi, se na waini, se na yaqona kaukauwa, se na ka tani kecega sa garova na yalomuni: ia mo ni kana maikea e na mata i Jiova na nomuni Kalou, ka reki, koi kemuni, kei ira na nomuni lewe-ni-vale; 27ia na Livai sa tiko e nomuni lomanibai, mo ni kakua ni biuta; ni sa sega na nona tikina se nonai votavota vata kei kemuni.
28Ni sa cava na yabaki e tolu mo ni kauta mai nai katini ni nomuni vuata kecega e na yabaki ko ya, ka binia e nomuni lomanibai: 29ia na Livai, ni sa sega na nona tikina se nonai votavota vata kei kemuni, kei na kai tani, kei ira sa sega ni vakatamani, kei na yada, sa tiko e nomuni lomanibai, me ra lako ga mai, ka kana ka mamau: me vakalougatataki kemuni kina ko Jiova na nomuni Kalou e na cakacaka kecega ko ni sa kitaka.
Currently Selected:
NAI VAKARUA 14: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
