NAI VAKARUA 13
13
Ai vakaro sa baleta na parofita vakailasu, 1-11. Me vakarusai na koro sa vuki me qarava na kalou lasu, 12-18.
1Kevaka sa tubu vei kemuni e dua na parofita se na dautadra, a sa cakava vei kemuni e dua nai vakatakilakila se dua na cakacaka mana, 2a sa yaco nai vakatakilakila se na cakacaka mana, sa vosa kina ko koya vei kemuni, ni sa kaya, Tou la'ki muria na kalou tani, ko ni sa sega ni kila, ka qaravi ira; 3mo ni kakua ni vakarorogo ki na vosa ni parofita ko ya, se na dautadra ko ya: ni sa vakatovolei kemuni kina ko Jiova na nomuni Kalou, me kila se ko ni na lomani Jiova na nomuni Kalou e na lomamuni taucoko kei na yalomuni taucoko, se segai. 4Mo ni muri Jiova ga na nomuni Kalou, ka rerevaki koya, ka vakabauta na nona vunau, ka vakarorogo ki na domona, ka qaravi koya, ka kabiti koya. 5Ia na parofita ko ya, se na dautadra ko ya, ena vakamatei; ni sa kaya mo ni vuki tani maivei Jiova na nomuni Kalou, o koya sa kauti kemuni mai na vanua ko Ijipita, ka vakabulai kemuni mai na vale ni veivakabobulataki; ka me vakasesei kemuni tani mai na sala sa vakarota vei kemuni ko Jiova na nomuni Kalou mo ni lako kina. Ko ni na vakaotia laivi kina na ca mai na kemuni maliwa.
6Kevaka sa temaki kemuni vakavuni na tuakamuni se na tacimuni, na luvena tagane na tinamuni, se na luvemuni tagane, se na luvemuni yalewa, se na watimuni e na lomaseremuni, se na wekamuni sa vaka na yalomuni, ka kaya, Daru la'ki qarava na kalou tani eso; ko sa sega ni kila, koi kemuni, se na nomuni qase: 7io ko ira na nodra kalou na tamata era tiko vakavolivoliti kemuni, se ra voleka vei kemuni, se yawa vei kemuni, mai nai yalayala e dua kei vuravura ka yacova nai yalayala kadua kei vuravura; 8mo ni kakua ni yalovata kaya, se vakarorogo vua; me kakua talega ni lomani koya na matamuni, mo ni kakua talega ni vosoti koya, mo ni kakua talega ni vunitaki koya: 9ia mo ni vakamatei koya vakaidina ga; me yaviti koya taumada na ligamuni me mate kina, ia me qai yavita emuri na ligadra na tamata kecega. 10Ia mo ni vakaviriki koya e na vatu, me mate kina ko koya, ni sa segata me vakasesei kemuni tani maivei Jiova na nomuni Kalou, o koya ka kauti kemuni mai na vanua ko Ijipita, mai na vale ni veivakabobulataki. 11Ena qai rogoca ko ira na Isireli kecega, ka rere, ka sega ni cakava tale na ka ca vakaoqo e na kemuni maliwa.
12Kevaka ko ni na rogoca e na dua na nomuni koro, sa solia vei kemuni ko Jiova na nomuni Kalou mo ni tiko kina, ka vaka, 13Eso na tamata, na luve ni ca, era sa lako tani maivei kemuni, a sa vakasesei ira tani na lewe ni nodra koro, ni ra kaya, Tou lako me da qarava na kalou tani eso kemuni sa sega ni kila; 14mo ni qai taroga, ka vakasaqara, ka qaqa; ia kevaka sa dina, sa vakadinadinataki ni sa caka na ka vakasisila oqo e na kemuni maliwa; 15mo ni qai yavita vakaidina na lewe ni koro ko ya e nai seleiwau me rusa sara, kei na ka kecega sa tiko kina, kei na kena manumanu e yavai va, e nai seleiwau. 16Ia na kenai toki kecega, mo ni kumuna vata ki loma ni rara, ka vakama na koro e na bukawaqa, kei na kenai toki kecega, me kama yavu sara, e na vuku i Jiova na nomuni Kalou: ia ena sega ni tara tale; ena suva wale tu ka tawa mudu. 17Ia me kakua ni kabita na ligamuni e dua na ka sa lesi me vakarusai: me cegu kina ko Jiova mai na nona cudru waqawaqa, ka me caka vinaka vei kemuni, ka lomani kemuni, ka vakalewevuqataki kemuni, me vaka sa bubului kina vei ira na nomuni qase; 18ni kemuni sa vakarorogo ki na domo i Jiova na nomuni Kalou, me vakabauta na nonai vakaro kecega ka'u sa vakarota vei kemuni edaidai, mo ni caka dodonu e na mata i Jiova na nomuni Kalou.
Currently Selected:
NAI VAKARUA 13: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
