2 VEIGAUNA 36
36
Sa tui Juta ko Jioaasi, kei Jioiakimi, kei Jioiakini, kei Setekaia, 1-13. Sa vakarusai ko Jerusalemi, ni sa levu na nodra i valavala ca na bete, kei ira na tamata, 14-21. Sa tukuna ko Koresi me tara tale na vale ni soro mai Jerusalemi, 22-23.
1Era sa qai kauti Jioaasi na luve i Josaia ko ira na lewe ni vanua, ka buli koya me tui, mei sosomi kei tamana mai Jerusalemi. 2Sa yabaki ruasagavulu ka tolu ko Jioaasi ni sa buli me tui, ka sa lewa mai Jerusalemi ka vula tolu. 3A sa vakasivoi koya mai Jerusalemi ko koya na tui Ijipita, a sa lewa me totogi na vanua me dua na drau na taledi siliva ka dua na taledi koula: 4ka sa buli Elaiakimi na tacina na tui Ijipita, me tui Juta kei Jerusalemi, ka vakatoka na yacana me Jioiakimi. A sa tauri Jioaasi na tuakana ko Niko, ka kauta ki Ijipita.
5Sa yabaki ruasagavulu ka lima ko Jioiakimi ni sa buli me tui, a sa lewa mai Jerusalemi ka yabaki tinikadua: ka sa caka ca ko koya e na mata i Jiova na nona Kalou. 6A sa lako cake mai ko Nepukanesa na tui Papiloni, me vala kaya, ka sa vesuka e na sinucodo, me kauta ki Papiloni. 7Sa kauta talega ki Papiloni ko Nepukanesa eso nai yaya ni vale i Jiova, ka virinoca e na nona bure kalou mai Papiloni.
8Ia na kena vo ni cakacaka i Jioiakimi, kei na nonai valavala vakasisila ka cakava ko koya, kei na ka sa kune vua, raica, sa volai e na kedrai vola na tui Isireli kei Juta: a sa lewa ko Jioiakini na luvena, me kenai sosomi.
9Sa yabaki walu ko Jioiakini ni sa buli me tui, ka sa lewa mai Jerusalemi ka vula tolu ka bogi tini: ka sa caka ca ko koya e na mata i Jiova. 10Ia ni sa oti na yabaki ko ya, sa talaki ko Nepukanesa na tui, ka kauti koya ki Papiloni, kei nai yaya talei mai na vale i Jiova, ka buli Setekaia na tamana lailai me tui Juta kei Jerusalemi.
11Sa yabaki ruasagavulu ka dua ko Setekaia ni sa buli me tui, ka sa lewa mai Jerusalemi ka yabaki tinikadua. 12A sa caka ca ko koya e na mata i Jiova na nona Kalou; sa sega ni vakamalumalumutaki koya e na mata i Jeremaia na parofita, ni sa vosa vua mai na gusu i Jiova. 13A sa vuki tani talega vei Nepukanesa na tui, o koya ka vakabubuluitaki koya ka me cavuta na Kalou: a sa vakadomoqataki koya ga, ka vakaukauwataka na lomana me kakua kina ni saumaki kivei Jiova na nodra Kalou na Isireli.
14Ka ra sa caka cala vakalevu ko ira kecega sa liu vei ira na bete, kei ira na tamata, me vaka nai valavala vakasisila ni veimatanitu tani; a ra sa vakavelavelataka na vale i Jiova ka vakatabuya ko koya mai Jerusalemi. 15A sa talai ira na nonai talatala kivei ira ko Jiova na Kalou ni nodra qase, sa sou e na mataka, ka talai ira; ni sa yalololoma ko koya vei ira na nona tamata, kei na yasana sa dautiko kina ko koya. 16Ia era a vakalialiai ira nai talatala ni Kalou, ka beca na nona vosa, ka vakacacani ira na nona parofita, ka sa tubu kina na cudru i Jiova vei ira na nona tamata, ka sa dredre me ra vakabulai.
17E na vuku ni ka oqo, sa kauta mai vei ira ko koya na nodra tui na kai Kalitia, o koya ka vakamatea e nai seleiwau na nodra cauravou e na nodra vale tabu, ka sega ni lomana na cauravou se na goneyalewa, na tagane qase se koya sa roko lako ni sa qase sara: sa soli ira kecega ki na ligana. 18Kei nai yaya kecega ni vale ni Kalou, na ka lelevu kei na ka lalai, kei nai yau ni vale i Jiova, kei na nonai yau na tui, kei na nodra talega na nona tamata turaga; sa kauta kecega ki Papiloni. 19A ra sa visa na vale ni Kalou, ka talaraka sobu na bai kei Jerusalemi, ka visa na kena veivale vakaturaga kecega e na bukawaqa, ka vakacacataka na kenai yaya vinaka kecega. 20Ia ko ira era a bula mai nai seleiwau, sa kauta yani ko koya ki Papiloni; ka ra sa bobula vei koya, ka vei ira na luvena, ka yacova na gauna sa lewa kina na matanitu ko Perisia: 21me vakayacora na vosa i Jiova e na gusu i Jeremaia, me rekitaka mada na vanua na kena gauna ni vakacecegu: ka ni sa biu tu sa qai vakacegu tiko, ka me cava mada na yabaki e vitusagavulu.
22Ia e na kenai matai ni yabaki i Sairusi na tui Perisia, me vakayacori kina na vosa i Jiova e na gusu i Jeremaia, sa vakauqeta na yalo i Sairusi na tui Perisia ko Jiova, me kacivaki yani e na veiyasana kecega ni nona matanitu, ka sa vola talega ko koya ka vaka, 23Sa vosa vakaoqo ko Sairusi na tui Perisia, Sa solia oti vei au ko Jiova na Kalou ni lomalagi na veimatanitu kecega e vuravura; a sa vakaroti au me'u tara e dua na nona vale mai Jerusalemi, mai Juta. O koya yadua vei ira kecega na nona tamata, sa tiko vata kei kemudou me tiko kaya ko Jiova na nona Kalou, ka me lako cake ko koya.
Currently Selected:
2 VEIGAUNA 36: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
