2 VEIGAUNA 35
35
Sa ia na kana vata ni lako-sivia ko Josaia, 1-19. Sa vala ko koya kei na tui Ijipita, a sa mate kina, 20-27.
1Sa cakava talega na kana vata ni lako sivia vei Jiova ko Josaia e Jerusalemi: ka ra sa vakamatea na lami ni lako-sivia e na kenai katinikava ni siga e nai matai ni vula. 2Ka sa lesi ira na bete ki na nodra i tavi, ka vagumatuataki ira e na cakacaka ni vale i Jiova. 3Ka sa kaya vei ira na Livai era sa vakatavulici ira kecega na Isireli, era sa tabu me nei Jiova, Dou vakacuruma na kato tabu ki na vale sa tara ko Solomoni na luve i Tevita na tui Isireli; ena sega ni vakaocataka tiko na tabamudou: oqo mo dou qaravi Jiova na nomudou Kalou, kei ira na nona tamata na Isireli, 4ka vakarau e na veimataqali ni nomudou qase, me vaka na nomudou i tavi, me vaka nai vola i Tevita na tui Isireli, ka vaka nai vola i Solomoni na luvena. 5Ia dou tu e na tikina tabu, me vaka na kenai wasewase ni nodra veimataqali na nodra qase na wekamudou ko ira na tamata, kei nai wasewase ni nodra veimataqali na Livai. 6Dou vakamatea vakakina na lami ni lako-sivia, ka vakasavasavataki kemudou, ka vakarautaki ira na wekamudou, me ra cakava me vaka na vosa i Jiova e na gusu i Mosese.
7Ka sa solia ko Josaia kivei ira na tamata mai na qele ni sipi, eso na luve ni sipi ka so na luve ni me, me yaga kecega e na kana vata ni lako-sivia, me rauti ira kecega era sa tiko kina, a kenai wiliwili sa le tolusagavulu na udolu, ka tolu na udolu na pulumokau: oqo mai na nonai yau na tui. 8A ra sa solia vakayalovinaka ko ira na nona tamata turaga kivei ira na tamata, kei ira na bete, kei ira na Livai: ia ko Ilikaia, kei Sakaraia, kei Jieli, o iratou ka lewa e na vale ni Kalou, eratou solia kivei ira na bete, me yaga e na kana vata ni lako-sivia, e rua na udolu ka ono na drau na sipi, ka tolu na drau na pulumokau. 9Sa solia talega ko Konenaia, kei Semaia, kei Nicaneli, ko ira na wekana, kei Esapaia, kei Jieli, kei Josapati, na nodra turaga na Livai, kivei ira na Livai, me yaga e na kana vata ni lako-sivia, e lima na udolu na sipi, ka lima na drau na pulumokau.
10Ka sa vakarautaki na cakacaka, a ra sa tu ko ira na bete e na nodra tikina, kei ira na Livai e na nodra i tavi, me vaka na nona vosa na tui. 11Ka ra sa vakamatea na lami ni lako-sivia, ka kureitaka na dra ko ira na bete mai na ligadra, ka vocia ko ira na Livai. 12A ra sa kauta tani nai soro kama, me ra vota me tautauvata kei nai wasewase ni nodra mataqali yadua na tamata, me ra vakacabora vei Jiova, me vaka sa volai e nai vola i Mosese. Ka vakakina na pulumokau. 13Ka ra sa tavuna na lami ni lako sivia e na bukawaqa, me vaka na kenai valavala: ia na kena ka tabu era sa vakasaqa e na kuro, kei na kuro lelevu, kei na tavuteke, a ra sa vota vakatotolo vei ira kecega na tamata.
14Sa oti, era sa vakarautaka na kedra, kei na kedratou na bete: ka ni ra sa vakacabora tiko nai soro kama kei na uro ka bogicaka, ko iratou na bete na luve i Eroni; e na vuku ni ka oqo, sa vakarautaka na kedra ko ira na Livai, kei na kedratou na bete na luve i Eroni. 15A sa tiko ko ira na dausere, na luve i Esafa, e na nodra tikina, me vaka na vosa i Tevita, kei Esafa, kei Imani, kei Jitucuni, na nona rairai na tui, ka sa tiko nai vakatawa e na veimatamata-ni-koro; era sega ni biuta na nodra i tavi; ni sa vakarautaka na kedra ko ira na wekadra na Livai. 16Sa vakarautaki na cakacaka kecega i Jiova e na siga ko ya, me ia na kana vata ni lako-sivia, ka me vakacabora nai soro kama e dela ni cabocabo-ni-soro i Jiova, me vaka na vosa i Josaia na tui. 17Ka ra sa ia na kana vata ni lako-sivia e na gauna ko ya ko ira na Isireli era tiko kina, kei na kana madrai sa sega ni vakaleveni, ka bogi vitu.
18Ka sa sega e dua na kana vata ni lako-sivia sa caka e Isireli me tautauvata kaya mai na gauna i Samuela na parofita; ka sa sega e dua vei ira kecega na tui Isireli e cakava e dua na kana vata ni lako-sivia sa tautauvata kei na kena ka cakava ko Josaia, kei ira na bete, kei ira na Livai, kei ira kecega na Juta kei ira na Isireli era tiko kina, kei ira na kai Jerusalemi. 19Sa caka na kana vata ni lako-sivia oqo e nai katinikawalu ni yabaki ni lewa i Josaia.
20Sa oti na ka kecega oqo, ni sa vakarautaka oti na vale ni soro ko Josaia, sa cabe mai ko Niko na tui Ijipita me kabai Kakimisi e na bati ni Uferetisi: ka sa lako yani ko Josaia me vala kaya. 21A sa vakatadu mata vua ko koya, ka kaya, A cava beka me'u vala kina kei iko, na tui Juta? sa sega na ka me'u vala kina kei iko e na siga edaidai, ki na mataqali ga au sa veivala tiko kaya: ni sa vosa vei au na Kalou me'u vakusakusa: mo kakua ni vorata na Kalou, o koya sa tiko vata kei au, me kua ni vakarusai iko ko koya. 22Ia sa bese ga ko Josaia ni suka tani mai vua, ka sa liatamata tani ko koya, me rau veivala kaya, ka sega ni vakarorogo ki na vosa i Niko mai na gusu ni Kalou, a sa lako ga mai me vala e na buca ko Mikito. 23Sa ra qai vanai Josaia na tui ko ira na dauvanavana; ka sa kaya na tui vei ira era qaravi koya, Dou kauti au tani, ni'u sa vuetaki vakaca. 24A ra sa kauti koya ko ira na nona tamata mai na qiqi-ni-valu ko ya, ka vakavodoki koya ki nai karua ni qiqi-ni-valu sa tiko vei koya; ka kauti koya ki Jerusalemi, ka sa ciba ko koya, ka sa bulu e na dua nai bulubulu ni nona qase. A ra sa tagicaki Josaia ko ira kecega na Juta kei Jerusalemi. 25Ka sa lelevaki Josaia ko Jeremaia: ka ra sa tagilagalagataki Josaia ko ira kecega na tagane dausere kei ira na yalewa dausere e na nodra lele, ka yacova na siga oqo; a ra vakarota me cavu tiko e Isireli: ka raica, sa volai e nai lele.
26Ia na kena vo ni cakacaka i Josaia, kei na nonai valavala vinaka, me vaka sa volai e na vunau i Jiova, 27kei na nona cakacaka, a kenai vakatekivu, kei na kenai otioti, raica, sa volai e na kedrai vola na tui Isireli kei Juta.
Currently Selected:
2 VEIGAUNA 35: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
