2 VEIGAUNA 12
12
Sai valavala ca ko Riopoami, a sa yaco kina nai valu ki Jerusalemi: sa qai veivutuni ko Riopoami kei ira na tamata, era sa sega kina ni vakarusai.
1Ia ni sa vakataudeitaka na matanitu ko Riopoami, ka vakaukauwataki koya, sa biuta na vunau i Jiova ko koya, kei ira vata kaya na Isireli kecega.
2Ia e na kenai kalima ni yabaki i Riopoami na tui, sa la'ki vala ki Jerusalemi ko Sisaki na tui Ijipita, ni ra a talaidredre vei Jiova, 3a sa lako vata kaya e tinikarua na drau na qiqi-ni-valu, ka le ono na oba na tamata dauvodo ose: a sa sega ni wili rawa ko ira na tamata era sa lako vata kaya mai Ijipita: ko ira na kai Lipea, ko ira na Sukiyi, kei ira na kai Iciopea. 4A sa rawa na veikoro vakabai sa nei Juta, ka lako ki Jerusalemi.
5Sa qai lako ko Semaia na parofita kivei Riopoami, kei ira na turaga ni Juta, era sa soqoni vata ki Jerusalemi e na vuku i Sisaki, a sa kaya vei ira, Sa vosa vakaoqo ko Jiova, Dou sa biuti au, ia ka'u sa biuti kemudou kina ki na liga i Sisaki. 6A ra sa qai vakamalumalumutaki ira, ko ira na turaga ni Isireli kei na tui; a ra sa kaya, Sa yalododonu ko Jiova.
7Ia ni sa raica ko Jiova ni ra sa vakamalumalumutaki ira, sa qai yaco mai na vosa i Jiova kivei Semaia, ka kaya, Era sa vakamalumalumutaki ira; au na sega ni vakarusai ira, ia ka'u na vakabulai ira malua; ena sega talega ni sovaraki ki Jerusalemi na noqu cudru e na liga i Sisaki. 8Ia era na nona bobula; me ra kila kina na kenai valavala ni qaravi au, kei na kenai valavala ni qaravi ira na veimatanitu ni veivanua.
9A sa lako mai ko Sisaki na tui Ijipita me kabai Jerusalemi, ka tokitaka nai yau ni vale i Jiova, kei nai yau ni nona vale na tui; sa kauta kecega: sa kauta tani talega nai sasabai koula ka cakava ko Solomoni. 10A sa vakaisosomitaka ko Riopoami na tui e nai sasabai parasa, ka solia vei ira na nodra turaga nai vakatawa era sa vakatawa na katuba ni nona vale na tui. 11Ia ni sa la'ki curu na tui ki na vale i Jiova, sa lakova nai sasabai ko ira nai vakatawa, ka kauta tale ki na vale ni vakatawa. 12Ia ni sa vakamalumalumutaki koya, sa suka tani maivua na cudru i Jiova, a sa sega kina ni vakarusai koya sara: ia sa kune talega eso na ka vinaka e Juta.
13A sa vakaukauwataki koya ko Riopoami na tui e Jerusalemi, ka sa lewa tiko: sa vasagavulu ka dua na yabaki i Riopoami ni sa buli me tui, a sa lewa mai Jerusalemi ka yabaki tinikavitu, na koro ka digitaka ko Jiova mai na nodra veimataqali kecega na Isireli, me vakatikora kina na yacana. Ia na yaca i tinana ko Neema, na yalewa i Amoni. 14Ka sai valavala ca ga ko koya, ni sa sega ni vagolea na yalona me qaravi Jiova.
15Ia na cakacaka i Riopoami, a kenai vakatekivu, kei na kenai otioti, sa sega li ni volai e nai vola sa baleta na veitabatamata erau vola ko Semaia na parofita, kei Ito na rairai? A sa sega ni mudu na nodrau veivala ko Riopoami kei Jeropoami. 16A sa moce vata kei ira na nona qase ko Riopoami, a sa bulu e na koro i Tevita: a sa buli me tui ko Apaija na luvena, me kenai sosomi.
Currently Selected:
2 VEIGAUNA 12: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
