2 VEIGAUNA 11
11
Sa vakaukauwataka na nona matanitu ko Riopoami.
1Ia ni sa yaco ki Jerusalemi ko Riopoami, sa vakasoqona vata ko koya, maivei ira na mataqali i Juta kei Penijamini, e le tinikawalu na oba na tamata digitaki era dauia nai valu, me la'ki veivala kei ira na Isireli, me vakalesuya tale na matanitu kivei Riopoami. 2A sa yaco mai na vosa i Jiova vei Semaia na tamata ni Kalou, ka kaya, 3Mo vosa vei Riopoami, na luve i Solomoni, na tui Juta, kei ira kecega na Isireli mai Juta kei Penijamini, ka kaya, 4Sa vosa vakaoqo ko Jiova, Dou kakua ni lako cake, se veivala kei ira na wekamudou; dou lesu yani na tamata yadua ki na nona vale; ni sai au ga na vu ni ka oqo. A ra sa vakarorogo ki na vosa i Jiova, ka lesu me ra kua ni la'ki vala kei Jeropoami.
5A sa tiko mai Jerusalemi ko Riopoami, a sa tara eso na koro ni valu mai Juta. 6A sa tarai Pecileema ko koya, kei Etami, kei Tikoa, 7kei Peci-suri, kei Soko, kei Etulama, 8kei Kaca, kei Maresa, kei Sifi, 9kei Etorayimi, kei Lakisi, kei Aseka, 10kei Sora, kei Eijaloni, kei Epironi, sa veikoro vakabai ka sa tu mai Juta kei Penijamini. 11A sa vakaukauwataka ko koya na veikoro ni valu, a sa lesia kina eso na kapiteni ni valu, ka sa binia kina na kakana, kei na waiwai, kei na waini: 12ka sa vakauta ki na koro yadua nai sasabai kei na moto, ka vakaukauwataka sara. Ka sa totaki koya ko Juta kei Penijamini.
13A sa lako yani vei koya mai na nodra veiyasana kecega ko ira na bete kei ira na Livai era sa tiko e Isireli taucoko. 14Ni ra a biuta na nodra vanua veico kei na nodra i votavota ko ira na Livai, ka lako ki Juta kei Jerusalemi: ni sa vakasivoi ira ko Jeropoami kei iratou na luvena, me ra kakua ni bete vei Jiova: 15ka sa lesia e so na nona bete ki na veitikina cecere, kei na me tagane, kei rau na luve ni pulumokau ka cakava ko koya. 16A sa muri ira, mai na nodra veimataqali kecega na Isireli, ko ira sa vagolea na lomadra me ra vakasaqarai Jiova na nodra Kalou na Isireli, era sa lako mai ki Jerusalemi, me ra vakacaboi soro vei Jiova na Kalou ni nodra qase. 17A ra sa vakaukauwataka na matanitu i Juta, ka sa vakauwakauwataki Riopoami na luve i Solomoni, ka yabaki tolu: ni sa tolu na yabaki era sa muria nai valavala i Tevita kei Solomoni.
18Ia ko Riopoami sa vakawati kei Meelaci na luve i Jirimoci na luve i Tevita ka tagane; kei Epaieli na luve i Iliapi na luve i Jese, 19ko koya sa vakasucuma vua na gone tagane eso: ko Jiusi, kei Semaraia, kei Seami. 20Ia emuri sa vakawati kei Meeka na luve i Apisalomi; a sa vakasucumi Apaija, kei Atai, kei Sisa, kei Silomeci. 21A sa levu na loloma i Riopoami kivei Meeka na luve i Apisalomi, ka lailai vei ira kecega na watina kei ira na watina lalai: (ni sa lewe tinikawalu na watina, ka le onosagavulu na watina lalai: ka sa lewe ruasagavulu ka walu na luvena tagane, ka le onosagavulu na luvena yalewa.) 22A sa lesi Apaija na luve i Meeka ko Riopoami me turaga, me lewa vei ira na tacina: ni sa lomana me buli koya me tui. 23Ka sai valavala vakavuku ko koya, ka sa lesi ira na luvena kecega me ra dui tiko e na veivanua kecega i Juta kei Penijamini, ki na koro vakabai kecega: a sa soli kakana tiko vei ira, e dua na ka levu. A sa gadreva ko koya me lewe vuqa na watidra.
Currently Selected:
2 VEIGAUNA 11: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
