1 SAMUELA 2
2
A sere i Ana, 1-10. A nodraui valavala ca na luve i Livai, 12-17. Ko Samuela, 18,19. Sa vakaluveni tiko ko Ana, 20-21. Sa vunauci rau na luvena ko Ilai, 22-25. E dua na tamata ni Kalou sa tukuna na ca sa voleka ni yacova na vale i Ilai, 27-36.
1A sa masu ko Ana, ka kaya, Sa reki na yaloqu e na vuku i Jiova, Sa cecere cake na noqu kaukauwa e na vuku i Jiova: Sa dalaga na gusuqu vei ira na noqu meca; Ni'u sa marautaka na bula sa maivei kemuni. 2Sa sega e yalosavasava me vakataki Jiova; Ni sai kemuni ga, ka sega e dua tani; A sa sega tale na uluvatu me vakataki koya na noda Kalou. 3Dou kakua ni vakalevutaka na vosa viaviaturaga; Me kakua ni lako mai na gusumudou na vosalevu: Ni sa Kalou daukila ka ko Jiova, A sa lewa se sa vakaevei na nodra i valavala. 4Sa ramusu na nodra dakai na kaukauwa, Ia na kaukauwa sa kenai vau-ni-tolodra era sa voleka ni bale. 5O ira ka mamau era sa taro cakacaka me rawa kina na kedra; Ia ko ira ka dauviakana, era sa vakacegu: Sa vakasucu vakavitu ko koya ka yava; A sa malumalumu mai ko koya ka le vuqa na luvena. 6Sa ia na veivakamatei ko Jiova, a sa ia na veivakabulai: Sa lewa ko koya na lako sobu ki nai bulubulu, ka lewa na vakaturi cake mai. 7Sa ia na veivakadravudravuataki ko Jiova, ka ia na veivakavutuniyautaki: Sa ia na veivakamalumalumutaki, ka sa vakatubura cake talega. 8Sa vueta cake ko koya na dravudravua mai na kuvu ni qele; Sa vueta cake na dravudravua ko koya mai nai binibini de ni manumanu, Ka me vakatikora vata kei ira na turaga, Ka me ra taukena talega nai tikotiko vakaturaga sa vakaiukuuku: Ni sa nei Jiova na duru kece kei vuravura, A sa vakadeitaka kina na vuravura. 9Ena maroroya ko koya na yavadra na nona tamata yalosavasava, Ia era na vagalui e na butobuto ko ira nai valavala ca; Ni na sega ni gumatua na tamata e na nona kaukauwa ga. 10Ena raramusumusu na meca i Jiova: Ena kurukuru mai lomalagi ko koya vei ira: Ena lewa nai yalayala kei vuravura ko Jiova; Ia ena solia na kaukauwa vua na nona tui, Ka laveta cake na ka vakaturaga nei koya sa lumuta.
11A sa lako ki nona vale ki Rama ko Elikana: a sa qaravi Jiova tikoga ko koya na gone e na mata i Ilai na bete. 12Ia sa luve ni vu-ni-ca koi rau na luve i Ilai; erau sa sega ni kilai Jiova. 13Ia sa dauvakaoqo na kenai valavala ni bete vei ira na tamata: ni sa vakacabora nai soro e dua na tamata, sa lako mai na nona tamata na bete ni sa saqa toka na lewe ni manumanu, a sa taura nai cula sa mata i tolu; 14a sa cokataka ki na tavuteke, se na kuro levu, se na kuro walega, se na bilo ni wai; ia na ka kecega sa rawa mai e nai cula sa kauta na bete me kena. Erau sa kitaka vakakina mai Sailo vei ira kecega na Isireli era sa lako mai kina. 15Ia ni ra sa bera ni vakama na uro, sa lako mai na nona tamata na bete, ka kaya vua na tamata sa vakacabora nai soro, Mo solia mai na lewe ni manumanu me tavu me kena na bete, ni sa sega ni vinakata na nomu lewe ni manumanu sa saqa, ko ya ga sa droka. 16Ia ke sa kaya vua e dua na tamata, Me ra vakama mada na uro, ia mo qai kauta me vaka ko sa garova; sa qai kaya tale ko koya, E segai; mo solia sara mai: ia kevaka ko sa bese, ka'u na kauta vakaukauwa. 17Ia sa ka levu sara kina na nodraui valavala ca na cauravou e na mata i Jiova: ni ra sa vosavakacacataka nai madrali vei Jiova ko ira na tamata.
18A sa ia tiko na nonai tavi e na mata i Jiova ko Samuela ni sa gone ga, a sa vauci e na dua na efoti lineni. 19A sa cakava ko tinana e dua na nona kote lailai, e na veiyabaki yadua ka kauta vua, ni rau sa lako cake kei na watina me vakacabora nai soro vakayabaki. 20A sa vosavakalougatataki Elikana kei na watina ko Ilai, ka kaya, Me solia vei iko ko Jiova na kawa mai vua na yalewa oqo, mei sosomi ni solisoli sa solia ko koya vei Jiova. A rau sa lesu tale ki na nodrau vale. 21Ka sa talevi Ana ko Jiova, ka sa kunekune ko koya, ka vakasucuma e le tolu na gonetagane ka le rua na goneyalewa. Ia sa tubu me levu na gone ko Samuela, e na mata i Jiova.
22A sa qase sara mai ko Ilai, a sa rogoca na ka kecega sa cakava koi rau na luvena vei ira kecega na Isireli; ka ni rau sa moceri ira na yalewa era sa dausoqoni vata mai ki na katuba ni vale ni veitavaki. 23A sa kaya vei rau ko koya, ena cava drau sa kitaka kina na ka vakaoqo? ni'u sa rogoca na kemudrau i tukutuku ca maivei ira na tamata kecega oqo. 24Me kakua, oi kemudrau na luvequ; ni sa sega ni vinaka nai rogorogo ka'u sa daurogoca: drau sa vakacalai ira na tamata i Jiova. 25Kevaka sai valavala ca e dua na tamata vua e dua tani, ena lewai koya na turaga-ni-lewa; ia kevaka sai valavala ca vei Jiova e dua na tamata, ko cei me na masulaki koya? Ia erau sa sega ga ni vakarorogo ki na vosa ni tamadrau; ni sa nanuma ko Jiova me vakamatei rau. 26A sa tubu tiko na gone ko Samuela, a sa vinakati koya ko Jiova, kei ira talega na tamata.
27A sa lako mai vei Ilai e dua na tamata ni Kalou, a sa kaya vua, Sa vosa vakaoqo ko Jiova, Ka'u a rairai vakaidina ki na lewe-ni-vale i tamamu, ni ra sa tiko mai Ijipita e na vale i Fero, se segai? 28ia ka'u a digitaki koya, maivei ira na veimataqali kecega ni Isireli, me noqu bete, me vakacaboi soro tiko e na noqu i cabocabo-ni-soro, me vakama na ka boi vinaka, me vakaisulutaki e mataqu e na efoti, se segai? ia ka'u a solia ki na lewe-ni-vale i tamamu na nodra i madrali kama kecega na Isireli, se segai? 29a cava dou sa caqeta kina na noqu i soro kei na noqu i madrali laukana ka'u a vakarota me ia e na noqu i tikotiko; ia ko sa dokai rau na luvemu, ka sega ni dokai au, mo dou levulevu kina e nai sigana ni nodra i solisoli kecega na noqu tamata na Isireli? 30O koya oqo sa kaya kina ko Jiova na nodra Kalou na Isireli, Au a kaya vakaidina me vakaitavi e na mataqu na nomu lewe-ni-vale, kei na lewe-ni-vale i tamamu, ka sega ni mudu: ia ka sa qai kaya ko Jiova, Me yawa sara vei au oqo; ni'u na vakarokorokotaki ira era sa vakarokorokotaki au, ia ko ira era sa beci au, era na beci talega. 31Raica, sa lako mai na gauna, ka'u na muduka laivi kina na nomu kaukauwa kei na nodra kaukauwa na lewe-ni-vale i tamamu, me kakua na qase e na nomu vale. 32Ia ko na kunea na meca e na noqu i tikotiko, e na ka vinaka kecega sa caka vei ira na Isireli; ia ena sega na qase e na nomu vale ka tawa mudu. 33Ia na nomu tamata ka'u sa sega ni muduka tani mai na noqu i cabocabo-ni-soro, ena vakarusa na matamu ka vakararawataka na yalomu: ia ena mate kece na kawa ni nomu vale ni ra sa tamata bula tiko. 34Ia oqo na kenai vakatakilakila vei iko, sa na yacovi rau ruarua na luvemu, ko Ofinai kei Finiase; erau na mate ruarua e na dua na siga. 35Ia ka'u na lesia vei au e dua na bete yalodina, o koya ena ia na nonai tavi me vaka na ka kecega sa tu e na lomaqu kei na yaloqu: ia ka'u na vakatubura vua na lewe-ni-vale era yalodina; ka na ia na nonai tavi e na mata i koya ka'u na lumuta, ka tawa mudu. 36Ia ko koya yadua sa vo vei ira na nomu mataqali, ena lako mai ka cuva sobu vua me dua kina na nona tiki ni siliva kei na tiki ni madrai, ka na kaya, Mo lesi au mada ki na dua na cakacaka vakabete, me'u kania kina e dua na tiki ni madrai.
Currently Selected:
1 SAMUELA 2: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
