1 PITA 3
3
Sa vakarota ko koya vei ira na veiwatini me ra veilomani, 17. Me ra veilomani talega na tamata lotu kecega, me ra vosota talega na veivakacacani, 817. Sa tukuni Jisu tale, 1822.
1Oi kemudou talega, na yalewa, dou vakamalumalumutaki kemudou vei ira na watimudou; me rawai ira na watidra ko ira na yalewa e na nodra i valavala, ka segai e na vunau, kevaka sa so sa sega ni talairawarawa ki na vunau; 2ni ra sa raica na nomudou i valavala savasava kei na nomudou rere. 3Ia me kakua ni nomudou nai ukuuku e taudaku, na tali drau ni ulu, kei nai ukuuku koula, kei na sulumaka nai sulu; 4ia na ka vakayalo ga sa vuni, e na ka sa sega ni vuca rawa, na yalomalumalumu kei na yalomalua, oqori sa ka talei sara e na mata ni Kalou. 5Ni ra sa vaka kina ko ira talega na yalewa yalosavasava e na gauna eliu, era sa vakararavi vua na Kalou, ni ra sa vakaiukuukutaki ira, ni ra sa dautalairawarawa vei ira na watidra: 6me vaka sa talairawarawa ko Sera vei Eparaama, ka vakatokai koya me turaga; ia dou sa luvena, ni dou sa caka vinaka tiko, ka sega ni rerevaka e dua na ka dauveivakarerei.
7Oi kemudou talega na tagane, dou tiko vata kei na watimudou me vaka na tiko vakavuku, mo dou doka na yalewa, me vaka sa ka malumalumu, ni dou sai taukei vata e na loloma ni bula; me kakua ni tarovi na nomudrau masu.
8Ia meu tinia, dou lomavata kecega, dou ia na loloma vakai kemudou, dou veilomani me vaka na veitacini, dou yalololoma, dou lokomi: 9kakua ni veisausaumitaka na ca, se ia tale na veivakasewasewani; ia dou dua tani, dou vosavakalougatataka ga: ni dou sa kacivi me vakakina, mo dou rawata na ka e veivakalougatataki, 10Ia Ko koya sa vinakata na bula, Ka sa via raica na gauna vinaka, Me tarova na yamena mai na ca, Kei na tebenigusuna me kakua ni vosataka na ka lasu: 11Me lesu tani mai na ca ko koya, ka kitaka na ka vinaka; Me vakasaqara na vakacegu, ka muria sara. 12Ni sa wanonovi ira na tamata yalododonu na mata ni Turaga, Ka sa qara tu na daligana ki na nodra masu; Ia sa dua tani na mata ni Turaga vei ira sai valavala ca.
13Ia ko cei ena vakacacani kemudou, kevaka dou gumatua e na ka vinaka? 14Ia kevaka dou sa vakararawataki e na vuku ni valavala dodonu, dou sa kalougata kina; ia dou kakua ni rerevaka na nodra dauveivakarerei, se kidroa kina: 15ia dou vakarokorokotaka na Turaga na Kalou e na yalomudou: ka mo dou vakarau tiko mo dou tukuna vua na tamata yadua sa tarogi kemudou, na vu ni nuinui sa tu e na lomamudou e na yalomalumalumu kei na rere: 16me vinaka ga na nomudou lewa-eloma; me yaco kina, ni ra sa vosavakacacataki kemudou, me vaka dou sa tamata caka ca, me ra kana madua ko ira era sa beitaka vakailasu na nomudou i valavala vinaka vei Karisito. 17Ni sa vinaka, kevaka sa loma ni Kalou me vakakina, mo dou vakararawataki e na vuku ni caka vinaka, ka me kakua e na vuku ni caka ca.
18Ni sa vakararawataki vakadua na Karisito talega e na vuku ni valavala ca, o koya na caka dodonu e na vukudra na caka cala, me kauti keda kina vua na Kalou, ni sa vakamatei na yagona, a sa vakabulai na yalona. 19Ka lako talega kina ko koya ka vunau vei ira na yalo era sa tiko e na vale ni veivesu; 20o ira era a talaidredre eliu, ni sa vosota vakadede na Kalou, ka sa dauwawa e na gauna i Noa, ni sa vakarautaki tiko na waqa, a ra le vica ga, io e lewe walu walega, sa vakabulai kina e loma ni wai. 21Oqori ga nai vakatakarakara ni sa vakabulai keda vakakina e na gauna oqo na papitaiso e segai ni sa biu walega na dukadukali ni yago, ka ni sa tukuni rawa ga ni sa vinaka vua na Kalou na noda lewa-eloma, e na vuku ni sa tu cake tale mai na mate ko Jisu Karisito: 22o koya sa lako ki lomalagi, a sa tiko e na liga i matau ni Kalou; ia sa vakamalumalumutaki tu vei koya ko ira na agilose, kei ira era sa lewa, kei ira era sa kaukauwa.
Currently Selected:
1 PITA 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific