1 KORINICA 7
7
Sa tukuna vei ira ko koya nai valavala ni veiwatini e na lotu, 117. Sa vakavulici ira e na ka eso e yaga vei ira ni ra sa dauvakacacani e na vuku ni lotu, 1824. E sega ni tabu na vakawati, ia sa yaga vei ira eso me ra kakua ga, 2540.
1Ia e na vuku ni veika dou sa volavola kina vei au: Sa vinaka vua na tagane me kakua ni veiyacovi kei na yalewa. 2Ia me kakua ni ia na veibutakoci, me sa bau vakawati na tagane yadua, ka me sa bau vakawati na yalewa yadua. 3Me ia vua na yalewa na tagane na ka sa dodonu e na veilomani: me vaka talega kina na yalewa vua na tagane. 4Sa sega ni veitaliataka na yagona na yalewa sa vakawati, sa lewa ga na watina: a sa vaka talega kina sa sega ni veitaliataka na yagona na tagane sa vakawati, sa lewa ga na watina. 5Dou kakua ni tarova na veiyacovi vakai kemudou, me ia ga ni sa vinakata ruarua e na gauna lekaleka, mo dou lalaga ki na lolo kei na masu; ia dou qai veiyacovi tale, de dauveretaki kemudou ko Setani e na vuku ni nomudou dauveidomoni. 6Ia kau sa vosataka oqo, ni sa tara tu e segai ni sa vakaroti. 7Ia kau sa vinakata me vakataki au na tamata kecega: ia sa rawata mai vua na Kalou na tamata yadua nai solisoli e dui yaga, e dua sa vakaoqo, e dua tani sa vaka ko ya. 8Ia kau sa vosataki ira sa sega ni vakawati kei ira na yada, E yaga vei ira me ra tiko vakakina me vakataki au: 9ia kevaka era sa dredre ni tarovi ira, me ra vakawati: ni sa vinaka na vakawati ka ca me daugagano. 10Ia kau sa vosataki ira sa vakawati tiko, ia ka sa sega ni vakai au, na Turaga ga, Me kakua ni biuta na watina na yalewa sa vakawati: 11(ia kevaka sa dro, me kakua ni vakawati tale ko koya, se me rau veivinakati tale kei na watina;) ia na tagane sa vakawati me kakua talega ni biuta na watina.
12Ia vei ira ga sa vo kau sa kaya vakai au, sa segai na Turaga: Kevaka e dua na wekada, sa sega ni lotu na watina, a sa via tiko vata kaya na watina, me kakua ni biuta tani. 13Kevaka sa loma ni tagane tawa lotu me rau tiko vata kei na watina, me kakua ni drotaki koya na yalewa. 14Ni sa vakasavasavataka na tagane tawa lotu na watina, a sa vakasavasavataka talega na yalewa sa sega ni vakabauta ko koya na watina; ia kevaka sa sega ni vakaoqo, era sa tawa-savasava na nomudou gone; ia oqo, era sa savasava. 15Ia kevaka sa dro ko koya sa tawa lotu, me dro ga. Me qai veitalia ga na tagane se na yalewa sa lotu ni sa vakaoqo: ia sa kacivi keda na Kalou me da tiko vakacegu ga. 16Ko sa kila vakaevei, o iko na yalewa se ko na vakabula na watimu, se segai? se ko sa kila vakaevei, o iko na tagane, se ko na vakabula na watimu, se segai? 17Ia me vaka sa solia yadua vei ira na tamata na Kalou, me vaka na nona tiko ni sa kacivi koya na Turaga, me tiko ga vakakina. Au sa lewa me vakakina e na veisoqosoqo lewe ni lotu kecega.
18Kevaka e dua sa kacivi ni sa cili me kakua ni biuta na cili. Ke dua sa sega ni cili ni sa kacivi, me kakua ni cilivi. 19A ka walega na cili, a ka wale talega na tawa cili, ia sa sega ni vakakina na talairawarawa ki nai vakaro ni Kalou. 20Me tiko ga na tamata yadua me vaka na nona tiko ni sa kacivi. 21O sa bobula beka ni ko sa kacivi? kakua ni vuturi kina: ia kevaka e rawa mo sereki, mo vakayagataka ga. 22O koya sa bobula ni sa kacivi koya na Turaga sa qai nona tamata sere na Turaga; sa vaka talega kina ko koya sa lalaga ni sa kacivi, sa bobula vei Karisito. 23Dou sa voli ga e nai voli; dou kakua ga ni nodra bobula na tamata. 24Na veiwekani, me tiko na tamata yadua kei na Kalou, e nai tutu sa tiko kina ni sa kacivi.
25Ia e na vukudra era sega ni vakawati, sa sega ni tu vei au nai vakaro ni Turaga: ia kau sa lewa vakai au ga, me vaka e dua sa rawata na loloma ni Turaga meu dina kina. 26A ka oqo kau sa nanuma sa yaga e na gauna ni ca oqo, me tiko walega na tamata sa vakakina. 27Sa dua beka na watimu ko sa vauci kina? kakua ni vakatovolea mo sereki tale. Sa sega beka ni dua na watimu, ko sa vauci kina? kakua ni vakasaqara e dua me watimu. 28Ia kevaka ko sa ia na vakawati, ko sa sega ni cala kina; ia kevaka sa ia na vakawati e dua na goneyalewa, sa sega ni cala kina. Ia ko ira sa vakaoqo ena vakararawataki na yagodra: ia koi au, au sa lomani kemudou.
29Ia na ka oqo kau sa kaya, oi kemudou na veiwekani, Sa vakalekalekataki na gauna sa vo: ia oqo me ra vakataki ira era sa sega ni vakawati ko ira na tagane sa vakawati: 30kei ira era sa tagi, me ra vakataki ira era sa sega ni tagi: kei ira era sa reki, me ra vakataki ira era sa sega ni reki; kei ira era sa veivoli, me ra vakataki ira sa sega na nodra ka; 31kei ira era sa vakayagataka na veika ni vuravura oqo, me ra vakataki ira era sa sega ni vakayagataka vakaca: ni sa lako tani yani nai valavala ni vuravura oqo. 32Ia kau sa vinakata mo dou kakua ni lomaocaoca. Na tagane sa sega ni vakawati sa daunanuma ga na veika ni Turaga, se me vinaka vakaevei vua na Turaga: 33ia na tagane sa vakawati sa daunanuma ki na veika ni vuravura oqo, me vakayalovinakataki koya vakaevei na watina. 34Sa dua tani na goneyalewa kei na yalewa sa vakawati. A yalewa sa sega ni vakawati sa daunanuma ki na veika ni Turaga, me savasava tiko na yagona kei na yalona talega: ia na yalewa sa vakawati sa daunanuma ki na veika ni vuravura, se na vinakati koya vakaevei na watina.
35Ia na ka oqo kau sa kaya me yaga vei kemudou; au sa sega ni via vakataotaki kemudou, au tukuna ga na ka sa kilikili kei kemudou, mo dou dauqarava na Turaga ka sega ni lomaocaoca.
36Ia kevaka e dua na qase sa nanuma sa sega ni lewa vinaka e na vuku ni luvena-yalewa, kevaka sa oti na gauna ni gone, a sa dredre ni tiko wale, me veitalia ga; sa sega ni cala ko koya: me ra vakawati. 37Ia ko koya sa dei sara na lomana, a sa sega ni dredre vua me tiko wale, a sa rawata ga na yalona, ka sa lewa ga e na yalona me taura tiko na luvena-yalewa, sa caka vinaka. 38Sa qai vakaoqo, o koya sa solia na luvena-yalewa me vakawati sa caka vinaka ga; ia ko koya sa sega ni solia me vakawati sa caka vinaka cake.
39Sa vauca na yalewa na lawa, ni sa bula tiko na watina; ia kevaka sa mate na watina, sa qai tara vua me vakawati tale kei na tagane sa vinakata ko koya; ka me ia ga kei koya sa nona na Turaga. 40Ia sa noqu lewa sa kalougata cake ko koya kevaka sa tiko ga vaka ko ya: ia kau sa vakasama talega ni sa tiko vei au na Yalo ni Kalou.
Currently Selected:
1 KORINICA 7: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
