1 KORINICA 4
4
E dodonu me da dokai ira nai talatala i Karisito, 17. O ira nai apositolo era sa vakararawataki vakalevu; ia sai ira ga sa tamadra vakayalo na kai Korinica, a sa dodonu me ra muri ira, 821.
1Me vakasami keitou na tamata yadua, ni keitou sa nona tamata cakacaka na Karisito, kei nai talatala e na veika vuni ni Kalou. 2Ia eke sa kilikili kei ira nai talatala, me ra kune ni ra tamata dina. 3Ia sa ka lailai sara vei au mo dou lewai au, se me ra lewai au na tamata; io, au sa sega dina ni lewai au vakai au. 4Niu sa sega ni kila e dua na ka kau sa cala kina; ia kau sa sega ni vakadonui kina: ia sai koya ga na Turaga ka lewai au. 5O koya mo dou kakua ni lewa e dua na ka ni sa bera na kena gauna, dou wawa mada me lako mai na Turaga, o koya ena vakaraitaka na veika ni butobuto sa vuni tu, ena vakavotuya talega na nanuma ni yaloda: ia ena qai dokai na tamata yadua mai vua na Kalou.
6Ia na veika oqo kau sa vakabaleta vei keirau kei Apolosa e na vukumudou, na veiwekani; mo dou vakatavulici kina maivei keirau mo dou kakua ni uasivia na ka sa volai tu, mo dou kakua kina ni doka cake e dua, ka beca e dua. 7Io, ko cei sa qisi iko mo uasivi cake? se cava sa tu vei iko sa sega ni soli vei iko? ia kevaka sa soli vei iko, ko sa dokai iko kina e na vuku ni cava, me vaka sa sega ni soli vei iko?
8Dou sa qai mamau dou sa qai vutuniyau, dou sa lewa vaka na tui ni keitou sa takali: ia kau sa vinakata kevaka dou sa lewa dina, me da lewa vata talega kei kemudou. 9Ni kau sa nanuma sa lesi keitou nai apositolo na Kalou me keitou muri sara, me keitou vakataki ira era sa lesi me mate: ni keitou sa vakaraitaki ki vuravura, vei ira talega na agilose, kei ira na tamata. 10Keitou sa lialia e na vuku i Karisito, ia koi kemudou dou sa vuku ni dou sa tu vata kei Karisito; keitou sa malumalumu, ia dou sa kaukauwa; dou sa vakarokorokotaki, ia keitou sa beci. 11Ka yacova na gauna oqo keitou sa viakana, ka viagunu, ka luvawale, ka sa vakamavoataki, ka sega na neitou i tikotiko; 12keitou sa oca, ni keitou sa daucakacaka e na liga i keitou: ni keitou sa vakasewasewani, keitou sa vosa vinaka; ni keitou sa vakacacani, keitou sa vosota: 13ni keitou sa vosavakacacataki, keitou sa vakatamamasu ga: keitou sa yaco me vaka na soqosoqo ni vuravura oqo, io, na duka sa quaraki mai na ka kece, ka yacova na siga edaidai.
14Au sa sega ni vola na veika oqo meu vakamaduataki kemudou, ia kau sa vakatavulici kemudou ni dou sa vakataki ira na noqu gone ni toko. 15Ia kevaka sa udolu vakatini na nomudou i vakavuvuli vei Karisito, sa sega ni lewe vuqa na tamamudou; niu sa vakatuburi kemudou mo dou nei Karisito Jisu e nai tukutuku-vinaka. 16O koya kau sa masuti kemudou kina, mo dou vakadamurimuri au.
17Au sa talai Timoci vei kemudou e na vuku ni ka oqo, o koya na noqu gone ni toko ka yalodina e na Turaga, ia ena vakananumi kemudou ko koya e na noqu i valavala vei Karisito, me vaka na ka kau sa vakatavulica e na veiyasana kecega e na veisoqosoqo lewe ni lotu kecega. 18Sa viavialevu ko ira eso, me vaka niu na sega ni lako yani vei kemudou. 19Ia kau na lako vakatotolo vei kemudou, kevaka sa vinakata na Turaga, ia kau na sega ni kila na nodra vosa era sa viavialevu, na kena kaukauwa ga. 20Ni sa sega ni ka ni vosa walega na matanitu ni Kalou, sa ka ga ni kaukauwa. 21A cava dou sa vinakata? meu lako vei kemudou niu sa taura na kuita, se meu lako e na loloma, kei na yalo malua?
Currently Selected:
1 KORINICA 4: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
