1 KORINICA 11
11
Sa vunauci ira ni ra vakaisala na tagane ni ra sa masu e na vale-ni-lotu: ia ko ira na yalewa era sa sega ni vakaisala, 116. Sa qai tukuna nai tukutuku ni vakayakavi ni Turaga, 1734.
1Dou vakadamurimuri au, me vaka kau sa muri Karisito.
2IA kau sa dokai kemudou, na veiwekani, ni dou sa nanumi au e na ka kecega, ka vakabauta nai vakavuvuli, me vaka kau a solia vei kemudou. 3Ia kau sa vinakata mo dou kila ni sa ulu ni tamata yadua na Karisito; ia na ulu ni yalewa na tagane; kei na ulu i Karisito na Kalou. 4A tagane yadua, sa masu se parofisai, ni sa ubi na uluna, sa sega ni doka na uluna. 5Ia na yalewa yadua sa masu se parofisai ni sa sega ni ubi na uluna, sa sega ni doka na uluna: ni sa tautauvata ga ni sa tasi. 6Ia kevaka sa sega ni ubi na yalewa, me tasi talega: ia kevaka sa ka ni veivakamaduataki me koti na yalewa se tasi, me qai ubi. 7Ni sa sega sara ni dodonu vua na tagane me ubia na uluna ni sai yaloyalona kei na kenai ukuuku ni Kalou ko koya: ia na yalewa nai ukuuku ni tagane. 8Sa sega ni vu mai vua na yalewa na tagane; sa vu mai vua na tagane na yalewa. 9Ni sa sega ni buli na tagane me nona na yalewa; sa buli ga na yalewa me nona na tagane. 10O koya oqo sa dodonu kina me tu nai ubi e na ulu ni yalewa mei vakatakilakila ni kena malumalumu, e na vukudra na agilose. 11Ia sa sega ni tu duaduaga na tagane ka me tu tani na yalewa, se tu duaduaga na yalewa me tu tani na tagane e na Turaga. 12Ni sa vu mai vua na tagane na yalewa, sa vaka talega kina na tagane e na vuku ni yalewa; ia sa vu mai vua na Kalou na ka kecega.
13Dou lewa vakai kemudou: sa kilikili kaya na yalewa li me sega ni ubi ni sa masu vua na Kalou? 14Sa sega li ni vakavulici kemudou na nodai tovo vakatamata, kevaka sa balavu na drau ni uluna na tagane, sa ka ni veivakamaduataki vua? 15ia kevaka sa balavu na drau ni uluna na yalewa, sa nonai ukuuku ga: ni sa soli vua na drau ni uluna me kenai ubi?
16Ia kevaka sa via dauveileti e dua, sa sega ni neitou i valavala oqo, se na nodra na veisoqosoqo lewe ni lotu ni Kalou.
17Ia niu sa vakarota tiko oqo, au sa sega ni dokai kemudou, ni dou sa sega ni vinaka cake ni dou sa soqoni vata, ia dou sa ca sobu kina. 18Io, na kenai matai, ni dou sa soqoni vata vakaisoqosoqo lewe ni lotu, au sa rogoca ni dou sa dauveisei; ia kau sa vakadinata eso: 19ni sa dredre me sega ni tubu na dauveiba vei kemudou me rairai kina ko ira vei kemudou era sa vinakati.
20Ia ni dou sa soqoni vata e na dua na yasana, dou sa sega ni ia dina nai vakayakavi ni Turaga. 21Ia ni dou sa kana, dou sa dui kania yadua eliu na kenai vakayakavi: a sa viakana kina e dua, ka mateni e dua. 22Oi? sa qai sega beka na nomudou veivale mo dou kana ka gunu kina? se dou vakamaduataki ira beka sa sega na nodra, ka beca nai soqosoqo lewe ni lotu ni Kalou? A cava meu kaya vei kemudou? meu dokai kemudou li e na ka oqo? Au sa sega ni dokai kemudou.
23Niu a rogoca mai vua na Turaga na ka kau a tukuna talega vei kemudou, Ni sa taura nai buli madrai na Turaga ko Jisu e na bogi sa soli yani kina ko koya: 24ia ni sa vakavinavinaka oti sa dovia, ka kaya: Oqo na yagoqu sa dovi e na vukumudou; kitaka oqo mo dou vakananumi au kina. 25Sa vaka talega kina na bilo, ni sa kania oti nai vakayakavi ko koya, sa kaya, Na bilo oqo na veiyalayalati vou e na noqu dra; e na gauna kecega dou sa gunuva kina, dou kitaka oqo mo dou vakananumi au kina. 26Io, e na gauna kecega dou sa kania kina na madrai oqo, ka gunuva na bilo oqo, dou sa vakatakila kina na nona mate na Turaga, ka yacova na nona lako mai.
27Ia ena tarogi kina e na vuku ni yago ni Turaga kei na nona dra, o koya yadua ena kania na madrai oqo, ka gunuva na bilo ni Turaga, ka sega ni doka. 28Ia me dikevi koya mada na tamata vakai koya, me qai kania na madrai ko ya, ka gunu e na bilo ko ya. 29Ni sa kania ka gunuva na nona cudruvi ko koya sa kania ka gunuva ka sega ni doka, ni sa sega ni kila na yago ni Turaga. 30E na vuku ni ka oqo sa lewe vuqa kina vei kemudou sa malumalumu ka tauvi-mate, ka lewe vuqa sa moce. 31Ia, kevaka eda sa lewai keda, eda na sega ni lewai. 32Ia ni da sa lewai, sa qai cudruvi keda na Turaga, me da kakua kina ni lewai me cudruvi vata kei ira era sa vakavuravura. 33O koya oqo kemudou na wekaqu, ni dou sa soqoni vata mo dou kana, dou veiwaraki mada. 34Ia kevaka e dua sa viakana, me kana ga mai vale; mo dou kakua kina ni soqoni vata mo dou cudruvi. Ia na ka sa vo kau na vakadodonutaka niu sa lako yani.
Currently Selected:
1 KORINICA 11: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
