1 KORINICA 10
10
A ka sa yaco vei ira na Isireli eliu, sai vakatakarakara ni ka ni lotu e na gauna oqo, 113. Me drotaka na kalou lasu na tamata lotu, 1422. Me da kakua ni cakava e dua na ka era sa vakacalai kina na tamata lotu, 2333.
1Ia kau sa sega ni vinakata, oi kemudou na veiwekani, mo dou lecava ni ra a tu e ruku ni o ko ira kecega na noda qase, a ra sa lako kecega e loma ni waitui: 2a ra sa papitaisotaki kecega vei Mosese e na o kei na waitui; 3a ra sa kania vata kecega na kakana vakayalo; 4a ra sa gunuva vata kecega na wai ni gunu vakayalo: ni ra sa gunu mai na Vatu vakayalo sa muri ira: ia na Vatu ko ya na Karisito. 5Ia sa lewe vuqa vei ira sa sega ni vinakati ira na Kalou; ni ra sa duibiubiu e loma ni veikau.
6Ia na veika oqo sai vakatakarakara vei keda, me da kakua kina ni daugadreva na veika ca, me vaka na nodra daugadreva. 7Dou kakua talega ni qarava na matakau, me vakataki ira eso; me vaka sa volai, Era sa tiko sobu na tamata me ra kana ka gunu, a ra sa qai tu cake tale me ra qito. 8Me da kakua talega ni dauyalewa, me vaka era sa kitaka eso, a sa bale kina e na siga e dua bau e lewe ruasagavulu ka mani tolu na udolu. 9Me da kakua talega ni dauvakatovolei Karisito, me vaka era sa dauvakatovolea eso, a sa kati ira mate na veigata. 10Dou kakua talega ni daudidi, me vaka era sa didi eso a ra sa vakarusai e na dauveivakarusai. 11Ia na ka kecega oqo sa yaco vei ira mei vakatakarakara: a ra sa volai me da vakatavulici kina, oi keda sa yacovi keda nai vakataotioti ni veigauna. 12O koya me qai vakaraici koya ko koya sa nanuma sa tu dei, de bale ga mai.
13Sa sega na vere tani sa yaco vei kemudou, o koya ga sa vorata rawa na tamata: ia sa yalodina na Kalou o koya ena sega ni laivi kemudou mo dou dauveretaki vakalevu cake, me vaka ga na nomudou kaukauwa; ka na cakava talega kei na vere na sala mo dou dro kina, mo dou vosota rawa.
14O koya oqo, koi kemudou sa lomani, mo dou dro tani mai na qarava na matakau. 15Au sa vosa me vaka vei ira na tamata vuku; dou lewa na ka kau sa kaya. 16A bilo ni vakavinavinaka keitou sa vatonaka, sa sega li ni ka sa noda vata kina na dra i Karisito? Ai buli madrai eda sa dovia, sa sega li ni ka sa noda vata kina na yago i Karisito? 17Ni sa dua bauga na madrai, sa qai yagona e dua bauga koi keda e lewe vuqa, ni sa noda nai votavota ni madrai ko ya e dua bauga. 18Dou raici ira na Isireli vakayago: ko ira era sa kania na veimadrali, sa sega li ni nodra nai votavota vata kei nai cabocabo-ni-soro? 19A cava na ka kau sa kaya? ni sa dua li na ka dina na matakau, se na ka dina na ka sa vakacabori ki na matakau? 20Ia na veika era sa vakacabora ko ira era sa sega ni lotu, era sa vakacabora vei ira na tevoro, a sa sega ga vua na Kalou: ia kau sa sega ni vinakata mo dou votai vata kei ira na tevoro. 21Dou sa sega ni gunuva rawa na bilo ni Turaga, kei na nodra bilo talega na tevoro: dou sa sega ni kana rawa e na tepeli ni Turaga, kei na nodra tepeli talega na tevoro. 22Eda vakacudruya na Turaga, ne? eda sa uasivi beka vua e na kaukauwa?
23Sa tara ga vei au na ka kecega, ia sa sega ni yaga na ka kecega: sa tara na ka kecega, ia sa sega ni ka ni vakatataki cake na ka kecega. 24Me kakua e dua me qara na ka sa yaga duaduaga vei koya, a ka talega sa yaga vei koya na tani. 25A ka kecega sa volitaki e na rara ni veivoli, mo dou kania, ka kua ni taroga e dua na ka e na vuku ni lewa-eloma: 26ni sa nona na Turaga ko vuravura, kei na ka kecega sa sinai kina. 27Kevaka e dua sa sega ni lotu sa sureti kemudou, ka dou sa vinakata me lako, dou kania ga na ka kecega sa tauci e matamudou, ka kua ni taroga e na vuku ni lewa-eloma. 28Ia kevaka e dua sa kaya vei kemudou, Oqo sa vakacabori ki na veimatakau, dou kakua ni kania e na vuku i koya sa tukuna, e na vuku ni lewa-eloma talega: 29au sa cavuta na lewa-eloma, ia ka sa sega ni nomu, a nona ga na tani: ni sa lewai vakacava na noqu veitalia e na lewa-eloma ni dua tani? 30Ia kevaka kau sa kana ka vakavinavinaka kina, meu sa vosavakacacataki e na vuku ni cava e na ka kau sa vakavinavinaka kina? 31O koya ga, se dou kana, se dou gunu, se cava na ka dou sa kitaka, mo dou kitaka kecega me vakarokorokotaki kina na Kalou. 32Dou kakua ni vakacala e dua, vei ira na Jiu, se vei ira na lewe ni veimatanitu tani, se vei ira nai soqosoqo lewe ni lotu ni Kalou: 33me vaka kau sa kitaka na ka kecega me vinakata ko ira na tamata kecega, ia kau sa sega ni qara na ka sa yaga duaduaga vei au, na ka talega sa yaga vei ira na lewe vuqa, me ra vakabulai kina.
Currently Selected:
1 KORINICA 10: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
