1 VEIGAUNA 23
23
Ko ira na Livai.
1Ia ni sa qase mai ko Tevita, ka vuqa na nona yabaki, sa buli Solomoni na luvena me tui vei ira na Isireli.
2A sa vakasoqoni ira vata kecega na nodra turaga na Isireli ko koya, kei ira na bete, kei ira na Livai. 3A sa wili ko ira na Livai sa tolusagavulu na nodra yabaki ka toro cake; ia na kedrai wiliwili, ni ra sa volai na tamata yadua, sa le tolusagavulu ka walu na udolu. 4Sa nodra i tavi na lewe ruasagavulu ka va na udolu vei ira, me vakaraica na cakacaka ki na vale i Jiova; ka sa le ono na udolu era sa turaga ni lewa ka ovisa: 5a sa le va na udolu era sai vakatawa ni matamata-ni-koro: ka le va na udolu era sa vakavinavinaka tiko kivei Jiova, e na ka domo vinaka ka'u a cakava me ia kina na vakavinavinaka.
6A sa wasei ira ko Tevita me ra vakailawalawa e veitaravi, ka me lewai ira ko ira na Livai: ko Kerisoni, ko Koaca, kei Mirari.
7Maivei ira na luve i Kerisoni: ko Latani, kei Semeai. 8O iratou na luve i Latani eratou tagane: ko Jieli sa liu, kei Secami, kei Joeli, sa lewe tolu. 9O iratou na tagane na luve i Semeai: ko Silomeci, kei Esieli, kei Arani, sa lewe tolu. Sa nodra qase turaga na Latani ko iratou oqo. 10Ia ko iratou na tagane na luve i Semeai: ko Jeaci, ko Sina, kei Jiusi, kei Piria. O iratou na lewe va oqo eratou sa luve i Semeai. 11A sa kenai matai ko Jeaci, ia nai karua ko Sisa: ia ko Jiusi kei Piria sa sega ni lewe vuqa na luvedrau tagane; ia era sa wili vata kina me mataqali.
12O iratou na luve i Koaca ka tagane: ko Amirami, ko Isari, ko Epironi, kei Usieli, sa lewe va. 13Oi rau na luve i Amirami ka tagane: ko Eroni, kei Mosese: ka sa tawase ko Eroni, me vakasavasavataka na veika sa tabu sara, ko koya kei ira na luvena tagane ka sega ni mudu, me ra vakama e na mata i Jiova na ka boi vinaka, me ra qaravi koya, ka ia na vosa ni veivakalougatataki e na yacana, ka sega ni mudu. 14A sa vakayacani vata kei ira na mataqali i Livai koi rau na luve i Mosese na tamata ni Kalou. 15Oi rau na luve i Mosese ka tagane: ko Kerisomi, kei Eliesa. 16Maivei ira na luve i Kerisomi ka tagane: sa liu ko Sipueli. 17Ia na luve i Eliesa ka tagane: ko Riapaia sa liu. Ka sega tale na luve i Eliesa ka tagane; ia sa lewe vuqa sara na tagane na luve i Riapaia. 18Maivei iratou na luve i Isari ka tagane: sa liu ko Silomeci. 19Maivei iratou na luve i Epironi ka tagane: sa liu ko Jiraija, ai karua ko Amaraia, ai katolu ko Jeesieli, ia nai kava ko Jikamiami. 20Maivei rau na luve i Usieli ka tagane: sa liu ko Maika, ia nai karua ko Jisia.
21Oi rau na luve i Mirari ka tagane: ko Mali, kei Musi. Oi rau na luve i Mali ka tagane: ko Eliesa, kei Kisi. 22A sa mate ko Eliesa, ka sega na luvena tagane, a luvena yalewa ga: a ra sa vakawati kei iratou na wekadratou na luve i Kisi. 23O iratou na luve i Musi ka tagane: ko Mali, kei Eteri, kei Jirimoci, sa lewe tolu.
24O ira oqo na Livai, me vaka na mataveivuvale ni nodra qase; ia ko ira na qase turaga, me vaka nai wiliwili ni yacadra ni ra sa volai, ko ira sa cakava na cakacaka ni veiqaravi e na vale i Jiova, ko ira na ruasagavulu na nodra yabaki ka toro cake. 25Ni sa kaya ko Tevita, Sa vakasaututaki ira na nona tamata ko Jiova na nodra Kalou na Isireli, ka me tiko e Jerusalemi ka tawa mudu: 26ko ira talega na Livai: era na sega tale ni colata na vale ni Kalou, se dua na kenai yaya ni kena cakacaka. 27Ni sa wili ko ira na Livai sa ruasagavulu na nodra yabaki ka toro cake, me vaka nai tinitini ni vosa i Tevita. 28Ni sa nodra i tavi me ra qaravi ira na luve i Eroni e na veiqaravi e na vale i Jiova, e na kena lomanibai, kei na kena taba-ni-vale e cake, kei na vakasavasavataka na ka tabu kecega, kei na cakacaka sa caka tiko e na vale ni Kalou; 29me ra vakarautaka na madrai dauyatuni, kei na madrai droka vinaka ni madrali laukana kei na keki mamare sa sega ni vakaleveni, kei na ka sa tavuteke, kei na ka sa tavu e na waiwai, ka me ra vakaraica nai vakarau kei na bibi ni ka kece; 30me ra tu talega e na mataka kecega me ia na vakavinavinaka kei na sere vei Jiova, ka vaka talega kina e na yakavi; 31me ra vakacabora talega nai soro kama kecega kivei Jiova, e na veisiga ni vakacecegu, e na vula vou, kei na so levu sa lokuci, me vaka nai wiliwili, ka me vaka nai vakaro sa bale kina, me ia tikoga e na mata i Jiova: 32ia me ra vakabauta nai vakaro sa bale ki na vale ni veitavaki, kei na tikina tabu, kei na nodra i tavi na wekadra, na luve i Eroni, e na cakacaka ni vale i Jiova.
Currently Selected:
1 VEIGAUNA 23: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
