1 VEIGAUNA 10
10
Sa vakamatei ko Saula, kei iratou na luvena.
1A sa vala kei ira na Isireli ko ira na kai Filisitia; a ra sa dro tani ko ira na Isireli e matadra na kai Filisitia, ka ra sa bale sobu ni ra sa moku mai na ulu-ni-vanua ko Kilipoa. 2A sa cicimuri Saula kei iratou na luvena tagane ko ira na kai Filisitia; ka ra sa mokuti Jonacani, kei Epinatapi, kei Malikisua eratou luve i Saula, ko ira na kai Filisitia. 3A sa gumatua nai valu kivei Saula, ka sa vanai koya ko ira na dauvanavana, a sa vuetaki koya ko ira na dauvanavana. 4Sa qai kaya ko Saula vua sa daucolata na nonai yaragi, Ucuna na nomu i seleiwau, ka suaki au sara kina, de sa lako mai ko ira na sega ni cili oqo ka vakalialiai au. A sa bese ko koya sa daucolata na nonai yaragi; ni sa ka levu na nona rere. A sa taura nai seleiwau ko Saula, ka baletaka. 5Ia ni sa raica ko koya sa daucolata na nonai yaragi ni sa mate ko Saula, sa baletaka talega ko koya na nonai seleiwau, ka sa ciba. 6A sa mate ko Saula, kei na luvena tagane tolutolu, ia sa mate vata kecega na nona kawa. 7Ia ni ra sa raica ko ira kecega na Isireli era tiko e na buca, ni ra sa dro, a sa mate talega ko Saula kei iratou na luvena, era sa biuta na nodra veikoro, ka dro talega: a ra sa lako mai na kai Filisitia, ka tiko kina.
8Ia e na mataka, ni ra sa lako mai ko ira na kai Filisitia me ra tokia na nodra i sulu na moku, era sa kunei Saula kei iratou na luvena, ni ratou sa davo mate e na ulu-ni-vanua ko Kilipoa. 9Ia era luvata na nonai sulu, ka ra sa kauta tani na uluna, kei na nonai yaragi, a ra sa talatala ki na nodra vanua na kai Filisitia me vakarogorogoya ki na nodra veimatakau, vei ira talega na tamata.
10Ia na nonai yaragi era sa ciqira e na nodra bure kalou, ka rubeca na uluna e na bure kalou i Tekoni.
11Ia ni ra sa rogoca ko ira kece na kai Jepesi-kiliati na ka kecega era sa kitaka vei Saula ko ira na kai Filisitia, 12era sa ia kecega na tamata qaqa, ka la'ki kauta tani na yago i Saula, kei na yagodratou na luvena, ka kauta mai ki Jepesi, ka buluta na suidratou e na ruku ni oki mai Jepesi; a ra sa lolo ka bogi vitu.
13A sa mate ko Saula e na vuku ni nona caka cala sa kitaka ko koya vei Jiova, io, ki na vosa i Jiova, ka ni sa sega ni vakabauta ko koya, ka ni sa lako talega me kere vakavuvuli vua na tamata sa curumi, ka me tarogi koya, 14ka sa sega ni tarogi Jiova: a sa vakamatei koya kina ko koya, a sa vukica na matanitu kivei Tevita na luve i Jese.
Currently Selected:
1 VEIGAUNA 10: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
