ሮሚያ 8

ጌሻ ኣያናይ ኮዪያዋዳን ዴዑሳ

1ሄዋ ዲራው፥ ኪሪስቶሳ ዬሱሳና ዴዒያዋንቱ ቦላን ፒርዳይ ሃዒ ባዋ፤ 2ኣዪሲ ጎፔ፥ ኪሪስቶሳ ዬሱሳ ባጋና ኑሲ ዴዑዋ ኢሚያ ጌሻ ኣያና ሂጊ ታና #8፡2 ታና፡ ኢቲ ኢቲ ጌሻ ቃላ ቢሌይ፥ ኔና ዎይ ሂንቴንታ ያጌ፤ ሃራይ ቃይ ኑና ያጌ። ናጋራ ሂጊያ ኣይሌቴፔኔ ሃይቁዋ ሂጊያ ኣይሌቴፔ ኬሴዳ። 3ኣሳ ኣሳቴይ ዳቡራንቻ ጊዲያ ዲራው፥ ሂጊ ኦናው ዳንዳዪቤናዋ ፆሳይ ኦዳ፤ ናጋራንቻቱዋ ኣሳቴ ማላ ኣሳቴና ዴዒያ ባሬ ናዓ፥ ኣሳይ ኦዳ ናጋራው ያርሹዋ ጊዳናው ፆሳይ ኪቲዴ፥ ኣሳ ኣሳቴ ጊዶን ዴዒያ ናጋራ ፒርዴዳ። 4ጌሻ ኣያናይ ኮዪያዋዳን ዴዒያዋንቱፔ ኣቲን፥ ኑ ኣሳቴይ ኮዪያዋዳን ዴዓናዋንቱ ቦላ፥ ኑ ቦላ፥ ሂጊያ ፂሎ ኣዛዙ ፖሌታና ማላ፥ ፆሳይ ሃዋ ኦዳ።

5ባሬንቱ ኣሳቴይ ኮዪያዋዳን ዴዒያዋንቱ ባሬንቱ ኣሳቴባ ቆፒኖ፤ ሺን ጌሻ ኣያናይ ኮዪያዋዳን ዴዒያዋንቱ ጌሻ ኣያናባ ቆፒኖ። 6ኣሳቴባ ቆፑሳይ ሃይቁዋ ኣሄ፤ ሺን ጌሻ ኣያናባ ቆፑሳይ ዴዑዋኔ ሳሮቴ ኣሄ። 7ኣሳቴባ ቆፑሳይ ፆሳው ኢፆ፤ ኣያው ጎፔ፥ ኣሳቴይ ፆሳ ሂጌው ኤኖ ጌና፤ ቃሲ ኤኖ ጋናዉካ ኣው ዳንዳዬቴና። 8ባሬንቱ ኣሳቴው ኤኖ ጊያዋንቱ ፆሳ ናሼቻናው ዳንዳይኪኖ።

9ሺን ፆሳ ኣያናይ ሂንቴንቱን ዴዖፔ፥ ጌሻ ኣያናይ ጊያዋዳን ዴዒታፔ ኣቲን፥ ሂንቴ ኣሳቴይ ኮዪያዋዳን ዴዒኪታ። ሺን ኦኒኔ ኪሪስቶሳ ኣያናይ ባይናዋ ጊዶፔ፥ ሄ ኡራይ ኪሪስቶሳዋ ጊዴና። 10ሺን ኪሪስቶሲ ሂንቴንቱን ዴዖፔ፥ ሂንቴ ኣሳቴይ ናጋራ ጋሱዋን ሃይቄዳዋ፤ ሺን ሂንቴ ኣያናይ ፂሎቴ ጋሱዋን ሂንቴንቱን ፓፃ ዴዔ። 11ሺን ዬሱሳ ሃይቁዋፔ ዴንዳ ፆሳ ኣያናይ ሂንቴ ጊዶን ዴዖፔ፥ ሃይቁዋፔ ኪሪስቶሳ ዴንዳ ፆሳይ ቃሲ ሂንቴንቱን ዴዒያ ባሬ ጌሻ ኣያናን፥ ሃይቂያ ሂንቴ ኣሳቴዉካ ዴዑዋ ኢማና።

12ሲሚ ታናዳን ኣማኒያዋንቶ፥ ኑኒ ኣጩዋና ዴዔቶ፤ ኑ ኣሳቴይ ኮዪያዋዳን ዴዓናው ኑሲ ቤሴና። 13ኣዪሲ ጎፔ፥ ሂንቴ ሂንቴ ኣሳቴይ ጊያዋዳን ዴዖፔ፥ ሂንቴ ሃይቃና፤ ሺን ሂንቴ ሂንቴ ናጋራ ኦሱዋ ጌሻ ኣያናን ዎፔ፥ ፓፃ ዴዓና። 14ፆሳ ኣያናይ ካሌያ ኡባቱ ፆሳ ናና። 15ኣዪሲ ጎፔ፥ ኑኒ ኑ ኮሻ ቁ ኦዴ፥ «ኣባ! ታ ኣቦ» ያጊዴ ፄሲያ፥ ኑና ፆሳ ናና ኬሲያ ጌሻ ኣያና ፆሳፔ ኣኬዶፔ ኣቲን፥ ላዔዋ ያያናው ኣይሌ ኬሲያ ኣያና ኣኪቤይኮ። 16ፆሳ ኣያናይ ባሬ ሁጴው ኑ ኣያናና ጊዲዴ፥ ኑኒ ፆሳ ናና ጊዲያዋ ማርካቴ። 17ኑኒ ኣ ናና ጊዶፔ፥ ኢ ባሬ ኣሳው ሚንጄዳ ኣንጁዋ ላታና፤ ቃሲ ኑኒ ፆሳይ ኪሪስቶሳው ሚንጄዳዋካ ኣናና ላታና፤ ኑኒ ኪሪስቶሳ ዋዪያ ኣናና ሻኮፔ፥ ኣ ቦንቹዋካ ኣናና ሻካና።

ፆሳ ናናው ቆንጫናው ዴዒያ ቦንቹዋ

18ኣዪሲ ጎፔ፥ ኑኒ ሃዒ ዋዬቲያ ዋዪያ ኑሲ ሲንፔ ቆንጫና ቦንቹዋና ጋናው፥ ኡባካ ዳንዳዬቴና ጋዴ ታኒ ቆፓይ። 19ፆሳይ ሜዳ ሜታ ኡባይ ፆሳ ናናይ ቆንጫናዋ ሎይ ላሞቲ ኡቴዳ። 20ኣዪሲ ጎፔ፥ ሜታ ኡባይ ማዱ ባይናባ ጊዳናዳን፥ ፆሳይ ኣ ቦላ ፒርዴዳ፤ ሲንፔ ዴማና ጊዴ ናሼቻን ናጊ ኡታናዳን ኡዴዳ ፆሳይ ኮዬዳ ዲራው ሃኔዳፔ ኣቲን፥ ሜታ ኡባይ ባሬ ሁጴው ኮዬዳዋን ጊዴና። 21ሜታ ኡባይ ባሬ ሁጴው ባሻ ኣይሌቴፔ ኢቲ ጋላሲ ኬሳናዋ፤ ቃሲ ሄ ሜታቱ ፆሳ ናናይ ኣይሌቴፔ ኬሴዳ ቦንቾ ኬሳ ሻካና። 22ኣዪሲ ጎፔ፥ ሜታ ኡባይ ኢቲፔ ሃዋ ጋካናው፥ ማጫ ኣሳ ዬሉ ኦይቂና ኦሊያዋዳን፥ ሳኩዋን ኦሊያዋ ኑኒ ኤሬቶ። 23ቃሲ ሄዋ ፃላላ ጊዴና፤ ኑኒ፥ ጌሻ ኣያና ፆሳ ባይራ ኢሞታዳን ኡዲዴ ኣኬዳዋንቱ፥ ኑ ሁጴው ቃሲ ፆሳይ ኑና ባሬ ናና ኦናዳኒኔ ኑ ኩሜን ኣሳቴ ዎዛናዳን ናጊዴ፥ ኑ ጊዶን ኦሌቶ። 24ኣዪሲ ጎፔ፥ ኑኒ ፆሳይ ኢማና ጌዳዋን ኣቴዶ። ሺን ኑኒ ፆሳይ ኢማና ጌዳዋ ቤዖፔ፥ ያቲና፥ ሄዌ ናሼቻን ናጊያዋ ጊዴና፤ ኣዪሲ ጎፔ፥ ባሬ ቤዒያዋ ዴማና ጊዴ፥ ናሼቻን ናጊያዌ ኦኔ? 25ሺን ኑኒ ቤዔናዋ ዴማና ጊዴ፥ ናሼቻን ናጎፔ፥ ሄዋ ዳንዳዪዴ ናጌቶ።

26ሃዋዳን ቃሲ ጌሻ ኣያናይ ኑ ዳቡራ ማዳናው ዬ፤ ኣዪሲ ጎፔ፥ ኑኒ ፆሳ ዎቲ ዎሳናው ቤሲንቶ ኤሮኮ፤ ሺን ጌሻ ኣያናይ ባሬ ሁጴው ቃላን ቆንጪሳናው ዳንዳዬቴና ኦሊያን ኑሲ ጋናቴ። 27ቃሲ ኣሳ ዎዛና ቢዲያ ፆሳይ፥ ጌሻ ኣያናይ ኢ ኮዪያዋዳን፥ ፆሳ ናቶ ጋናቲያ ዲራው፥ ጌሻ ኣያና ቆፋይ ኣዬንቶ ኤሬ።

28ፆሳይ ባሬና ሲቂያዋንቶ፥ ባሬ ቆፋዳን ፄሴዳዋንቶ፥ ኡባ ዬዉዋ ሎዖቴው ኦያዋ ኑኒ ኤሬቶ። 29ፆሳይ ባሬ ናዓይ ጮራ ኢሻቱዋ ጊዶን ባይራ ጊዳናዳን፥ ኢ ካሴ ኤሬዳዋንታ ቃሲ ባሬ ናዓ ማላታናዳን፥ ካሴቲዴ ቆፋ ቃቼዳ። 30ፆሳይ ካሴቲዴ ቆፔዳዋንታ፥ ኡንቱንታ ቃሲ ፄሴዳ፤ ሄ ፄሴዳዋንታካ ጌሼዳ፤ ሄ ጌሼዳዋንታካ ቃሲ ቦንቼዳ።

ፆሳ ሲቁዋ

31ያቲና፥ ኑኒ ሃዋ ኡባ ዋጋኔ? ፆሳይ ኑ ባጋ ጊዶፔ፥ ኑና ኦኒ ኤቄታናዌ? 32ኢ ሃራይ ኣቶ ባሬ ናዓካ ዋዪያፔ ጉዬ ኣሺቤና፤ ሺን ኣ ኑሲ ኡባው ኣዴ ኢሚ ኣጌዳ። ኢ ባሬ ናዓ ኢሜዳዌ ቃሲ ኑሲ ኡባባ ጮ ኢሜኔ?

33ፆሳይ ዶሬዳዋንታ ኦኔ ሞታናዌ? ፆሳይ ባሬ ሁጴው ኡንቱንታ ፂሊሴዳ። 34ያቲና፥ ኡንቱንቱ ቦላ ፒርዳናው ዳንዳዪያዌ ኦኔ? ሄዋ ጎፔ፥ ሃይቁዋፔ ዴንዲዴ፥ ፆሳፔ ኡሼቻ ባጋና ኡቴዳ፥ ኪሪስቶሲ ዬሱሳ፤ ኢ ቃሲ ኑሲ ጋናቴ።

35ሲሚ ኑና ኪሪስቶሳ ሲቁዋፔ ሻካናዌ ኦኔ? ዋዪ ዎይ ሜቱ ዎይ ዬዴርሱ ዎይ ኮሻይ ዎይ ካሉ ዎይ ያሻይ ዎይ ኦላይ ኑና ሻካኔ? 36ፆሳ ማፃፋይ፥ «ኑኒ ኔ ዲራው፥ ኡባ ጋላሲ ሃይቄቶ፤ ሹካው ኣፊያ ዶርሳዳን ፓይዴቴቶ» ያጌ። #ማዝ 44፡22 37ሺን ኑኒ ኑና ሲቄዳ ኣኒ ሃ ዬዉዋ ኡባን ኑና ፆኒያዋንቱፔ ኣቶ።

38-39ኣዪሲ ጎፔ፥ ሃይቁዋ ጊዲና፥ ዴዑዋ፥ ኪታንቻቱዋ ጊዲና፥ ሞዲያዋንታ፥ ሃዒ ዴዒያዋንታ ጊዲና፥ ሲንፔ ያናዋ፥ ዎልቃማቱዋ ጊዲና፥ ቦላ ሳሉዋ ጊዲና፥ ጋርሳ ሳዓ፥ ኣይ ሜታ ጊዲናካ፥ ኑ ጎዳ ኪሪስቶሳ ዬሱሳን ዴዒያ ፆሳ ሲቁዋፔ ኑና ሻካናው ዳንዳዬናዋ ታኒ ኤራዲ።

Currently Selected:

ሮሚያ 8: dwrENT

Highlight

Copy

Compare