ሮሚያ 7

ሙሴ ሂጊያ ቃሹዋፔ ቢሌቲያዋ

1ታናዳን ኣማኒያዋንቶ፥ ሂንቴንቱ ኡባይ ሂጊያ ኤሪያ ዲራው፥ ታኒ ጊያዋ ሎይ ኤሪታ፤ ሂጊ ኢቲ ኣሳይ ፓፃ ዴዔዳ ዎዴ ፃላላን ኣ ሞዴ። 2ኣዪሲ ጎፔ፥ ኣሲና ጌሌዳ ሚሺራታ ኢዚ ኣሲናይ ፓፃ ዴዔዳ ኬናን፥ ሂጊያን ኣናና ቃሼታ ኡታዱ፤ ሺን ኢዚ ኣሲናይ ሃይቆፔ፥ ኣናና ጫቄዳ ሂጊ ኢዞ ሞዴና። 3ሄዋ ዲራው፥ ኢዛ ባሬ ኣሲናይ ፓፃ ዴዒሺን፥ ሃራ ኣቱማዋ ጌሎፔ፥ ኣሳይ ኢዞ፥ «ዎሹሜዉኖ» ጋና። ሺን ኢዚ ኣሲናይ ሃይቆፔ፥ ሂጊ ኢዞ ሞዴና፤ ኢዛ ሃራ ኣሲና ጌሎፔኔ ኢዞ ኦኒኔ፥ «ዎሹሜዉኖ» ጌና።

4ታናዳን ኣማኒያዋንቶ፥ ሄዋዳን ሂንቴንቱ ቃሲ ኪሪስቶሳ ኣሳቴፔ ኢቲ ባጋ ጊዲያ ዲራው፥ ሂንቴንቱ ኣባጋና ሃይቄዲታ። ቃሲ ኑኒ ፆሳ ማዲያ ኦሱዋ ኦና ማላ፥ ሂንቴንቱ ፆሳይ ሃይቁዋፔ ዴንዳ ኪሪስቶሳዋንታ። 5ኣዪሲ ጎፔ፥ ኑኒ ኑ ኣሳቴይ ኮዬዳዋዳን ዴዒያ ዎዴ፥ ሂጊ ኑኒ ናጋራ ኦናዳን፥ ኑና ዴን፤ ኑ ኣሳቴ ጊዶን ኢታ ኣሙ ዴዒያ ዲራው፥ ኑኒ ሃይቆ ኣይፊያ ኣይፌዶ። 6ሺን ሃዒ ኑኒ ኑና ቃቼዳዎ ሃይቄዳ ዲራው፥ ፆሳይ ኑና ሂጊያ ቃሹዋፔ ቢሌዳ። ሄዋ ዲራው፥ ኑኒ ጌሻ ኣያናይ ጊጊሴዳ ኦራ ኦጊያን ፆሳው ኤኖ ጋናዋፔ ኣቲን፥ ፃፌቴዳ ሂጊ ኑሲ ጊጊሴዳ ኤጫ ኦጊያን ኤኖ ጎኮ።

ሂጊያኔ ናጋራ

7ያቲና፥ ኑኒ ዋጋኔ? ሂጊ ባሬ ሁጴው ናጋሬ? ሄዋ ጊዴና፤ ሺን ሂጊ ናጋራይ ኣዬንቶ ታና ኤሪሴዳ። ኣዪሲ ጎፔ፥ ታኒ ሂጊ፥ «ኣሳባ ኣሞቶፓ» ጊቤኔንቶ፥ ኣሳባ ኣሞቲያዌ ኣዬንቶ ኤሪኬ። #ኬስ 20፡17 8ሺን ናጋራይ ታኒ ኡባባ ኣሞታና ማላ፥ ኣዛዙዋ ባጋና ታ ቦላ ኦጊያ ዴሜዳ፤ ኣዪሲ ጎፔ፥ ሂጊ ባዌንቶ፥ ናጋራው ዎልቃይ ባዋ።

9ካሴ ሂጊ ባይና ዎዴ ታኒ ፓፃ፤ ሺን ኣዛዙ ዬዳ ዎዴ ናጋራይ ዴዖ ሲሚና፥ 10ታኒ ቃሲ ሃይቃዲ፤ ታና ፓፃ ዎናው ፆሳይ ቆፔዳ ኣዛዙ፥ ታው ሃይቁዋ ኣሄዳ። 11ኣዪሲ ጎፔ፥ ናጋራይ ኣዛዙዋ ባጋና ታና ጪሚያ ኦጊያ ዴሚዴ፥ ሄ ኣዛዙዋን ታና ዎዳ። #ዶም 3፡13

12ሄዋ ዲራው፥ ሂጊ ጌሻ፤ ኣዛዙካ ጌሻ፥ ፂላኔ ሎዓ።

13ያቲና፥ ሎዖባይ ታው ሃይቁዋ ኣሄዴ? ሄዋ ጊዴና፤ ሺን ታው ሄዋ ናጋራይ ኣሄዳ፤ ኣሳይ ናጋራይ ኣዬንቶ ሻኪዴ ኤራና ማላ፥ ናጋራይ ሎዖባ ባጋና፥ ታው ሃይቁዋ ኣሄዳ። ቃሲ ኣዛዙ፥ «ኦኒኔ ናጋራ ኦናው ቤሴና» ያጊያ ዲራው፥ ናጋራይ ካሴዋፔ ኣ ኢቴዳ።

ኣሳ ዴዑዋ ጋርሳን ዴዒያ ባፂያ

14ኑኒ ሂጊ ፆሳዋ ጊዲያዋ ኤሬቶ፤ ሺን ታኒ ታና ናጋራው ዛሊዔዳ ሃይቂያ ኣሳ፤ 15ታኒ ኦያዋ ዎዛና ኣኬ፤ ኣዪሲ ጎፔ፥ ታኒ ኢፂያዋ ኦይፔ ኣቲን፥ ታኒ ኦናው ዶሲያዋ ኦኬ።#ጋል 5፡17 16ታኒ ኢፂያዋ ኦያዋ ጊዶፔ፥ ሂጊ ሎዓ ጊዲያዋ ማርካታይ። 17ሄዋ ጊዶፔ፥ ሄ ዬዉዋ ታ ቦላ ዴዒያ ናጋራይ ኦያዋፔ ኣቲን፥ ሃዒ ታኒ ኦኬ።

18ታናን፥ ሄዌኔ ታ ኣሳቴን ሎዖባይ ዴዔናዋ ታኒ ኤራይ፤ ኣዪሲ ጎፔ፥ ሎዖባ ኦያ ኣሙ ታ ቦላ ዴዖፔካ፥ ታኒ ሄ ሎዖባ ኦናናው ዳንዳዪኬ። 19ታኒ ኢፂያ ኢታባ ኦይፔ ኣቲን፥ ታኒ ዶሲያ ሎዖባ ኦኬ። 20ሺን ታኒ ኢፂያዋ ኦያዋ ጊዶፔ፥ ሄዋ ታ ቦላ ዴዒያ ናጋራይ ኦያዋፔ ኣቲን፥ ሃዒ ሄዋ ኦያዌ ታና ጊዲኬ።

21ሲሚ ታኒ ሎዖባ ኦናው ዶሲሺን፥ ኢታባ ኦያዌ ታው ሂጌ ጊዲያዋ ዴማዲ። 22ኣዪሲ ጎፔ፥ ታኒ ታ ዎዛና ጊዶን ፆሳ ሂጊያን ናሼታይ፤ 23ሺን ታ ቦላ ጊዶን ዴዒያ ታ ዎዛና ቆፋ ሂጊያና ዋቲያ ዱማ ሂጊያ ቤዓይ። ሄ ሂጊ ታ ቦላ ጊዶን ዴዒያ ናጋራ ኦሲሲያ ሂጊያን ታና ቃሺሴ። 24ታኒ ኣይባ ናሼቺ ባይና ኣሴ! ታና ሃይቆ ኣፊያ ሃ ኣሳቴፔ ኣሻናዌ ኦኔ? 25ኑ ጎዳ ዬሱሲ ኪሪስቶሳ ባጋና ፆሳው ጋላታይ ጊዶ።

ሲሚ ታኒ ታ ዎዛና ቆፋን ፆሳ ሂጌው ኤኖ ጋይ። ሺን ታ ኣሳቴን ታና ናጋራ ኦሲሲያ ሂጌው ኤኖ ጋይ።

Currently Selected:

ሮሚያ 7: dwrENT

Highlight

Copy

Compare