ሮሚያ 6

ናጋራፔ ሻኬቲዴ ኪሪስቶሳን ዴዑሳ

1ያቲና፥ ኑኒ ዋጋኔ? ፆሳ ኣ ኬካቴይ ዳራናዳን፥ ናጋራን ሚኒዴ ዴዓኔ? 2ጊዴና፤ ኑኒ ናጋራ ኦና ማላ ሃይቂዲጌዶ። ያቲና፥ ኑኒ ሃዋፔ ሲንው ዎቲ ኣ ጊዶን ዴዓኔ? 3ዎይ ኑኒ ኡባቱ ኪሪስቶሳ ዬሱሳና ኢቲፔ ጊዳናው፥ ፃማቄቴዳ ዎዴ፥ ኣ ሃይቁዋንካ ኣናና ኢቲፔ ጊዳናው ፃማቄቴዳዋ ኤሪኪቴ? 4ሄዋ ዲራው፥ ኪሪስቶሲ ባሬ ኣዉዋ ቦንቾ ዎልቃን ሃይቁዋፔ ዴንዶዋዳን፥ ኑኒካ ኦራ ዴዑዋ ዴዓናው፥ ኣ ሃይቁዋ ኣናና ሻካናው ፂንቃታኒ ኣናና ኢቲፔ ሞጌቴዶ።

5ኣዪሲ ጎፔ፥ ኑኒ ኢ ሃይቄዳዋዳን ሃይቂዴ፥ ኣናና ኢቱዋ ጊዶፔ፥ ሃዋዳንካ፥ ሃይቁዋፔ ኢ ዴንዶዋዳን ኑኒካ ዴንዲዴ፥ ኣናና ኢቱዋ ጊዳና። 6ኑኒ ሃዋፔ ሲንው ናጋራው ኣይሌ ጊዴና ማላ፥ ቃሲ ኑ ናጋራንቻ ኣሳቴ ዎልቃይ ያና ማላ፥ ኑ ኤጫ ኣሳቴ ኪሪስቶሳና ማስቃሊያ ቦላ ሚሲማሪያን ሼቲ ካቄቴዳዋ ኤሬቶ። 7ኣዪሲ ጎፔ፥ ኢቲ ኡራይ ሃይቂያ ዎዴ ናጋራ ዎልቃይ ኣ ሞዴና፤ ሺን 8ኑኒ ኪሪስቶሳና ሃይቄዳዋ ጊዶፔ፥ ኣናና ቃሲ ዴዓናዋ ኣማኔቶ። 9ኣዪሲ ጎፔ፥ ኪሪስቶሲ ሃይቁዋፔ ዴንዴዳዋ፥ ቃሲ ላዔንዋ ኢ ሃይቄናዋኔ ሃይቁ ሲንፔ ኣ ሞዴናዋ ኑኒ ኤሬቶ። 10ኢ ኢቲ ካላካ ሃይቄዳ፤ ናጋራው ኣ ቦላ ዎልቃይ ባዋ፤ ሺን ኢ ሃ ዴዒያ ዴዑዋ ፆሳው ዴዔ። 11ሃዋዳን ቃሲ ሂንቴ ናጋራ ኦናዳን፥ ሂንቴንታ ሃይቄዳዋዳን ቆፒቴ፤ ሺን ጎዳ ኪሪስቶሳ ዬሱሳ ባጋና ፆሳው ሂንቴ ፓፃ ዴዒያዋዳን፥ ሂንቴንታ ቆፒቴ።

12ሄዋ ዲራው፥ ሂንቴ ሂንቴንቱ ኣሳቴ ኣሙዋሲ ኣዛዜታና ማላ፥ ናጋራይ ሃይቂያ ሂንቴ ኣሳቴ ሞዶፖ። 13ቃሲ ሂንቴ ኣሳቴፔ ኢቲ ሳኔ ኢታ ኦሱዋ ኦናው ናጋራው ኢሞፒቴ፤ ሺን ሃይቁዋፔ ዴንዴዳ ኣሳዳን ሂንቴንታ ፆሳው ኢሚቴ፤ ቃሲ ሂንቴ ኩሜን ኣሳቴካ ፂሎ ኦሱዋ ኦናው ፆሳው ኢሚቴ፤ 14ኣዪሲ ጎፔ፥ ናጋራይ ሂንቴንታ ሞዳናው ዳንዳዬና፤ ሂንቴ ፆሳ ኣ ኬካቴ ጋርሳና ዴዒታፔ ኣቲን፥ ሂጊያፔ ጋርሳና ዴዒኪታ።

ፂሎቴው ኣይሌ ጊዲያዋ

15ያቲና፥ ዋናኔ? ፆሳ ኣ ኬካቴ ጋርሳና ዴዒኖፔ ኣቲን፥ ሂጊያፔ ጋርሳና ዴዔና ዲራው፥ ናጋራ ኦኔ? ጊዴና፤ 16ሂንቴ ሂንቴንታ ኢቲ ኡራው ኣዛዜታናው፥ ኣይሊያዳን ኦዴ ኢሚያ ዎዴ፥ ሄ ሂንቴንታ ኣዛዚያዎ ኣይሌቱዋ ጊዲያዋ ኤሪታ፤ ዎይ ሂንቴ ሂንቴንቶ ሃይቁዋ ኣሂያ ናጋራው ኤኖ ጊታ፤ ዎይ ሂንቴ ሂንቴንታ ፂሎ ኦያ ኣዛዞ ኤኖ ጊታ። 17ሺን ፆሳው ጋላታይ ጊዶ፤ ኣዪሲ ጎፔ፥ ናጋራው ካሴ ሂንቴ ኣይሌ፤ ሺን ጉዬፔ ሂንቴ ኣኬዳ ቲሚርቲያ ጊዶን ዴዒያ ቱማቴው ሂንቴ ኩሜን ዎዛናፔ ኣዛዜቴዲታ። 18ሂንቴንቱ ናጋራ ኣይሌቴፔ ኬሲዴ፥ ፂሎቴው ኣይሌ ጊዴዲታ።

19ሂንቴንቱ ሜታን ዳቡራንቻ ጊዲያ ዲራው፥ ታኒ ኦሲካ ጌሊያ ሃሳያ ሃሳያይ፤ ሂንቴ ካሴ ሂንቴ ኩሜን ኣሳቴ ናቁዋ ኦናው፥ ቱናቴዉኔ ናቆ ኣይሌ ኡዲዴ ኢሜዲታ፤ ሃዒ ሄዋዳንካ ሂንቴ ኩሜን ኣሳቴ ጌሻባ ኦናው፥ ፂሎቴው ኣይሌ ኡዲዴ ኢሚቴ።

20ሂንቴንቱ ናጋራው ኣይሌቲዴ ዴዒያ ዎዴ፥ ፂሎቴይ ሂንቴንቶ ጎዳ ጊዴና። 21ሂንቴንታ ሃዒ ዬላዪያ ዬዋቱዋ ሄ ዎዴ ኦዳዋፔ ኣይ ማዱዋ ዴሜዲቴ? ኣዪሲ ጎፔ፥ ሄ ዬዋቱዋ ዉርሴይ ሃይቁዋ። 22ሺን ናጋራ ኣይሌቴፔ ሂንቴ ኬሲዴ፥ ፆሳው ኤኖጌዲታ፤ ቃሲ ሂንቴ ኦያ ኡባባኒ ሂንቴንታ ኡባካ ኣው ኣዴ ኢሜዲታ። ሄዌ ሂንቴንቶ ዎሬ፤ ሄዋ ዉርሴይ ሜና ዴዑዋ። 23ኣዪሲ ጎፔ፥ ናጋራ ጋቲ ሃይቁዋ። ሺን ፆሳይ ኑ ጎዳ ኪሪስቶሳ ዬሱሳ ባጋና ኢሚያ ኢሞታይ ሜና ዴዑዋ።

Currently Selected:

ሮሚያ 6: dwrENT

Highlight

Copy

Compare