ሮሚያ 13

ጋዲያ ኣዪሲያዋንቱሲ ኤኖ ጋናው ቤሴ

1ኣሳይ ኡባይ ጋዲያ ኣዪሲያዋንቱሲ ኤኖ ጋናው ቤሴ፤ ኣዪሲ ጎፔ፥ ፆሳይ ጌናን ዴዒሺን፥ ጋዲያ ኣዪሲያዌ ዴዓናው ዳንዳዬና። ሃዒ ዴዒያ ኣዪሲያዋንቱካ ፆሳይ ዎዳዋንታ። 2ሄዋ ዲራው፥ ሃዒ ዴዒያ ኣዪሲያዋንታ ኢፂያ ኦኒኔ ፆሳ ኣዛዙዋ ኢፄ፤ ባሬ ቦላ ፒርዳ ኣሄ። 3ኣዪሲ ጎፔ፥ ኣዪሲያዋንቱ ኢታባ ኦያዋንታ ያሻናዋፔ ኣቲን፥ ሎዖባ ኦያዋንታ ያሺኪኖ። ኣዪሲያዎ ያዬናን ኣጋናው ኮያይ? ያቶፔ ሎዖባ ኦ፤ ኢ ኔና ጋላታና። 4ኣዪሲ ጎፔ፥ ኢ ኔው ሎዖባ ኦናው፥ ፆሳው ቆማ። ሺን ኔኒ ኢታባ ኦፔ፥ ኢታባ ኦዳዋ ኢ ሴሪያ ዲራው፥ ኣው ያያ፤ ኢ ፆሳ ቆማ። ቃሲ ኢታባ ኦያዋንቱ ቦላ ፆሳ ሃንቁዋ ኢ ኣሄ። 5ሄዋ ዲራው፥ ጋዲያ ኣዪሲያዋንቱሲ ኤኖ ጊያዌ ፆሳ ሙራ ፃላላሳ ጊዴናን፥ ሂንቴንቱ ዎዛና ቆፋ ዲራዉካ ኤኖ ጋናው ቤሴ።

6ኣዪሲ ጎፔ፥ ጋዲያ ኣዪሲያዋንቱ ባሬንቱ ኦሱዋ ኦያ ዎዴ፥ ፆሳው ኦያ ዲራው፥ ሂንቴ ቃራፃ ቃንፂያዌ ሄዋሳ። 7ኡባ ኣሳዉካ ቤሲያዋ ኢሚቴ። ጊራ ጊራናው ቤሲያዎ ጊሪቴ፤ ቃራፃ ቃንፃናው ቤሲያዎ ቃንፂቴ፤ ያያናው ቤሲያዎ ያዪቴ፤ ቦንቹ ቤሲያዋ ቦንቺቴ።

ኢቱ ኢቱዋና ሲቄቲቴ

8ሂንቴንቱ ኢቱ ኢቱዋና ሲቄታናፔ ኣቲን፥ ሃራ ኣጩ ኦ ቦላኒኔ ዴዖፖ። ኣዪሲ ጎፔ፥ ሃራ ሲቂያ ኦኒኔ ሂጊ ጊያዋ ፖሌዳ። 9«ዎሹሞፓ፤ ዎፓ፤ ዉዖፓ፤ ኣሳባ ኣሞቶፓ» ጊያ ኣዛዛቱኔ ሃራ ኣዛዛቱ ኡባቱ፥ «ኔ ሾሩዋ ኔ ሁጲያዳን ሲቃ» ጊያ ኣዛዙዋን ኩሚኖ። #ኬስ 20፡13-15፣ 17፤ ዛር 5፡17-19፣ 21፤ ዎግ 19፡18 10ባሬ ሾሩዋ ሲቂያ ኦኒኔ ኣው ኢታባ ኦና፤ ሄዋ ዲራው፥ ሾሩዋ ሲቂያዌ ሂጊያ ኡባው ኤኖ ጊያዋ።

11ጌሚዑሹዋፔ ሂንቴ ቤጎቲያ ሳቲ ሃዒ ጋኬዳ ዲራው፥ ሃ ዎዲያ ኣኬኪቴ። ኣዪሲ ጎፔ፥ ኑኒ ኮይሮ ኣማኔዳ ዎዲያፔ፥ ኑኒ ኣቲያ ዎዲ ሃዒ ኑኮ ማታቴዳ። 12ቃማይ ኣናው ሃኔ፤ ጋላሳይ ማታቴዳ። ሲሚ ኑኒ ማ ኦሱዋ ኣጊዴ፥ ፖዑዋን ኦሌታናው፥ ኦላ ሚሻ ማዮይቴ፤ 13ጋላሲ ፖዑዋን ዴዒያ ኣሳዳን፥ ኣኔ ማራ ዴዖይቴ። ዬኒኔ ማዋን ጊዶፖ፤ ዎሹሙሳኒኔ ዎሹማናው ካጄሉሳና ጊዶፖ፤ ፓሉማኒኔ ቃናቲያን ጊዶፖ። 14ሺን ጎዳ ዬሱሲ ኪሪስቶሳ፥ ኦላ ሚሻ ኣ ማዪቴ፤ ሂንቴ ናጋራንቻ ኣሳቴይ ባሬ ዎዛና ኣሙዋ ፖላናዳን፥ ኣው ቆፖፒቴ።

Currently Selected:

ሮሚያ 13: dwrENT

Highlight

Copy

Compare