ሮሚያ 12
12
ፆሳው ኦናዳን ኑኒ ዋኒዴ ዴዓናው ቤሲ?
1ሲሚ ታናዳን ኣማኒያዋንቶ፥ ሂንቴ ሂንቴ ኦናቴ ፆሳ ናሼቺያ ዴዖኔ ጌሻ ያርሹዋ ኡዲዴ፥ ፆሳው ሺሻናዳን፥ ታኒ ሂንቴንታ ፆሳ ማሮቴን ዎሳይ፤ ፆሳው ሂንቴ ጎዪናናው ቤሲያ ቱሙ ኦጊ ሄዋ። 2ፆሳይ ሂንቴ ቆፋ ኡባና ዱማዪዴ፥ ሂንቴንታ ላሞፔ ኣቲን፥ ሃ ኣላሚያ ኣሳ ማላቶፒቴ። ሄ ዎዴ ሂንቴ፥ ፆሳ ሼኒ፥ ሎዖባይ፥ ኣ ናሼቺያባይኔ ቃሲ ፖሎ ጊዴዳባይ ኣዬንቶ ኤራኒታ።
3ፆሳይ ታው ኢሜዳ ኣ ኬካቴን ታኒ ሂንቴንቶ ኦዳይ። ሂንቴንቱ ቆፓናው ቤሲያዋፔ ኣዴ፥ ኦቶሩዋን ቆፖፒቴ፤ ሄዋ ኣጊዴ፥ ዎዛናማ ኣሳዳን ቆፒቴ፤ ፆሳይ ሂንቴንቶ ሁጲያን ሁጲያን ኢሜዳ ኣማኑዋ ኬናን ሂንቴ ቦላ ፒርዲቴ። 4ኑ ኢቲ ቦላ ጊዶን፥ ጮራ ቦላ ቆሞቱ ዴዒኖ፤ ሄ ቆሞቱዋ ኡባዉካ ዱማ ዱማ ኦሱ ዴዔ። 5ሃዋዳን፥ ኑኒ ጮራ ኣሳ ጊዶፔካ፥ ኪሪስቶሳ ባጋና ኢቲ ኣሳ። ቃሲ ኑኒ ኢቲ ኣሳቴ ቆሞቱዋዳን፥ ኢቱ ኢቱዋና ኦይቄቲ ኡቴዶ። 6ፆሳይ ኑሲ ኢሜዳ ኣ ኬካቴን ዱማ ዱማ ኢሞታይ ዴዔ። ኑ ኢሞታይ ናቤቴ ጊዶፔ፥ ኑሲ ዴዒያ ኣማኑዋ ኬና ኦዳናው ቤሴ። 7ሃራቱዋ ማዱሳ ጊዶፔ፥ ሄ ኦሱዋን ሚናናው ቤሴ፤ ታማሪሱሳ ጊዶፔ፥ ሄ ታማሪሱዋን ሚናናው ቤሴ። 8ሃራ ኣሳቱዋ ሚኒሱሳ ጊዶፔ፥ ሄ ኦሱዋን ሚናናው ቤሴ። ባሬ ሁጴው ዴዒያባፔ ሃራቱዋሲ ኢሚያ ኦኒኔ ዎዛናፔ ኢሞ። ማታይ ዴዒያ ኡራይ ሚኒሲ ኦናው ቤሴ፤ ሃራቱዋሲ ኬኪያ ኡራይ ናሼቻን ኬካናው ቤሴ።
9ሂንቴንቱ ሲቁ ኣሳ ቤሳናው ሲቄቲያዋ ጊዳናው ቤሴና። ኢታባ ኢፂቴ፤ ሎዖባ ሚኒሲዴ ኦይቂቴ። 10ኢቱ ኢቱዋና ኢሻቱዋዳን ሲቄቲቴ፤ ኢቱ ኢቱዋ ቦንቺያዋን ናሼቲቴ። 11ሚኒዴ ኦቴ፤ ኣዛሎፒቴ፤ ሂንቴ ኩሜን ዎዛናፔ ጎዳው ኦቴ። #12፡11 ኩሜን ዎዛናፔ ጎዳው ኦቴ፡ ጌሻ ኣያናኒ ካሌሴቲዴ ኪቴቲያዋንታ ጊዲቴ። 12ፆሳይ ሂንቴንቶ ኢማና ጌዳዋን ናሼቲቴ፤ ዋዪያን ጌንጪቴ። ኡባ ዎዴ ፆሳ ዎሲቴ፤ 13ፆሳ ኣሳቱዋ ኮሺያባን ማዲቴ፤ ኢማ ሞኪቴ።
14ሂንቴንታ ዬዴርሲያዋንታ ኣንጂቴ፤ ኡንቱንታ ኣንጂቴፔ ኣቲን፥ ሼቆፒቴ። 15ናሼቲያዋንቱና ናሼቲቴ፤ ዬኪያዋንቱናካ ዬኪቴ። 16ኣሳ ኡባው ኢቲ ማላ ቆፋ ቆፒቴ፤ ኦያባን ኡባን ሂንቴንታ ቶቺዴ ዴዒቴፔ #12፡16 ሂንቴንታ ቶቺዴ ዴዒቴ፡ ኣሺኬ ጊዲቴ ጉሳ። ኣቲን፥ ኦቶሬቶፒቴ፤ ሂንቴንታ ሂንቴሬካ ኣ ኤራንቻ ጊዴ ቆፖፒቴ። #ሌም 3፡7
17ኦኒኔ ሂንቴንቶ ኢታባ ኦፔ፥ ሄ ኡራው ኢታባ ኦ ዛሮፒቴ፤ ኣሳ ኡባው ሎዖባ ኦናው ቆፒቴ። 18ኣሳ ኡባና ሳሮቴን ዴዓናው፥ ሂንቴ ባጋና፥ ሂንቴንቶ ዳንዳዬቴዳባ ኡባ ኦቴ። 19ታናዳን ኣማኒያዋንቶ፥ ሂንቴ ሂንቴ ሁጴው ኣሳው ሃሉዋ ኬሶፒቴ። ፆሳይ ሃሉዋ ኬሳናዳን፥ ኣ ቦላ ኦሊቴ። ኣዪሲ ጎፔ፥ ፆሳ ማፃፋይ፥
«ጎዳይ፥ ‹ታኒ ሃሉዋ ኬሳና፤
ታኒ ኩሺያ ጪጋና› ጌ»
ያጌ። #ዛር 32፡35
20ሺን ፆሳ ማፃፋይ፥
«ኔ ሞርኪ ኮሻቶፔ፥ ሚዛ።
ሳሜቶፔ፥ ኡሻ።
ኣዪሲ ጎፔ፥ ኔኒ ሄዋ ኦያዋን
ኣ ዳሪሳ ዬላያሳ»
ያጌ። #ሌም 25፡21-22
21ኢታባ ሎዖባን ፆናፔ ኣቲን፥ ኢታባይ ኔና ፆኖፖ።
Currently Selected:
ሮሚያ 12: dwrENT
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa
