ዬሱሲ ኪቴዳዋንቱ ኦሱዋ 10

ጴፂሮሳኔ ቆርኔሊዮሳ

1ቂሳሪያን «ፃላቱዋ ኦላ ኣሳቱዋ» ጌቴቲያ ኦላንቻቶ ኢቲ ፄታቱዋ ካፑ ቆርኔሊዮሳ ጊያዌ ዴዔ። 2ቆርኔሊዮሲ ፆሳ ሎይዴ ኣማኒያ ኣሳኔ፥ ባሬ ሶይ ኣሳ ኡባና ኢቲፔ ፆሳሲ ጎዪኒያ ኣሳ፤ ኣዪሁዳ ሂዬሳካ ኢ ዳሮ ማዴ፤ ቃሲ ፆሳ ኡባ ዎዴ ዎሴ። 3ኢቲ ጋላሲ ኡዱፑ ሳቲያ ሄራን፥ «ቆርኔሊዮሳ» ጊዴ ፄሲያ ፆሳ ኪታንቻይ ባሬኮ ጌሊሺን፥ ቆርኔሊዮሲ ሳፃን ጌሺዴ ቤዔዳ።

4ቆርኔሊዮሲ ያዪዴ፥ ኪታንቻ ጫዲ ፄሊዴ፥ «ታ ጎዳው፥ ኢ ኣዬ?» ያጌዳ።

ኪታንቻይ ዛሪዴ፥ ሃዋዳን ያጌዳ፤ «ኔ ዎሳይኔ ኔኒ ሂዬሳ ማዲያዌ ፆሳ ሲንን ሃሳዬታናው ሳሉዋ ቤዳ። 5ሃዒ ዮጴ ኣሳ ኪታዴ፥ ጴፂሮሳ ጌቴቲያ ሲሞና ኣሂሳ። 6ጴፂሮሲ ኣባ ዶናን ዴዒያ ጋልባ ቃጪያ ሲሞና ጎሌን ኢማቴኒ ኡቴዳ፤ ኔኒ ኦናው ቤሲያዋ ኢ ኔው ኦዳናዋ» ያጌዳ።

7ቆርኔሊዮሲ ባሬው ኦዴዳ ኪታንቻይ ቢና፥ ባሬ ቆማቱዋፔ ላዓቱዋኔ ፆሳሲ ጎዪኒያ ባሬፔ ሻኬቴና ዎታዳራቱዋፔ ኢቱዋ ፄሲዴ፥ 8ኡንቱንቶ ኡባባ ኦዲዴ፥ ኡንቱንታ ዮጴ ኪቴዳ።

9ዎንቴ ጋላሲ ኡንቱንቱ ቢዴ፥ ዮጴ ካታማኮ ማቲሺን፥ ጴፂሮሲ ኡሱፑን ሳቲያ ሄራን ጎሊያ ቦላን ዴምባዪዴ ኦዳሳ ፆሳ ዎሳናው ኬሴዳ። 10ቃሲ ኮሻቲዴ፥ ቁማ ማናው ኮዬዳ፤ ሺን ቁማይ ካዒሺን፥ ሳፃ ቤዔዳ። 11ሳሉ ዶዬቲና፥ ዎልቃማ ማዩዋ ማላቲያባይ ኦይዱ ባጋና ኦይቄቲዴ፥ ሳዓን ዎሺን፥ ጴፂሮሲ ቤዔዳ። 12ሄዋን ኦይዱ ጌዲያና ዴዒያ ሜሂ፥ ዶዓይ፥ ሾሻይ፥ ዛሪኔ ካፉ ኡባይ ዴዔ። 13«ጴፂሮሳ፥ ዴንዳ ኤቃዴ ሹካ ማ» ጊያ ቃላይ ኣኮ ዬዳ።

14ሺን ጴፂሮሲ፥ «ታ ጎዳው፥ ሃኔና! ታኒ ቱናባኔ ሼኔዪያባ ኡባካ ማ ኤሪኬ» ያጌዳ።

15ቃሲ ላዔንዋ፥ «ፆሳይ ጌሼዳዋ ኔኒ ቱኒሶፓ» ጊያ ቃላይ ኣኮ ዬዳ። 16ሄዙ ጌዴ ሄዋዳን ጌዳ፤ ሄዋፔ ጉዪያን፥ ኤሌካ ሄ ዎልቃማ ማዩዋ ማላቲያዌ ፑዴ ሳሉዋ ኣኬቲ ኣጌዳ።

17ጴፂሮሲ ባሬ ቤዔዳ ሳፃ ቢሌይ ኣያ ጊዳንዴሻ? ያጊዴ፥ ባሬ ዎዛና ጊዶን፥ «ላ ሃዌ ኣዬ?» ጊሺን፥ ቆርኔሊዮሲ ኪቴዳ ኣሳቱ ሲሞና ጎሊ ዴዒያሳ ኮዪዴ፥ ኣ ፔንጊያን ኤቄዲኖ። 18ባሬንቱ ኮሻ ቁ ኦዴ፥ «ጴፂሮሳ ጌቴቲያ ሲሞና ጊያ ኢማይ ሄዋን ዴዒ?» ያጊዴ ኦቼዲኖ።

19ጴፂሮሲ ሳፃን ቤዔዳባ ኣኬካናው ቆፋን ሼኪዴዒሺን፥ ጌሻ ኣያናይ ኣ፥ «ቤዓ፥ ሄዙ #10፡19 ሄዙ፡ ኢቲ ኢቲ ማፃፋቱ ጮራ ጊኖ፤ ኢቲ ማፃፋይ ላዑ ያጌ። ኣሳቱ ኔና ኮዪኖ፤ 20ዴንዳዴ ዎ፤ ታኒ ኡንቱንታ ኪቴዳ ዲራው፥ ሲናን ኡንቱንቱና ባ» ያጌዳ።

21ጴፂሮሲ ኣሳቱዋኮ ዎዴ፥ «ሂንቴንቱ ኮዪያዌ ታና። ኣያ ኣካና ዬዲቴ?» ያጌዳ።

22ኡንቱንቱ፥ «ፆሳሲ ያዪያ ፂሉ ኣዪሁዳ ኣሳ ኡባን ዳሮ ቦንቼቴዳ ፄታቱዋ ካፑዋ ቆርኔሊዮሲ፥ ኔና ባሬ ሶይ ኣፊሲዴ፥ ቃላ ኔፔ ሲሳና ማላ፥ ፆሳ ጌሻ ኪታንቻይ ኣው ኦዴዳ» ያጌዲኖ። 23ጴፂሮሲ ኣሳቱዋ ኢማ ኡዲ ሾባናው ሶይ ሞኬዳ።

ዎንቴ ጋላሲ፥ ዴንዲዴ ኡንቱንቱና ቤዳ፤ ዮጴ ካታማን ዴዒያ ኢሻቱዋፔ ኢቱ ኢቱ ኣናና ኢቲፔ ቤዲኖ። 24ዎንቴ ጋላሲ፥ ቂሳሪያ ጋኬዲኖ፤ ቆርኔሊዮሲ ባሬ ዳባቱዋኔ ባሬ ላጌቱዋ ኢቲፔ ፄሲ ሺሺዴ፥ ጴፂሮሳ ናጌ። 25ጴፂሮሲ ጌላና ሃኒሺን፥ ቆርኔሊዮሲ ኣናና ጋኬቲዴ፥ ኣ ሲንን ኩንዲዴ፥ ኣው ጎዪኔዳ። 26ሺን ጴፂሮሲ፥ «ዴንዳ! ታኒካ ታ ሁጴው ኣሳ» ያጊዴ ኣ ዴንዳ።

27ጴፂሮሲ ቆርኔሊዮሳና ሃሳዪዴ፥ ሶይ ጌሌዳ፤ ኢ ጌሊያ ዎዴ ጮራ ኣሳይ ሺቄዳዋ ዴሚዴ፥ 28ኣሳ፥ «ኣዪሁዳ ኣሳይ ሃራ ዛሪያና ኢቲፔቴን ዴዓናው፥ ዎይ ጋኬታናው ዎጋ ጊዴናዋ ሂንቴ ሁጴው ኤሪታ፤ ሺን ታኒ ኦናኔ ቱና ዎይ ሼኔዪያባ ጌና ማላ፥ ፆሳይ ታና ቤሴዳ። 29ሄዋ ዲራው፥ ሂንቴ ታው ኪቲና፥ ፓሉማይ ባይናን ያዲ። ሃዒ፥ ‹ታና ኣዪሲ ኣሂሴዲቴ?› ያጋዴ ሂንቴንታ ኦቻይ» ያጌዳ።

30ቆርኔሊዮሲ ሃዋዳን ያጌዳ፤ «ታኒ ሃቼ ኦይዱ ጋላሳፔ ካሴ ሃ ሳቲያን ኡዱፑ ሳቲያ ዎሳ ታ ሶዪን ፆሳ ዎሲሺን፥ ጶልቂያ ማዩዋ ማዬዳ ኣሳይ ታ ሲንን ኤቂዴ፥ 31ታና፥ ‹ቆርኔሊዮሳ፥ ፆሳይ ኔ ዎሳ ሲሴዳ፤ ኔኒ ሂዬሳ ማዲያዋካ ሃሳዬዳ። 32ሲሚ ኣሳ ዮጴ ኪታዴ፥ ሲሞኒ ጴፂሮሳ ጊያዋ ፄሲሳ፤ ሲሞኒ ጴፂሮሲ ሲሞና ጊያ ጋልባ ቃጪያዋ ጎሌን ኣባ ዶናን ኢማቴ ኡቴዳ› ያጌዳ። 33ሄዋ ዲራው፥ ታኒ ኔኮ ኤሌካ ኪታዲ፤ ኔኒኔ ያዴ ሎይዳ፤ ሲሚ ኔኒ ኑሲ ኦዳናው ፆሳይ ኔና ኣዛዜዳዋ ኡባ ሲሳናው ሃዒ ኑኒ ኡባይ ሃዋን ፆሳ ሲንን ዴዔቶ» ያጌዳ።

ጴፂሮሳ ሃሳያ

34-35ጴፂሮሲ ሃሳያ ሃዋዳን ያጊ ዶሜዳ፤ «ፆሳይ ኣሳ ሶምዒያ ፄሌና፤ ሺን ጋዴ ኡባን ባሬው ያዪያዋኔ ፂሎ ኦሱዋ ኦያዋ ጋላቲያዋ ታኒ ቱሙ ኣኬካዲ። #ዛር 10፡17 36ፆሳይ ኣሳ ኡባ ጎዳ፥ ዬሱሲ ኪሪስቶሳ ባጋና፥ ሳሮቴ ኦዲዴ፥ ሃ ዎንጋላ ሚሺራቹዋ ኢስራዔሊያ ኣሳሲ ኪቴዳዋ ሂንቴንቱ ኤሪታ። 37ዮሃኒሲ ቃላ ኦዴዳ ፂንቃታፔ ጉዪያን፥ ጋሊላፔ ዶሚዴ፥ ዪሁዳ ጋዲያ ኡባን ሃኔዳዋ ሂንቴ ኤሪታ። 38ፆሳይ ናዚሬቲያ ዬሱሳ ጌሻ ኣያናኒኔ ዎልቃን ኩንዳ፤ ፆሳይ ኣናና ዴዒያ ዲራው፥ ሎዖባ ኢ ኦዲኔ ፃላሂያ ካፑዋሲ ሞዴቴዳ ኡባ ፓዴ ዩዬዳ።

39«ኣዪሁዳ ጋዲያኒኔ ዬሩሳላሜን ኢ ኦዳ ኡባባሲ ኑኒ ማርካ። ኡንቱንቱ ማስቃሊያ ቦላ ሚሲማሪያን ሺ ካቂዴ፥ ኣ ዎዲኖ። 40ሺን ፆሳይ ሄዜንያ ጋላሳን ሃይቁዋፔ ኣ ዴንዴ ቤሴዳ። 41ፆሳይ ኮይሮ ዶሬዳ ማርካቱዋ ኑና፥ ኣ ቤሴዳፔ ኣቲን፥ ኣሳ ኡባ ጊዴና፤ ሃይቁዋፔ ኢ ዴንዴዳዋፔ ጉዪያን፥ ኑኒ ኣናና ሜዶኔ ኡሼዶ። 42ፆሳይ ዎንጋላ ሚሺራቹዋ ኣሳሲ ኑኒ ኦዳናዉኔ፥ ፓፃ ዴዒያዋንቱ ቦላኒኔ ሃይቄዳዋንቱ ቦላን ፒርዳናው ኢ ሱንዳዌ ዬሱሳ ጊዴዳዋ ኑኒ ማርካታናው ኑና ኣዛዜዳ። 43ፆሳይ ኣኒ ኣማኒያ ኡባ ናጋራ ኣ ሱንን ኣቶ ጋናዋ ናባቱ ኡባቱ ማርካቲኖ» ያጌዳ።

ኣዪሁዳ ጊዴና ኣሳቱ ኣማኒዴ ጌሻ ኣያና ኣኬዲኖ

44ጴፂሮሲ ቢሮ ሄ ዬዉዋ ኦዲሺን፥ ቃላ ሲሲያ ኡባ ቦላ ጌሻ ኣያናይ ዎ ኣጌዳ። 45ጴፂሮሳና ዮጴፔ ዬዳ፥ ኣማኒያ ቃፃሬቴዳ ኣዪሁዳ ኡባቱ ኣዪሁዳ ጊዴናዋንቱ ቦላንካ ጌሻ ኣያና ኢሞታይ ጉኬዳ ዲራው ማላሌቴዲኖ። 46ኣዪሲ ጎፔ፥ ኡንቱንቱ ዱማ ዱማ ቃላን ሃሳዪሺኒኔ ፆሳ ዳሮቴ ሳቢሺን ሲሴዲኖ።

ሄ ዎዴ ጴፂሮሲ ዛሪዴ፥ 47«ሃዋንቱ ቃሲ ኑናዳን ጌሻ ኣያና ኣኬዳዋንቱ ፃማቄቴናዳን፥ ሃ ኡንቱንታ ዲጋናው ዳንዳዪያዌ ኦኔ?» ያጌዳ። 48ኡንቱንቱ ዬሱሲ ኪሪስቶሳ ሱንን ፃማቄታና ማላ፥ ኡንቱንታ ኣዛዜዳ፤ ሄዋፔ ጉዪያን፥ ኡንቱንቱ ባሬንቱና ኣማሬዳ ጋላሳ ኡታና ማላ፥ ኣ ዎሴዲኖ።

Currently Selected:

ዬሱሲ ኪቴዳዋንቱ ኦሱዋ 10: dwrENT

Highlight

Copy

Compare