ዬሱሲ ኪቴዳዋንቱ ኦሱዋ 11

ጴፂሮሲ ኣዪሁዳ ጊዴና ኣሳፔ ኣማኔዳዋንቱ ሶይ ኣያው ጌሌዴንቶ ኦዴዳ

1ዬሱሲ ኪቴዳዋንቱኔ ዪሁዳ ኡባን ዴዒያ ኢሻቱ፥ ኣዪሁዳ ጊዴናዋንቱካ ፆሳ ቃላ ኣኬዳዋ ሲሴዲኖ። 2ጴፂሮሲ ዬሩሳላሜ ቤዳ ዎዴ፥ ቃፃሬቴዳ ኣሳቱ ኣናና ፓሉሜቲዴ፥ 3ኣ፥ «ኔኒ ቃፃሬቲቤናዋንቱኮ ጌላዴ፥ ኡንቱንቱና ቁማ ማዳ» ያጌዲኖ።

4ሺን ጴፂሮሲ ሃኔዳዋ ኮይሩዋፔ ዶሚዴ፥ ማራን ማራን ሃዋዳን ያጊዴ ኦዴዳ፤ 5«ታኒ ዮጴ ካታማን ፆሳ ዎሲሺን፥ ታኒ ኣያናኒ ጊዳዴ ሳፃ ቤዓዲ፤ ዎልቃማ ማዩዋ ማላቲያዌ ኦይዱ ባጋና ኦይቄቲዴ፥ ሳሉዋፔ ዎዴ፥ ታኮ ዬዳ። 6ሄዋ ጊዱዋ ታኒ ጫዳ ፄሊያ ዎዴ፥ ኦይዱ ጌዲ ዴዒያ ሜሂያ፥ ዱዓ፥ ሾሻ፥ ዛሪያኔ ካፉዋ ቤዓዲ። 7ቃሲ፥ ‹ጴፂሮሳ፥ ዴንዳ፤ ሹካ ማ› ጊያ ቃላ ታኒ ሲሳዲ።

8«ሺን ታኒ፥ ‹ታ ጎዳው፥ ሃኔና! ቱናባይ ዎይ ሼኔዪያባይ ኡባካ ታ ዶናኮ ሺቂ ኤሬና› ጋዲ።

9«ቃላይ ሳሉዋፔ ላዔዋካ፥ ‹ፆሳይ ጌሼዳዋ ኔኒ ቱና ጎፓ› ያጊዴ ታው ዛሬዳ።

10«ሄዌ ሄዙ ጌዴ ሃኒና፥ ዉርሴን ኡባባይ ሳሉዋ ፑዴ ጎሼቴዳ። 11ሄ ማንዒያንካ ሄዙ ኣሳቱ ቂሳሪያፔ ታኮ ኪቴቲዴ፥ ታኒ ዴዒያ ጎሊያ ጋኪ ኣጌዲኖ። 12ታኒካ ሲናኒ ኡንቱንቱና ባና ማላ፥ ጌሻ ኣያናይ ታው ኦዴዳ። ቃሲ ሃ ኡሱፑን ኢሻቱ ዮጴፔ ታናና ቂሳሪያ ቢና፥ ኑኒ ቆርኔሊዮሳ ሶይ ጌሌዶ። 13-14ኪታንቻይ ባሬ ሶዪን ኤቂዴ ባሬና፥ ‹ጴፂሮሳ ጌቴቲያ ሲሞና ፄሳናው ኣሳ ዮጴ ኪታ፤ ኔኒኔ ኔ ጎሌ ኣሳይ ኡባይ ኣቲያ ቃላ ኢ ኔው ኦዳናዋ› ጌዳዋ ቆርኔሊዮሲ ዎቲ ሲሴዴንቶ፥ ኑሲ ኦዴዳ።

15«ታኒ ሃሳያናው ዶሚያዋን ጌሻ ኣያናይ ኮይሮ ኑ ቦላ ዎዳዋዳን፥ ኡንቱንቱ ቦላካ ዎ ኣጌዳ። 16ጎዳይ፥ ‹ዮሃኒሲ ሃን ፃማቄዳ፤ ሺን ሂንቴንቱ ጌሻ ኣያናን ፃማቄታኒታ› ያጌዳ ቃላ ታኒ ሃሳያዲ። 17ፆሳይ ኑሲ ጎዳ ዬሱሲ ኪሪስቶሳ ኣማኔዳዋንቱሲ ኢሜዳ ኢሞታ ማላ ኣዪሁዳ ጊዴናዋንቶካ ቃሲ ኢሞፔ፥ ሲሚ ፆሳ ዲጋናው ታኒ ኦኔ?» ያጌዳ።

ኣማኒያዋንቱ ኪሪስታኔ ጌቴቴዲኖ

18ኡንቱንቱ ሃዋ ሲሴዳ ዎዴ ባሬንቱ ፓሉማ ኣጊዴ፥ «ያቲና፥ ፆሳይ ኣዪሁዳ ጊዴናዋንቱካ ቃሲ ናጋራፔ ሲሚዴ ዴዓናዳን፥ ኡንቱንታ ቃዴዳ» ያጊዴ ፆሳ ጋላቴዲኖ።

19ኢስፂፋኖሳ ቦላ ጋኬዳ ዋዪያ ጌዱዋን ላሌቴዳ ኣማኒያዋንቱ ቃላ ኣዪሁዳቱዋ ፃላላፔ ኣቲን፥ ሃራሲ ኢቱዋሲኔ ኦዴናን፥ ፒንቄ፥ ቆጲሮሳኔ ኣንፆኪያ ጋካናው ዩዬዲኖ። 20ሺን ቆጲሮሳፔኔ ቄሬናፔ ዬዳ ኢቲ ኢቲ ኣማኒያ ኣሳቱ ኣንፆኪያ ቢዴ፥ ጎዳ ዬሱሳ ዎንጋላ ሚሺራቹዋ ኦዲዴ፥ ጊሪኬ ኣሳሲካ #11፡20 ግሪኬ ኣሳ፡ ሃዋ ጉሳይ ግሪኬ ቃላ ሃሳዪያ ኣዪሁዴ ዎይ ሃራ ኣሳ። ኦዴዲኖ። 21ጎዳ ዎልቃይ ኡንቱንቱና ዴዔ፤ ቃሲ ጮራ ኣሳይ ኣማኒዴ፥ ጎዳኮ ሲሜዲኖ።

22ሃ ዬዉ ዬሩሳላሜን ዴዒያ ኣማኒያ ኣሳሲ ሲሴቲና፥ ኣማኒያ ኣሳይ ባርናባሳ ኣንፆኪያ ኪቴዳ። 23ባርናባሲ ኣንፆኪያ ቤዳ ዎዴ፥ ፆሳ ኣ ኬካቴ ኦሱዋ ቤዒዴ ናሼቴዳ፤ ኡንቱንቱ ኡባይ ጎዳን ባሬንቱ ኩሜን ዎዛናፔ ሚኒ ዴዓናዳን፥ ኡንቱንታ ዞሬዳ። 24ኣዪሲ ጎፔ፥ ባርናባሲ ጌሻ ኣያናይኔ ኣማኑ ኩሜዳ ሎዖ ኣሳ፤ ሄ ጋሱዋን ጮራ ኣሳይ ጎዳኮ ዬዲኖ።

25ሄዋፔ ጉዪያን፥ ባርናባሲ ሳዖላ ኮያናው ፄርሴሴ ቤዳ። 26ያቲዴ ሳዖላ ዴሜዳ ዎዴ፥ ኣንፆኪያ ኣሄዳ። ባርናባሲኔ ሳዖሊ ኣማኒያ ኣሳና ኢቲ ላይ ኩሜን ኡቲዴ፥ ጮራ ኣሳ ታማሪሴዲኖ፤ ካሊያዋንቱ ኣንፆኪያን ኣማኒያ ኣሳ ጌቴቲዴ፥ ኮይሮ ፄሴቴዲኖ።

27ናባቱ ዬሩሳላሜፔ ኣንፆኪያ ሄ ዎዴ ዎዲኖ። 28ኡንቱንቱ ጊዶፔ ኣጋቦሳ ጊያዌ ዴንዲዴ፥ ሳዓ ኡባን ዎልቃማ ኮሻይ ዴንዳናዋ ኣያና ዎልቃን ቲምቢቲያ ኦዴዳ፤ ሄዌ ሃኔዳዌ ቃላዉዴዮሳ ካዉቴ ዎዲያና። 29ካሊያዋንቱ ሁጲያን ሁጲያን ባሬንቱ ዎልቃ ኬና ሚሻ ኬሲዴ፥ ዪሁዳን ዴዒያ ባሬንቱ ኢሻቱዋሲ ማዱዋ ዬዳናው ቆፋ ቃቼዲኖ። 30ኡንቱንቱ ሄዋዳን ኦዴ፥ ሚሻ ባርናባሳ ቦላኒኔ ሳዖላ ቦላ ዎሳ ጎሌ ጪማቶ ዬዴዲኖ።

Currently Selected:

ዬሱሲ ኪቴዳዋንቱ ኦሱዋ 11: dwrENT

Highlight

Copy

Compare