أمْثال 28
28
1كَنْ مَا يَطُرْدُوهْ كُلَ،
الْعَاصِي يَجْرِي وَ يِنْبَلِصْ.
وَ لَاكِنْ الصَّالِحْ
فَحَلْ مِثِلْ الدُّودْ.
2الْعِصْيَانْ كَنْ كِتِرْ فِي الْبَلَدْ،
حُكَّامْهَا يَبْقَوْا كَتِيرِينْ
وَ السَّلَامْ مَا يَجِي
إِلَّا بِرَاجِلْ فَاهِمْ وَ حَكِيمْ.
3الرَّاجِلْ الْفَقْرَانْ الْيَظْلُمْ الضَّعِيفِينْ
هُو مِثِلْ مَطَرَةْ شَدِيدَةْ
التِّدَمِّرْ كُلَّ شَيّءْ.
بَعَدْهَا مَا فِي مَعَاشْ.
4الْيَابَوْا الْقَانُونْ،
يَشْكُرُوا الْعَاصِيِينْ
وَ الْيَحْفَضَوْا الْقَانُونْ،
يُقُمُّوا ضِدُّهُمْ.
5الْفَسْلِينْ مَا يَفْهَمَوْا شَيّءْ فِي الْعَدَالَةْ
وَ لَاكِنْ الْيِفَتُّشُوا اللّٰهْ يَفْهَمَوْا كُلَّ شَيّءْ.
6أَخَيْر فَقْرِي مَاشِي بِصَحِيحْ
مِنْ غَنِيْ عَايِشْ بِكِدِبْ.
7الْوِلَيْد الْفَاهِمْ يِتَابِعْ تَعْلِيمْ أَبُوهْ
وَ لَاكِنْ الْيِرَافِقْ الْمُخَالِفِينْ يِعَيِّبَهْ.
8الْيَغْنَى بِالرِّبَا الْكَتِيرْ
مَالَهْ دَا، اللّٰهْ يَنْطِيهْ
لِلْيِحِنّ فِي الْمَسَاكِينْ.
9الْيِسِدّ أَدَانَهْ مِنْ وَصَايَا اللّٰهْ،
صَلَاتَهْ كُلَ اللّٰهْ يَجْعَلْهَا حَرَامَةْ وَ مَا يَقْبَلْهَا.
10الْيُقُودْ النَّاسْ الْعَدِيلِينْ
فِي الدَّرِبْ الْفَسِلْ،
هُو كُلَ يَقَعْ فِي النُّقْرَةْ النَّكَتْهَا.
وَ لَاكِنْ النَّاسْ التَّمَامِينْ
يَوْرُثُوا الْخَيْر.
11الْغَنِيْ كَنْ يِشِيفْ نَفْسَهْ حَكِيمْ كُلَ،
الْفَقْرِي الْفَاهِمْ يَقْدَرْ يَعَرِفْ الْفِي قَلْبَهْ.
12بِنَصُرْ الصَّالِحِينْ،
النَّاسْ يَفْرَحَوْا
وَ بِنَجَاحْ الْعَاصِيِينْ،
النَّاسْ يِلَّبَّدَوْا.
13الْيِلَبِّدْ خَطَايَهْ مَا يَنْجَحْ.
وَ لَاكِنْ الْيُتُوبْ مِنْ خَطَايَهْ وَ يِخَلِّيهْ،
اللّٰهْ يَرْحَمَهْ.
14مَبْرُوكْ لِلْإِنْسَانْ
الدَّايْماً يَخَافْ مِنْ اللّٰهْ
وَ لَاكِنْ الْيِقَوِّي رَاسَهْ
يَقَعْ فِي الشَّرّ.
15الْحَاكِمْ الْفَسِلْ لِشَعَبَهْ الْمِسْكِينْ
هُو مِثِلْ دُودْ الْيِكِرّ
وَ نِمِرْ الْيِفِرّ.
16الْحَاكِمْ الْمَا عِنْدَهْ فِهِمْ
يِكَتِّرْ ظُلْمَهْ
وَ لَاكِنْ الْيَكْرَهْ الْمَالْ الْحَرَامْ
يُطُولْ عُمْرَهْ.
17كَاتِلْ الدِّمَّةْ يَجْرِي لِلْهَاوِيَةْ.
خَلُّوهْ، مَا تِوَقُّفُوهْ!
18الْيَمْشِي عَدِيلْ، يَنْجَى
وَ الْأَعْوَجْ يِشِيلْ دُرُوبْ تِنَيْن وَ يَقَعْ عَجَلَةْ.
19الْيَحْرِتْ أَرْضَهْ يَشْبَعْ بِالْمَعَاشْ
وَ لَاكِنْ الْيِتَابِعْ الْهَوَاءْ يَشْبَعْ بِالْفَقُرْ.
20النَّادُمْ الْأَمِينْ يَلْقَى بَرَكَةْ كَبِيرَةْ
وَ لَاكِنْ الْيِسَّعْجَلْ لِلْغُنَى، مَا يَجْعَلَوْه بَرِي.
21الْقَاضِي مَا وَاجِبْ يِدَنْقِسْ الشَّرِيعَةْ
وَ لَاكِنْ بِسَبَبْ لُقْمَةْ وَاحِدَةْ بَسْ، الْإِنْسَانْ يَخْطَا.
22الرَّاجِلْ الطَّمَّاعْ يَجْرِي وَرَاءْ الْغُنَى
وَ مَا يَعَرِفْ كَدَرْ الْفَقُرْ يَقَعْ فَوْقَهْ.
23الْيُلُومْ أَخُوهْ،
فِي الأَخِيرْ يَلْقَى رِضَايَهْ
وَ دَا أَخَيْر مِنْ يُغُشَّهْ بِكَلَامْ حَلُو.
24الْيَسْرِقْ أَبُوهْ وَ أَمَّهْ
وَ يُقُولْ: «دَا مَا خَطَا»،
هُو دَا نَادُمْ الْيِجِيبْ الْخَرَابْ.
25الطَّمَعْ يِجِيبْ الْهُرَاجْ
وَ لَاكِنْ الْيِتْوَكَّلْ عَلَيْ اللّٰهْ يَلْقَى الْخَيْر.
26الْيِتْوَكَّلْ عَلَيْ نَفْسَهْ،
هُو دَا مَطْمُوسْ
وَ لَاكِنْ الْيَمْشِي بِحِكْمَةْ،
هُو دَا يَنْجَى.
27الْيَرْحَمْ الْمَسَاكِينْ،
شَيّءْ مَا يِقَصِّرْ لَيَّهْ
وَ لَاكِنْ الْأَبَى مَا يِشِيفْ تَعَبْ الْآخَرِينْ،
يَلْقَى لَعَنَةْ كَتِيرَةْ.
28وَكِتْ الْعَاصِيِينْ يَنْجَحَوْا،
النَّاسْ يِلَّبَّدَوْا.
وَكِتْ الْعَاصِيِينْ يِدَّمَّرَوْا،
الصَّالِحِينْ يَكْتَرَوْا.
Currently Selected:
أمْثال 28: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
