أمْثال 27
27
1مَا تَشْكُرْ نَفْسَكْ
فِي التِّسَوِّيهْ أَمْبَاكِرْ
أَشَانْ فِي الْيَوْم دَا،
إِنْتَ مَا تَعَرِفْ شُنُو يُكُونْ.
2مَا تَشْكُرْ نَفْسَكْ،
خَلِّي الْآخَرِينْ يَشْكُرُوكْ
وَ مَا تَمْدَحْ نَفْسَكْ،
خَلِّي النَّاسْ يَمْدَحَوْك.
3صَحِيحْ، الْحَجَرْ تَقِيلْ
وَ شُوَالْ التُّرَابْ كُلَ تَقِيلْ
وَ لَاكِنْ مَشَاكِلْ الْمُنَافِقْ
تُقَالْ مِنْهُمْ.
4الزَّعَلْ يِخَوِّفْ
وَ الْغَضَبْ يَقْلِبْ مِثِلْ السَّيْل.
وَ لَاكِنْ يَاتُو يَقْدَرْ يَقِيفْ
قِدَّامْ الْحُسُدْ؟
5أَخَيْر الرَّفِيقْ الْيُلُومَكْ
مِنْ الْيِلَبِّدْ رَيْدِتَهْ لَيْك.
6جُرُوحْ الرَّفِيقْ، عِنْدُهُمْ أَمَانْ
وَ لَاكِنْ حُبّ الْعَدُو، غَشَّاشْ.
7الشَّبْعَانْ يِفَجِّقْ الْعَسَلْ الصَّافِي
وَ لَاكِنْ الْجِيعَانْ، الْحَمْضَلْ كُلَ حَلُو لَيَّهْ.
8الرَّاجِلْ الْجَرَى مِنْ بَيْتَهْ
مِثِلْ الطَّيْر الْخَلَّى عُشَّهْ.
9الْعِطِرْ وَ الْبَخُورْ يِفَرُّحُوا الْقَلِبْ
وَ حُبّ الرَّفِيقْ يِنْلَقِي فِي وَصِيّتَهْ النَّافِعْ.
10مَا تِخَلِّي رَفِيقَكْ وَ لَا رَفِيقْ أَبُوكْ
وَ فِي وَكْت الضِّيقَةْ مَا تَمْشِي فِي بَيْت أَخُوكْ.
جَارْ قَرِيبْ أَخَيْر مِنْ أَخُو بَعِيدْ.
11يَا وِلَيْدِي، أَبْقَى حَكِيمْ وَ فَرِّحْ قَلْبِي
وَ بَيْدَا، نَقْدَرْ نُرُدّ لِلْيُلُومُونِي.
12الْعَاقِلْ يِشِيفْ الشَّرّ وَ يِبَارِيهْ
وَ لَاكِنْ الْجَاهِلْ يَقَعْ فَوْقَهْ وَ يِآذِيهْ.
13الْيَضْمَنْ نَادُمْ مَا مَعْرُوفْ،
شِيلْ خَلَقَهْ
وَ كَنْ يَضْمَنْ أَجْنَبِيَّةْ،
أَكْرُبْ مِنَّهْ ضَمَانْ.
14الْيِبَكِّرْ لِيِسَلِّمْ أَخُوهْ بِعَوَّةْ،
بَرَكَتَهْ دِي، يَجْعَلَوْهَا لَيَّهْ لَعَنَةْ.
15الْمَرَةْ الدَّايْماً مُخَالِفَةْ،
خِلَافْهَا مَا يَقِيفْ
مِثِلْ تَشْكتَشاكْ الْعِينَةْ.
16مَا تِنْكَرِبْ مِثِلْ الرِّيحْ
وَ مِثِلْ الدِّهِنْ فِي بَطُنْ الْإِيدْ.
17الْحَدِيدْ يِطَرِّقْ الْحَدِيدْ
وَ الْإِنْسَانْ يِطَرِّقْ الْإِنْسَانْ.
18الْيِرَيِّسْ زَرَعْ التَّمُرْ
يَاكُلْ مِنْ تَمْرَهْ.
وَ الْخَدَّامْ الْيِفَكِّرْ فِي سِيدَهْ
يَلْقَى شَرَفْ.
19فِي الْأَلْمِي، يِنْشَافْ وِجْه الْإِنْسَانْ
وَ فِي قَلْبَهْ، تِنْشَافْ نَفْسَهْ.
20شَهْوَةْ الْإِنْسَانْ أَبَداً مَا تَشْبَعْ
مِثِلْ الْمَوْت وَ الْهَلَاكْ أَبَداً مَا يَشْبَعَوْا.
21بِالنَّارْ، الصَّيَّاغِي يَكْشِفْ الدَّهَبْ وَ الْفُضَّةْ
وَ لَاكِنْ الْإِنْسَانْ يِنْعَرِفْ بِسِمْعِتَهْ.
22كَنْ تُدُقّ الْمُنَافِقْ
مِثِلْ دَقِّينْ الْغَلَّةْ
بَيْن الْفُنْدُقْ وَ الْعَمُودْ كُلَ،
أَبَداً مَا يِخَلِّي نِفَاقَهْ.
23أَعَرِفْ غَنَمَكْ عَدِيلْ
وَ رَيِّسْ دَوْر بَهَايْمَكْ.
24أَشَانْ الْغُنَى مَا يُدُومْ إِلَى الْأَبَدْ
وَ التَّاجْ مَا يِنْحَفِضْ مِنْ ذُرِّيَّةْ لِذُرِّيَّةْ.
25وَكِتْ الْقَشّ الْيَابِسْ يِكَمِّلْ،
أَقْطَعْ الْحَيَاةْ الْأَخْضَرْ
وَ لِمّ قَشّ الْقَوْز.
26مِنْ صُوفْ الْخُرْفَانْ، تَلْبَسْ خَلَقْ
وَ بِتَمَنْ التُّيُوسْ، تَشْرِي زَرَعْ.
27وَ لَبَنْ عِنْزَيْك، يِتِمّ لِعِيشْتَكْ
وَ لِعِيشَةْ بَيْتَكْ وَ لِخَدَّامَاتَكْ.
Currently Selected:
أمْثال 27: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
