عِبْرَانِيِّين 7
7
كُبوريّة مَلْكِصَادِق
1وَ مَلْكِصَادِقْ دَا، هُو مَلِكْ حِلَّةْ شَالِيمْ وَ رَاجِلْ دِينْ هَنَا اللّٰهْ الْعَالِي. وَ هُو لَاقَى إِبْرَاهِيمْ وَ بَارَكَهْ وَكِتْ إِبْرَاهِيمْ مُقَبِّلْ مِنْ الْبَكَانْ الْأَنَّصَرْ فَوْقَهْ فِي الْمُلُوكْ. 2وَ لَيَّهْ هُو، إِبْرَاهِيمْ أَنْطَى الْعُشُرْ مِنْ كُلَّ شَيّءْ الشَّالَهْ فِي الْحَرِبْ.#7:2 إِبْرَاهِيمْ أَنْطَى الْعُشُرْ مِنْ الْحَرِبْ: التاريخ دا تلقوه في تكوين 14:17-20. وَ أَوَّلْ شَيّءْ، الْأُسُمْ مَلْكِصَادِقْ مَعَنَاتَهْ الْمَلِكْ الْعَادِلْ وَ بَتَّانْ هُو مَلِكْ شَالِيمْ، مَعَنَاتَهْ مَلِكْ السَّلَامْ. 3وَ فِي الْكِتَابْ، هُو مَا عِنْدَهْ أَبُو وَ لَا أَمّ وَ لَا قُرْمَةْ. وَكْتَهْ مَا عِنْدَهْ بِدَايَةْ وَ حَيَاتَهْ مَا عِنْدَهَا نِهَايَةْ لَاكِنْ هُو قَاعِدْ دَايْماً مِثِلْ إِبْن اللّٰهْ وَ هُو رَاجِلْ دِينْ إِلَى الْأَبَدْ.
4فَكُّرُوا فِي كُبُورِيّتَهْ. إِبْرَاهِيمْ ذَاتَهْ أَنْطَاهْ الْعُشُرْ مِنْ كُلَّ شَيّءْ الشَّالَهْ فِي الْحَرِبْ وَ إِبْرَاهِيمْ هُو جِدِّنَا الْكَبِيرْ. 5وَ النَّاسْ الْمِنْ ذُرِّيَّةْ لَاوِي الْاللّٰهْ جَعَلَاهُمْ رُجَالْ دِينْ عِنْدُهُمْ إِذِنْ فِي التَّوْرَاةْ أَشَانْ يِشِيلُوا الْعُشُرْ مِنْ الشَّعَبْ، يَعْنِي مِنْ أَخْوَانْهُمْ. وَ أَخْوَانْهُمْ دَوْل كُلَ مِنْ ذُرِّيَّةْ إِبْرَاهِيمْ. 6لَاكِنْ مَلْكِصَادِقْ دَا، هُو مَا مِنْ ذُرِّيَّةْ لَاوِي مِثِلْهُمْ وَ هُو شَالْ الْعُشُرْ مِنْ إِبْرَاهِيمْ وَ بَارَكَهْ وَ إِبْرَاهِيمْ هُو بَسْ النَّادُمْ الْاللّٰهْ أَنْطَاهْ الْوُعُودْ. 7وَ بَلَا شَكَكْ، النَّادُمْ الْيَنْطِي الْبَرَكَةْ أَكْبَرْ مِنْ النَّادُمْ الْيِشِيلْهَا.
8وَ مِثِلْ دَا، اللَّاوِيِّينْ الْيِشِيلُوا الْعُشُرْ، هُمَّنْ النَّاسْ الْيُمُوتُوا لَاكِنْ مَلْكِصَادِقْ الشَّالْ الْعُشُرْ، هُو حَيّ حَسَبْ كَلَامْ الْكِتَابْ. 9بِمَثَلْ آخَرْ، نَقْدَرَوْا نُقُولُوا كَدَرْ عِيَالْ لَاوِي الْيِشِيلُوا الْعُشُرْ ذَاتْهُمْ أَنْطَوْا الْعُشُرْ لِمَلْكِصَادِقْ بِوَاسِطَةْ إِبْرَاهِيمْ 10أَشَانْ لَاوِي لِسَّاعْ قَاعِدْ فِي صُلُبْ جِدَّهْ إِبْرَاهِيمْ وَكِتْ مَلْكِصَادِقْ لَاقَاهْ.
راجِل دين مِثِل مَلْكِصَادِق
11وَ خِدْمَةْ رُجَالْ الدِّينْ الْمِنْ ذُرِّيَّةْ لَاوِي، هِي أَسَاسْ الشُّرُوطْ الْاللّٰهْ أَنْطَاهُمْ لِلشَّعَبْ. لَاكِنْ كَنْ خِدْمَةْ رُجَالْ الدِّينْ الْمِنْ ذُرِّيَّةْ لَاوِي كَامِلَةْ، مَالَا اللّٰهْ جَابْ رَاجِلْ دِينْ آخَرْ مِثِلْ مَلْكِصَادِقْ فِي بَدَلْ رَاجِلْ دِينْ مِثِلْ هَارُونْ؟
12وَ أَكِيدْ كَنْ خِدْمَةْ رُجَالْ الدِّينْ غَيَّرَتْ، لَابُدَّ الشُّرُوطْ كُلَ يِغَيُّرُوا. 13وَ عِيسَى النِّحَجُّوا بَيَّهْ مَا مِنْ ذُرِّيَّةْ لَاوِي. وَ مِنْ قَبِيلْتَهْ هُو، أَبَداً مَا فِي نَادُمْ الْكَلَّفَوْه بِضَحَايَا الْمَدْبَحْ. 14أَشَانْ رَبِّنَا عِيسَى هُو مِنْ قَبِيلَةْ يَهُوذَا وَ دَا مَعْرُوفْ. وَ فِي الشَّيّءْ الْبُخُصّ قَبِيلَةْ يَهُوذَا، مُوسَى أَبَداً مَا قَالْ شَيّءْ فِي رُجَالْ الدِّينْ.
15وَ الْكَلَامْ دَا يَبْقَى وَاضِحْ بِلْحَيْن وَكِتْ يَجِي رَاجِلْ دِينْ آخَرْ وَ هُو يِشَابِهْ مَلْكِصَادِقْ. 16وَ عِيسَى بِقِي رَاجِلْ دِينْ بِسَبَبْ قُدْرَةْ حَيَاتَهْ الْمَا تِكَمِّلْ وَ مَا بِسَبَبْ شَرْط وَاحِدْ مِنْ شُرُوطْ التَّوْرَاةْ الْبُخُصّ ذُرِّيَّةْ النَّاسْ. 17أَشَانْ الْكِتَابْ شَهَدْ لِعِيسَى وَ قَالْ: <إِنْتَ بِقِيتْ رَاجِلْ دِينْ دَايِمْ مِثِلْ مَلْكِصَادِقْ.>#7:17 الكلام دا تلقوه في زَبُور 110:4.
18وَ خَلَاصْ، الشَّرْط الْقَدِيمْ بِقِي بَاطِلْ أَشَانْ مَا يَنْفَعْ وَ مَا عِنْدَهْ قُدْرَةْ. 19أَكِيدْ، شُرُوطْ التَّوْرَاةْ مَا سَوَّوْا أَيِّ شَيّءْ كَامِلْ. وَ اللّٰهْ جَابْ فِي بَدَلْهُمْ دَرِبْ أَخَيْر زِيَادَةْ، الْبَيَّهْ نِقَرُّبُوا لِلّٰهْ بِعَشَمْ زِيَادَةْ مِنْ أَوَّلْ.
20وَ بَتَّانْ، فِي شَيّءْ آخَرْ وَ هُو حَلِيفَةْ اللّٰهْ. النَّاسْ الْأَوَّلْ بِقَوْا رُجَالْ دِينْ مَا بِقَوْا بِحَلِيفَةْ. 21لَاكِنْ عِيسَى بِقِي رَاجِلْ دِينْ بِحَلِيفَةْ اللّٰهْ. مَكْتُوبْ فِي الْكِتَابْ: <اللّٰهْ حَلَفْ وَ هُو يِتِمّ كَلَامَهْ الْبُقُولْ: «إِنْتَ بِقِيتْ رَاجِلْ دِينْ دَايِمْ.»>#7:21 الكلام دا تلقوه في زَبُور 110:4. 22بِالسَّبَبْ دَا، عِنْدِنَا مُعَاهَدَةْ أَخَيْر زِيَادَةْ وَ عِيسَى هُو الْيَضْمَنْ لَيْنَا الْمُعَاهَدَةْ دِي.
23وَ بَتَّانْ فِي شَيّءْ آخَرْ. رُجَالْ الدِّينْ الْمِنْ ذُرِّيَّةْ لَاوِي دَوْل كَتِيرِينْ أَشَانْ هُمَّنْ يُمُوتُوا وَ بَيْدَا، أَيِّ وَاحِدْ مَا يَقْدَرْ يِطَوِّلْ فِي خِدِمْتَهْ. 24لَاكِنْ عِيسَى هُو رَاجِلْ دِينْ الْيَقْعُدْ دَايْماً أَشَانْ هُو حَيّ إِلَى الْأَبَدْ. 25بِالسَّبَبْ دَا، هُو دَايْماً يَقْدَرْ يِنَجِّي النَّاسْ الْيِقَرُّبُوا لِلّٰهْ بَيَّهْ هُو أَشَانْ هُو حَيّ دَايْماً وَ قَاعِدْ يَسْأَلْ لَيْهُمْ اللّٰهْ دَايْماً.
26وَ بَيْدَا، عِيسَى بِقِي كَبِيرْ رُجَالْ الدِّينْ الْمُوَافِقْ لَيْنَا مَرَّةْ وَاحِدْ. هُو قُدُّوسْ وَ مَا عِنْدَهْ أَيِّ عَيْب وَ هُو دَايْماً طَاهِرْ. هُو مَعْزُولْ بَعِيدْ مِنْ الْمُذْنِبِينْ وَ مَرْفُوعْ فَوْق فِي السَّمَاوَاتْ. 27عِيسَى هُو مَا مِثِلْ كُبَارَاتْ رُجَالْ الدِّينْ الْآخَرِينْ دَوْل. مَا وَاجِبْ لَيَّهْ كُلَّ يَوْم يِقَدِّمْ ضَحِيَّةْ أَوَّلْ فِي شَانْ ذُنُوبَهْ هُو وَ بَعَدْ دَا، يِقَدِّمْ ضَحِيَّةْ فِي شَانْ ذُنُوبْ الشَّعَبْ. لَا. هُو قَدَّمْ ضَحِيَّةْ وَاحِدَةْ بَسْ وَ نِهَائِيَّةْ وَ دَا وَكِتْ قَدَّمْ نَفْسَهْ فِي الصَّلِيبْ. 28أَيْوَى، شُرُوطْ التَّوْرَاةْ خَطَّوْا نَاسْ ضَعِيفِينْ لِيَبْقَوْا كُبَارَاتْ هَنَا رُجَالْ الدِّينْ. لَاكِنْ الْحَلِيفَةْ الْجَاتْ بَعَدْ التَّوْرَاةْ خَطَّتْ إِبْن اللّٰهْ كَبِيرْ رُجَالْ الدِّينْ. وَ اللّٰهْ سَوَّاهْ كَامِلْ إِلَى الْأَبَدْ.
Currently Selected:
عِبْرَانِيِّين 7: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
