عِبْرَانِيِّين 8

عِيسَى راجِل دين هنانا

1وَ دِي هِي زِبْدَةْ الْكَلَامْ. أَنِحْنَ عِنْدِنَا رَاجِلْ دِينْ كَبِيرْ مِثِلْ الْفَسَّرْنَا بَيَّهْ لَيْكُو. هُو قَعَدْ جَنْب عَرْش اللّٰهْ الْعَظِيمْ فِي نُصَّهْ الزَّيْنَايْ فَوْق فِي السَّمَاوَاتْ. 2وَ هِنَاكْ، هُو خَدَّامْ فِي الْبَكَانْ الْمُقَدَّسْ الصَّحِيحْ وَ دِي بَسْ الْخَيْمَةْ الْمَا بَنَاهَا إِنْسَانْ. رَبِّنَا بَسْ بَنَاهَا.

3وَ كُلِّ نَادُمْ الْيِدَرُّجُوهْ رَاجِلْ دِينْ كَبِيرْ، وَاجِبْ يِقَدِّمْ لِلّٰهْ ضَحَايَا شِقْ شِقْ. أَشَانْ دَا، وَاجِبْ لِرَاجِلْ الدِّينْ هَنَانَا كُلَ يِقَدِّمْ ضَحِيَّةْ. 4وَ كَنْ عِيسَى قَاعِدْ فِي الْأَرْض، هُو أَبَداً مَا يَبْقَى رَاجِلْ دِينْ أَشَانْ فِي الْأَرْض، رُجَالْ دِينْ آخَرِينْ قَاعِدِينْ الْيِقَدُّمُوا الضَّحَايَا حَسَبْ شُرُوطْ التَّوْرَاةْ. 5وَ الْبَكَانْ الْهُمَّنْ يَخْدُمُوا فَوْقَهْ دَا، عَلَامَةْ بَسْ وَ هِي تِمَثِّلْ الْبَكَانْ الْمُقَدَّسْ السَّمَاوِي. وَ دَا مَعْرُوفْ أَشَانْ وَكِتْ مُوسَى يِدَوْر يَبْنِي خَيْمَةْ الْعِبَادَةْ، اللّٰهْ كَلَّمْ لَيَّهْ وَ قَالْ: <خُطّ بَالَكْ أَشَانْ تَصْنَعْ كُلَّ شَيّءْ حَسَبْ النِّظَامْ الْأَنَا وَصَّفْتَهْ لَيْك فِي الْجَبَلْ.>#8‏:5 الكلام دا تلقوه في خُروج 25‏:40.

6لَاكِنْ هَسَّعْ عِيسَى عِنْدَهْ خِدْمَةْ أَخَيْر زِيَادَةْ مِنْ خِدْمَةْ رُجَالْ الدِّينْ الْأَوَّلَانِيِّينْ أَشَانْ هُو بِقِي وَسِيطْ هَنَا الْمُعَاهَدَةْ الْأَخَيْر زِيَادَةْ. وَ الْمُعَاهَدَةْ دِي، اللّٰهْ ثَبَّتْهَا فِي وُعُودْ أَخَيْر زِيَادَةْ مِنْ الْوُعُودْ الْأَوَّلَانِيِّينْ.

المُعاهدة الجديدة

7وَ كَنْ أَوَّلْ الْمُعَاهَدَةْ الْأَوَّلْ مَا عِنْدَهَا عَيْب، مَا وَاجِبْ يِبَدُّلُوهَا بِمُعَاهَدَةْ آخَرَةْ. 8وَ لَاكِنْ اللّٰهْ حَجَّى بِعَيْب النَّاسْ وَكِتْ هُو هَرَجْ لِلشَّعَبْ وَ قَالْ:

<يَجِي يَوْم وَاحِدْ، نِسَوِّي مُعَاهَدَةْ جَدِيدَةْ

مَعَ بَنِي إِسْرَائِيلْ وَ مَعَ بَنِي يَهُوذَا.

وَ دَا كَلَامْ اللّٰهْ.

9وَ الْمُعَاهَدَةْ دِي

مَا تَبْقَى مِثِلْ الْمُعَاهَدَةْ

الْأَنَا سَوَّيْتهَا مَعَ جُدُودْهُمْ

وَكِتْ قُدْتُهُمْ وَ مَرَقْتُهُمْ

مِنْ بَلَدْ مَصِرْ.

الْمُعَاهَدَةْ الْجَدِيدَةْ دِي

مَا تَبْقَى مِثِلْ الْأَوَّلْ.

هُمَّنْ قَطَعَوْا الْمُعَاهَدَةْ دِي

وَ أَشَانْ دَا، أَنَا كُلَ خَلَّيْتهُمْ.

وَ دَا كَلَامْ اللّٰهْ.

10وَ هَسَّعْ، دِي هِي الْمُعَاهَدَةْ النِّسَوِّيهَا

مَعَ بَنِي إِسْرَائِيلْ بَعَدْ الْيَوْم دَا.

أَنَا نُخُطّ وَصِيَّاتِي فِي فِكِرْهُمْ

وَ نَكْتِبْهُمْ فِي قُلُوبْهُمْ.

وَ أَنَا نَبْقَى إِلٰـهُّمْ

وَ هُمَّنْ يَبْقَوْا شَعَبِي.

وَ دَا كَلَامْ اللّٰهْ.

11وَ نَادُمْ مَا يِعَلِّمْ رَفِيقَهْ

وَ لَا يُقُولْ لِأَخُوهْ:

«أَعَرِفْ اللّٰهْ.»

أَشَانْ كُلُّهُمْ يَعَرْفُونِي،

مِنْ الصَّغَيَّرْ لَحَدِّي الْكَبِيرْ.

12وَ أَنَا نَغْفِرْ لَيْهُمْ خَطَايَاهُمْ

وَ مَا نِفَكِّرْ فِي ذُنُوبْهُمْ بَتَّانْ.>#8‏:12 الكلام دا تلقوه في إرْمِيا 31‏:31‏-34.

13وَ فِي الْكَلَامْ دَا، هُو حَجَّى بِمُعَاهَدَةْ جَدِيدَةْ. وَ بَيْدَا، هُو جَعَلْ الْمُعَاهَدَةْ الْأَوَّلْ قَدِيمَةْ. وَ أَيِّ شَيّءْ الْيَبْقَى قَدِيمْ، وَكْتَهْ كَمَّلْ وَ قَرِيبْ يَبْقَى مَا فِيهْ.

Currently Selected:

عِبْرَانِيِّين 8: ع.د.ت19

Highlight

Copy