عِبْرَانِيِّين 6

خطر الناس الخلّوا الإيمان

1أَشَانْ دَا، نِخَلُّوا وَرَانَا الدُّرُوسْ الْأَوَّلَانِيِّينْ فِي الْمَسِيحْ وَ نَمْشُوا قِدَّامْ لِلتَّعْلِيمْ الْوَاجِبْ لِلنَّاسْ الْعَاقْلِينْ. وَ مَا نِقَبُّلُوا بَتَّانْ فِي أَسَاسْ التَّعْلِيمْ دَا. وَ هُو التَّوْبَةْ مِنْ الْأَعْمَالْ الْيِوَدُّوا النَّاسْ لِلْمَوْت وَ تَعْلِيمْ الْإِيمَانْ بِاللّٰهْ. 2مَا نِعَلُّمُوا بَتَّانْ الْوَضُوءْ وَ خَطِّينْ الْإِيدَيْ فِي النَّاسْ وَ مَا نِعَلُّمُوا بَتَّانْ بُعَاثْ الْمَيْتِينْ وَ الْحِسَابْ الْأَخِيرْ. 3وَ خَلَاصْ، نَمْشُوا قِدَّامْ كَنْ اللّٰهْ قَالْ آمِينْ.

4شُنُو يُكُونْ لِلنَّاسْ الْيِقَبُّلُوا فِي حَالْهُمْ الْقَدِيمَةْ؟ النَّاسْ دَوْل قِبْلَوْا نُورْ اللّٰهْ فِي قُلُوبْهُمْ وَ عِرْفَوْا الْبَرَكَةْ الْاللّٰهْ أَنْطَاهَا وَ شَارَكَوْا فِي الرُّوحْ الْقُدُّوسْ 5وَ دَاقَوْا الْخَيْر هَنَا كَلَامْ اللّٰهْ وَ عَجَايِبْ هَنَا الزَّمَنْ الْجَايِ فِي الْآخِرَةْ. 6هُمَّنْ دَوْل كَنْ يَابَوْا الْإِيمَانْ، مَا نَقْدَرَوْا نِقَبُّلُوهُمْ لِلتَّوْبَةْ بَتَّانْ. أَشَانْ النَّاسْ دَوْل بِقَوْا مِثِلْ قَاعِدِينْ يَكْتُلُوا إِبْن اللّٰهْ فِي الصَّلِيبْ مَرَّةْ تَانِيَةْ وَ يِعَيُّبُوهْ قِدَّامْ النَّاسْ.

7كَنْ الْأَرْض شِرْبَتْ أَلْمِي الْمَطَرْ الْيُصُبّ دَايْماً وَ قَوَّمَتْ النَّبَاتْ الْعِنْدَهْ فَايْدَةْ لِلنَّاسْ الْحَرَتَوْهَا، الْأَرْض دِي اللّٰهْ يِبَارِكْهَا. 8لَاكِنْ النَّاسْ دَوْل مِثِلْ الْأَرْض التِّقَوِّمْ شَوْك وَ حَسْكَنِيتْ. هِي مَا عِنْدَهَا فَايْدَةْ وَ لَعَنَةْ اللّٰهْ تِقَرِّبْ لَيْهَا وَ فِي الأَخِيرْ، يِحَرُّقُوهَا.

وعد اللّه و حليفْته

9يَا أَخْوَانِي النِّحِبُّوكُو، حَتَّى كَانْ نِحَجُّوا لَيْكُو بِالْكَلَامْ الْمِثِلْ دَا كُلَ، مَا عِنْدِنَا شَكَكْ فَوْقكُو. إِنْتُو قَاعِدِينْ فِي الدَّرِبْ الْعَدِيلْ وَ أَكِيدْ هُو دَرِبْ النَّجَاةْ. 10أَشَانْ اللّٰهْ مَا ظَالِمْ لِيَنْسَى خِدْمِتْكُو فِي شَانْ أُسْمَهْ وَ الْمَحَبَّةْ الْوَصَّفْتُوهَا لَيَّهْ بِمُسَاعَدَتْكُو لِأَخْوَانْكُو الصَّالِحِينْ. وَ يَا هَسَّعْ إِنْتُو قَاعِدِينْ تِسَاعُدُوهُمْ. 11وَ نِدَوْرُوا كَدَرْ أَيِّ وَاحِدْ مِنْكُو يِوَصِّفْ دَايْماً النِّيَّةْ الْعَدِيلَةْ الْمِثِلْ دِي وَ عَشَمْكُو يَبْقَى بَلَا شَكَكْ لَحَدِّي الْأَخِيرْ. 12وَ كَنْ تِسَوُّوا مِثِلْ دَا، مَا تَبْقَوْا كَسْلَانِينْ لَاكِنْ تِتَابُعُوا دَرِبْ هَنَا النَّاسْ الْقَاعِدِينْ ثَابْتِينْ فِي الْإِيمَانْ بِالصَّبُرْ وَ يَوْرُثُوا بَرَكَةْ اللّٰهْ الْوَاعَدَاهُمْ بَيْهَا.

13أَشَانْ اللّٰهْ وَاعَدْ إِبْرَاهِيمْ وَ حَلَفْ بِنَفْسَهْ أَشَانْ أَبَداً مَا فِي شَيّءْ أَكْبَرْ مِنَّهْ لِيَحْلِفْ بَيَّهْ. 14وَ اللّٰهْ قَالْ: <أَكِيدْ أَنَا نِبَارِكَكْ وَ نِكَتِّرْ ذُرِّيّتَكْ.>#6‏:14 الكلام دا تلقوه في تكوين 22‏:17. 15وَ خَلَاصْ، إِبْرَاهِيمْ صَبَرْ صَبُرْ قَوِي وَ لِقِي الشَّيّءْ الْاللّٰهْ وَاعَدَهْ بَيَّهْ.

16أَكِيدْ، النَّاسْ فِي عَادِتْهُمْ يَحَلْفُوا بِشَيّءْ أَكْبَرْ مِنْهُمْ وَ كَنْ نَادُمْ يِأَكِّدْ كَلَامَهْ بِحَلِيفَةْ، خَلَاصْ كَلَامَهْ كَمَّلْ. 17وَ اللّٰهْ كُلَ، وَكِتْ هُو يِكَلِّمْ لِلنَّاسْ الْيَوْرُثُوا وَعَدَهْ وَ يِدَوْر يِأَكِّدْ لَيْهُمْ قَرَارَهْ أَبَداً مَا يِغَيِّرْ، هُو ثَبَّتَهْ لَيْهُمْ بِحَلِيفَةْ. 18وَ فِي شَانْ الْكَلَامْ دَا، عِنْدِنَا شَجَاعَةْ شَدِيدَةْ، أَوَّلْ بِوَعَدْ اللّٰهْ وَ بَتَّانْ بِحَلِيفَةْ اللّٰهْ. الْأَشْيَاءْ الْإِتْنَيْن دَوْل أَكِيدْ مَا يَفْشُلُوا أَشَانْ مَا مُمْكِنْ اللّٰهْ يِخَلِّي كَلَامَهْ الْقَالَهْ. وَ خَلَاصْ، أَنِحْنَ التُّبْنَا لِلّٰهْ أَشَانْ نَنْجَوْا، نَكُرْبُوا قَوِي الْعَشَمْ الْهُو قَدَّمَهْ لَيْنَا. 19عَشَمْنَا فِي عِيسَى دَا مِثِلْ وِتِدْ ثَابِتْ الْيِثَبِّتْ نُفُوسْنَا أَشَانْ عِيسَى مَشَى غَادِي لِلسِّتَارْ دَاخَلْ فِي بَيْت اللّٰهْ. 20أَيْوَى، عِيسَى دَخَلْ فِي بَيْت اللّٰهْ السَّمَاوِي فِي شَانَّا مِثِلْ قِيدْ أَشَانْ هُو بِقِي رَاجِلْ دِينْ كَبِيرْ دَايِمْ مِثِلْ مَلْكِصَادِقْ.

Currently Selected:

عِبْرَانِيِّين 6: ع.د.ت19

Highlight

Copy