عِبْرَانِيِّين 5
5
1أَشَانْ دَا، أَيِّ رَاجِلْ دِينْ كَبِيرْ يَعَزُلُوهْ مِنْ النَّاسْ أَشَانْ يَخْدِمْ لِلنَّاسْ قِدَّامْ اللّٰهْ وَ يِقَدِّمْ لَيَّهْ ضَحَايَا شِقْ شِقْ لِذُنُوبْهُمْ. 2وَ هُو يَعَرِفْ كِكَّيْف يِحَجِّي بِنَفَسْ بَارِدْ لِلنَّاسْ الْجُهَّالْ وَ لِلنَّاسْ الْمُوَدِّرِينْ أَشَانْ هُو كُلَ إِنْسَانْ مُعَرَّضْ لِلضُّعُفْ. 3أَشَانْ دَا، لَابُدَّ هُو يِقَدِّمْ لِلّٰهْ ضَحِيَّةْ لِذُنُوبَهْ هُو وَ لِذُنُوبْ الشَّعَبْ كُلَ.
4وَ نَادُمْ مَا يِدَرِّجْ نَفْسَهْ لِلْخِدْمَةْ الْمُشَرَّفَةْ هِنْت رُجَالْ الدِّينْ. اللّٰهْ بَسْ يِنَادِيهْ لَيْهَا مِثِلْ زَمَانْ هُو نَادَى لَيْهَا هَارُونْ.#5:4 هَارُونْ: هو أخو مُوسَى و أوّل نادم الجعلوه كبير رجال الدين. و الكلام دا تلقوه في خُروج 28:1. 5وَ الْمَسِيحْ كُلَ مَا دَرَّجْ نَفْسَهْ أَشَانْ يِسَوِّي نَفْسَهْ رَاجِلْ دِينْ كَبِيرْ، لَاكِنْ الدَّرَّجَهْ هُو اللّٰهْ الْقَالْ لَيَّهْ: <إِنْتَ إِبْنِي وَ الْيَوْم، أَنَا بِقِيتْ أَبُوكْ.>#5:5 الكلام دا تلقوه في زَبُور 2:7. 6وَ فِي بَكَانْ وَاحِدْ فِي الْكِتَابْ، هُو قَالْ: <إِنْتَ بِقِيتْ رَاجِلْ دِينْ دَايِمْ مِثِلْ مَلْكِصَادِقْ.>#5:6 الكلام دا تلقوه في زَبُور 110:4. و تاريخ مَلْكِصَادِق تلقوه في تكوين 14:17-20.
7وَكِتْ عِيسَى قَاعِدْ فِي الدُّنْيَا، هُو نَادَى اللّٰهْ الْيَقْدَرْ يِنَجِّيهْ مِنْ الْمَوْت وَ سَأَلَهْ بِحِسّ عَالِي وَ دُمُوعْ. وَ اللّٰهْ قِبِلْ سُؤَالَهْ أَشَانْ هُو تَقِي. 8صَحِيحْ، عِيسَى هُو إِبْن اللّٰهْ لَاكِنْ هُو عَلَّمْ كِكَّيْف يِتَابِعْ كَلَامْ أَبُوهْ بِالتَّعَبْ التِّعِبَهْ. 9وَ خَلَاصْ، هُو بِقِي الْمُنَجِّي الْكَامِلْ وَ بِقِي دَرِبْ النَّجَاةْ الْأَبَدِيَّةْ لِكُلَّ النَّاسْ الْيِتَابُعُوا كَلَامَهْ. 10وَ اللّٰهْ جَعَلَهْ رَاجِلْ دِينْ كَبِيرْ مِثِلْ مَلْكِصَادِقْ.
الصغير في الإيمان و العاقِل
11عِنْدِنَا كَلَامْ كَتِيرْ نِدَوْرُوا نُقُولُوهْ لَيْكُو فِي التَّعْلِيمْ دَا لَاكِنْ تَفْسِيرَهْ لَيْكُو قَاسِي أَشَانْ إِنْتُو بِقِيتُوا مَطَامِيسْ. 12إِنْتُو الطَّوَّلْتُوا فِي الدَّرِبْ، وَاجِبْ تَبْقَوْا مُعَلِّمِينْ هَنَا الْإِيمَانْ لَاكِنْ بِالصَّحِيحْ، إِنْتُو حَوْجَانِينْ لِدُرُوسْ أَوَّلَانِيِّينْ هَنَا كَلَامْ اللّٰهْ. إِنْتُو بِقِيتُوا مِثِلْ الصَّغِيرْ اللِّسَّاعَهْ حَوْجَانْ لِلَبَنْ أَمَّهْ أَشَانْ هُو مَا جَاهِزْ لِلْأَكِلْ. 13أَيِّ نَادُمْ الْعَايِشْ بِاللَّبَنْ لِسَّاعْ صَغِيرْ وَ مَا يَعَرِفْ دَرِبْ الصَّالِحِينْ. 14وَ التَّعْلِيمْ الْمُهِمّ، هُو مِثِلْ اللَّحَمْ وَ هُو وَاجِبْ لِلنَّادُمْ الْعَاقِلْ فِي الْإِيمَانْ الدَّرَّسَوْه لَحَدِّي يَعَرِفْ كِكَّيْف يِمَيِّزْ الْخَيْر مِنْ الشَّرّ.
Currently Selected:
عِبْرَانِيِّين 5: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
