عِبْرَانِيِّين 4

الدخول في راحة اللّه

1وَعَدْ اللّٰهْ الْبُخُصّ الدَّخُولْ فِي رَاحْتَهْ لِسَّاعْ قَاعِدْ. أَنْقَرْعُوا! خَلِّي أَيِّ نَادُمْ مِنْكُو يَدْخُلْ فِي الرَّاحَةْ دِي بَلَا فَشَلْ. 2أَنِحْنَ سِمِعْنَا الْبِشَارَةْ مِثِلْ أَوَّلْ هُمَّنْ كُلَ سِمْعَوْهَا. لَاكِنْ الْكَلَامْ الْهُمَّنْ سِمْعَوْه مَا جَابْ لَيْهُمْ فَايْدَةْ أَشَانْ النَّاسْ السِّمْعَوْه مَا قِبْلَوْه بِإِيمَانْ. 3وَ أَنِحْنَ الْآمَنَّا بَسْ نَدْخُلُوا فِي الرَّاحَةْ الْاللّٰهْ حَجَّى بَيْهَا دِي وَ قَالْ: <فِي زَعَلِي، أَنَا حَلَفْت وَ قُلْت أَبَداً مَا يَدْخُلُوا فِي رَاحْتِي.>#4‏:3 الكلام دا تلقوه في زَبُور 95‏:11. وَ نَعَرْفُوا رَاحْتَهْ قَاعِدَةْ أَشَانْ عَمَلَهْ كَمَّلْ مِنْ هُو كَوَّنْ الدُّنْيَا. 4أَشَانْ الْكِتَابْ كَلَّمْ فِي بَكَانْ وَاحِدْ بِالْيَوْم السَّابِعْ وَ قَالْ: <اللّٰهْ كَمَّلْ خِدِمْتَهْ وَ فِي الْيَوْم السَّابِعْ، هُو وَقَفْ مِنْ كُلَّ خِدِمْتَهْ.>#4‏:4 الكلام دا تلقوه في تكوين 2‏:2. 5وَ بَتَّانْ، اللّٰهْ حَجَّى بِرَاحْتَهْ وَكِتْ هُو قَالْ: <مَا يَدْخُلُوا فِي رَاحْتِي.>#4‏:5 الكلام دا تلقوه في زَبُور 95‏:11.

6وَ خَلَاصْ، فِي نِيَّةْ اللّٰهْ، فِي نَاسْ يَدْخُلُوا فِي رَاحْتَهْ. وَ لَاكِنْ النَّاسْ الْأَوَّلْ سِمْعَوْا بِشَارَةْ اللّٰهْ مَا دَخَلَوْا فِي الرَّاحَةْ دِي بِسَبَبْ عِصْيَانْهُمْ. 7وَ بَتَّانْ، اللّٰهْ قَطَعْ لِلنَّاسْ يَوْم وَاحِدْ وَ سَمَّاهْ «الْيَوْم.» وَ بَعَدْ سِنِينْ كَتِيرِينْ، هُو حَجَّى فِي كَلَامْ دَاوُدْ الْقَاعِدْ فِي الْكِتَابْ الْأَنِحْنَ كَلَّمْنَاهْ خَلَاصْ وَ الْكَلَامْ دَا بُقُولْ: <الْيَوْم، كَنْ سِمِعْتُوا حِسّ اللّٰهْ، مَا تِقَوُّوا رُوسَيْكُو.>#4‏:7 الكلام دا تلقوه في زَبُور 95‏:7‏-8.

8أَشَانْ كَنْ أَوَّلْ يَشُوعْ قِدِرْ وَدَّى الشَّعَبْ فِي الرَّاحَةْ خَلَاصْ، اللّٰهْ مَا يِحَجِّي بَتَّانْ بِيَوْم آخَرْ. 9وَ بَيْدَا، نَعَرْفُوا كَدَرْ رَاحَةْ آخَرَةْ مِثِلْ رَاحَةْ يَوْم السَّبْت تِفَضِّلْ لِشَعَبْ اللّٰهْ. 10وَ النَّادُمْ الْيَدْخُلْ فِي رَاحَةْ اللّٰهْ يَقِيفْ مِنْ خِدِمْتَهْ مِثِلْ اللّٰهْ وَقَفْ مِنْ خِدِمْتَهْ.

11وَ خَلَاصْ، خَلِّي نِجَاهُدُوا لِنَدْخُلُوا فِي الرَّاحَةْ دِي، أَشَانْ نَادُمْ مِنِّنَا مَا يِوَدِّرْ بِسَبَبْ الْعِصْيَانْ مِثِلْ جُدُودْنَا. 12كَلَامْ اللّٰهْ حَيّ وَ قَادِرْ وَ طَرِينْ زِيَادَةْ مِنْ السَّيْف الْمُطَرَّقْ مِنْ جَايْ وَ جَايْ. هُو يَقْطَعْ دَاخَلْ فِي النَّادُمْ مَرَّةْ وَاحِدْ لَحَدِّي يَلْحَقْ الْبَكَانْ الْفَوْقَهْ النَّفَسْ وَ الرُّوحْ، وَ الْعُضَامْ وَ الْمُشَاشْ. كَلَامْ اللّٰهْ يِمَيِّزْ الْأَفْكَارْ وَ النِّيَّةْ فِي قَلِبْ الْإِنْسَانْ. 13وَ مَا فِي شَيّءْ فِي كُلَّ الْخَلِيقَةْ الْمُلَبَّدْ لِلّٰهْ. كُلَّ شَيّءْ مُكْشُوفْ وَ وَاضِحْ قِدَّامَهْ هُو بَسْ. وَ وَاجِبْ لَيْنَا أَنِحْنَ كُلِّنَا نَجُوا بِأَعْمَالْنَا أَشَانْ هُو يِحَاسِبْنَا.

عِيسَى كبير رجال الدين

14تَعَرْفُوا كَدَرْ أَنِحْنَ عِنْدِنَا رَاجِلْ دِينْ كَبِيرْ وَ هُو عَظِيمْ وَ طَلَعْ فَوْق فِي السَّمَاوَاتْ وَ هُو عِيسَى إِبْن اللّٰهْ. وَ أَشَانْ دَا، خَلِّي نَكُرْبُوا قَوِي إِيمَانَّا بِعِيسَى النَّشْهَدَوْا لَيَّهْ. 15رَاجِلْ الدِّينْ هَنَانَا دَا يَعَرِفْ ضُعُفْنَا أَشَانْ هُو كُلَ، جَرَّبَوْه بِكُلَّ التَّجْرِبَةْ مِثِلْنَا لَاكِنْ هُو أَبَداً مَا سَوَّى ذَنِبْ. 16وَ خَلَاصْ، خَلِّينَا نِقَرُّبُوا لِلّٰهْ الرَّحِيمْ بِأَمَانْ أَشَانْ هُو يَرْحَمْنَا. وَ نَلْقَوْا مِنَّهْ النِّعْمَةْ التِّسَاعِدْنَا وَكِتْ نِحْتَاجَوْا لَيْهَا.

Currently Selected:

عِبْرَانِيِّين 4: ع.د.ت19

Highlight

Copy